bwiza.com
Ahabanza » Gakenke: Abafite ubumuga barasaba ko iteka rya Minisitiri rigena uko bafashwa mu kwivuza rishyirwa mu bikorwa
Amakuru mu Rwanda

Gakenke: Abafite ubumuga barasaba ko iteka rya Minisitiri rigena uko bafashwa mu kwivuza rishyirwa mu bikorwa

Bamwe mu bafite ubumuga butandukanye batishishoboye bo mu murenge wa Janja mu karere ka Gakenke bategereje ko iteka rya minisiteri w’ubuzima ryo muri 2009 rigena uko leta ibafasha mu kwivuza ryashyirwa mu bikorwa baraheba. Bakaba bakomeje gutakamba basaba koroherezwa kugera kuri serivisi z’ubuzima.

Mu kiganiro cyahuje abaturage n’abayobozi cyateguwe n’umuryango w’abanyamakuru baharanira amahoro PAXPRESS ku nkunga ya NPA cyabereye mu kagali ka Karukungu mu murenge wa Janja ku wa 31 Gicurasi 2019, abafite ubumuga bagaragaje uruhuri rw’ibibazo bijyanye no kwivuza bahura na byo. Muri byo harimo kubura amafaranga yo kwishyura ubwisungane no kwivuza kubera ubukene cyangwa ubumuga bukabije bubabuza kugira ikindi kintu bakwikorera ndetse n’ubusaza no kuba bamwe barashyizwe mu byiciro by’ubudehe bitabemerera kuba bafashwa na leta bikanatuma batabona ubufasha bemererwa n’itegeko.

Mukabaseruka Patirisiya ni umwe muri abo baturage, afite ubumuga bwa 50%. Ati “Twumva ko leta yemeye kutuvuza ariko ntibyigeze byubahirizwa na rimwe ahubwo twe n’imiryango yacu turirya tukimara kugira ngo dushobore kubona ubwisungane mu kwivuza no kugera ku buvuzi dukeneye”.

Bashyira mu majwi ibyiciro by’ubudehe

Kuba ibyiciro by’ubudehe bishingira ku muryango  bibagiraho ingaruka kuko bashyirwa mu cyiciro hatitawe ku bumuga bafite.

Kayitare Onesifori afite ubumuga amaranye imyaka irenga itatu,yashyizwe mu cyiciro cya gatatu cy’ubudehe bituma yivuza bimugoye. Aragira ati “N’aho leta yakadufashishije ntibikora kuko bamwe tuba turi nko mu cyiciro cya gatatu maze bakatubwira ngo imiryango yacu nitwiteho kandi hari n’ubwo ibyo byiciro biba byarakozwe nabi”.

Niyitegeka Samweli, umuhuzabikorwa w’inama y’igihugu y’abafite ubumuga mu karere ka Gakenke asobanura ko iteka rya minisitiri w’ubuzima ryemerera ubwisungane mu kwivuza abafite ubumuga na n’ubu ririmo kugongana n’amabwiriza agenga ibyiciro by’ubudehe abanyarwanda babarizwamo.

Ati “Kugira ngo uhabwe ubwisungane ufashwa na Leta binyuze mu byiciro by’ubudehe ni uko ugomba kuba uri mu cyiciro cya mbere cy’ubudehe, ariko hari n’abafite ubumuga batari mu cyiciro cya mbere cy’ubudehe kandi amakarita bafite y’ubumuga abemerera ko bagombye kuba bahabwa ubwisungane mu kwivuza bwa mituweri”.

Niyitegeka na we yemeza ko hari bamwe mu bafite ubumuga bashyizwe mu byiciro by’ubudehe nabi hatitawe ku bumuga bafite. Ati” Bityo rero ibyo kuba bafashwa na leta ntibiragerwaho kuko ahanini bibangamirwa n’ibyo byiciro by’ubudehe babarizwamo”.Ibi ngo bituma abantu bavuga ko abafite ubumuga bagomba kwitabwaho na bene wabo kandi hari n’ubwo ibyo byiciro biba byarakozwe nabi barashyizwe nko mu cya gatatu batagikwiye

Ku ruhande rw’Ihuriro Nyarwanda ry’Abafite Ubumuga (NUDOR), Twagirimana Eugene, Umuhuzabikorwa w’Umushinga PPIMA wa NUDOR, na we yemeza ko kugeza ubu iteka rya minisitiri rigena uburyo bwo korohereza abafite ubumuga mu kwivuza ritarubahirizwa ku rwego rushimishije ariko ko bakomeza gukora ubuvugizi ngo barebe ko bizagera aho bigakunda.

MINALOC yatanze icyizere

Mu kwezi kwa gatandatu 2018, Minisiteri y’Ubutegetsi bw’igihugu yari yavuze ko igiye gufasha abafite ubumuga butandukanye ariko hagendewe ku byiciro barimo.

Ubwo hakorwaga inama itegura inama mpuzamahanga yagombaga kwiga ku mibereho y’abafite ubumuga ku isi mu kwezi karindwi 2018, Umunyamabanga wa Leta ushinzwe imibereho myiza y’abaturage muri MINALOC Dr Alvera Mukabaramba yavuze ko abafite ubumuga bari bagiye kujya bagenerwa ingengo y’imari yo kubafasha kubona imiti, insimburangingo n’ibindi by’ibanze ariko hagendewe ku byiciro by’ubudehe. Cyakora avuga ko byari bikigoye bikigoye gushyira abafite ubumuga mu byiciro. Dr Alvera yatanze ikizere ati “Ibi nibimara kujya mu bikorwa, ufite ubumuga cyane cyane ubukomatanyije azafashwa ibintu byose”

Imyaka icumi irashize iteka rya minisitiri rigennye uko bafashwa

Iteka rya minisitiri n°20/19 ryo ku wa 27/7/2009 rigena uburyo bwo korohereza abafite ubumuga mu kwivuza. Ingingo ya 2 ivuga ko abafite ubumuga bufite uburemere bubashyira mu byiciro biri hagati ya 50% na 100% bishingirwa na Leta mu bijyanye n’ubwisungane mu kwivuza naho abafite ubumuga bubashyira mu cyiciro kiri hagati ya 30 % na 49% bishingirwa na Leta kuri 50% by’umusanzu w’ubwisungane mu kwivuza. Ku byerekeye uruhare rw’ufite ubumuga mu kwivuza no kugura imiti, abari mu byiciro biri hagati ya 50% na 100% bishyurirwa na Leta naho abari mu cyiciro cyo hagati ya 30% na 49% batishoboye nabo bishyurirwa na Leta.

Umurenge wa Janja urimo abafite ubumuga bagera kuri 676. Muri bo abafite amakarita agaragaza icyiciro cy’ubumuga bwabo ni 313 naho abagera kuri 363 nta makarita bagira. Kugeza ubu mu Rwanda hose habarurwa abafite ubumuga basaga ibihumbi 400.

 

Kaberuka Telesphore/ Bwiza.com

Izindi wakunda

Bwiza.com