bwiza.com
Ahabanza » Rubavu: Abarobyi n’abacuruza Isambaza batewe impungenge n’umusaruro muke babona
Amakuru Ubukungu

Rubavu: Abarobyi n’abacuruza Isambaza batewe impungenge n’umusaruro muke babona

Abacuruza isambaza kimwe n’abaziroba mu kiyaga cya Kivu bo mu turere twa Rubavu na Rutsiro, bavuga ko umusaruro wazo wagabanutse cyane. Icyifuzo cyabo ni uko ba rushimusi bahanwa ndetse n’umurama wazo ukongerwa mu kiyaga. 

Impungenge zabo zishingiye ku kuba umusaruro waravuye kuri toni 20, ubu ukaba ugeze kuri eshanu, imwe mu mpamvu bavuga ibatera kutabona umusaruro uhagije ni barushimusi barobesha ibikoresho bitabugenewe.

Umwe mu bacuruza isambaza aganira na RBA, yagize ati “Dushaka ubuvugizi ku buryo bakoresha ubushakashatsi, bagashaka undi murama bagashyiramo, kugira ngo umusaruro wongere uboneke. Naho ubundi kaningini bayibandaho, kaningini yazimazemo”.

Aho bagurira izi sambaza kimwe n’amafi hazwi nko kuri projet pêche, ikilo cyazo cyavuye kuri 800 none igiciro kikubye gatatu. Ati “ Nk’ubu isambaza zikiboneka twaranguraga kuri 800 zirazamuka zigera ku 1200, zigera ku 1300, ubu turi kuzigura 2500 ikiro. Izumye twazigurishaga 4000 cyangwa 4500 na 5000 ubu ikiro cy’izumye kigeze ku 6500.”

Mugenzi we, Uwamuduha Hajara na we ucuruza isambaza, yagize ati, “Umusaruro umaze kubura rero natwe tubura akazi.Twaziranguraga tukanika, aha ni ku isoko mpuzamahanga, abakongomani bakaza bakaturangurira n’abanya Kigali bose mbese ubuzima bugakomeza.Ariko ubungubu turi gusaba ubuvugizi, ko mwadukorera ubuvugizi kaningini bakayifatira ingamba za simusiga”.

Uhagarariye ihuriro ry’amakoperative y’abarobyi mu Karere ka Rubavu, Gakuru Jean Baptiste na Ndekezi Danny uhagarariye impuzamakoperative y’uburobyi mu Karere ka Rutsiro bavuga ko bagerageje gufata ingamba zo guhashya ba rushimusi ariko ngo aho bigeze basanga hakwiye gukazwa ibihano bigenerwa ba rushimusi.

Umukozi wa RAB, ushinzwe uburobyi mu Ntara y’Iburengerazuba, Dr Gatare Robert avuga ko mu myaka 5 ishize imitego itemewe ikoreshwa n’aba rushimusi yagabanyije umusaruro w’isambaza uva kuri 75% ugera  kuri 40%.

Akavuga ko bitarenze mu kwezi kwa gatandatu itegeko rishya rihana ba rushimusi mu burobyi rizaba ryasohotse ritangire gushyirwa mu bikorwa.

Ati ” Itangazo rya Nyakubahwa Ministre ryarasohotse rishyiraho ayo mabwiriza,ariko iryo tegeko ntabwo rirasohoka, kandi bitarenze mu kwezi kwa gatandatu, ukwa karindwi rizaba ryasohotse, Noneho bya bihano byarushaho kwiyongera, nabo ba rushimusi bahanwa bakava ku gukoresha iyo mitego itemewe! Yewe n’amande akabaho akaba na menshi cyane”.

Uretse guhashya  ba rushimusi baroba isambaza mu buryo butemewe n’amategeko, amakoperative y’abarobyi yifuza ko hakorwa ubushakashatsi,hagashakishwa umurama w’isambaza ugashyirwa mu kiyaga cya Kivu kugirango zongere zororoke.

 

Izindi wakunda

Bwiza.com
error: Alert: Ntabwo byemewe!!