bwiza.com
Ahabanza » Ibyumweru bisaga 2 birashize abateramakofe b’Abarundi baraheze muri Gabon kubera kutishyura hotel
Amakuru Imikino

Ibyumweru bisaga 2 birashize abateramakofe b’Abarundi baraheze muri Gabon kubera kutishyura hotel

Abakinnyi b’Abarundi batanu b’umukino w’iteramakofe bavuye mu Burundi bagiye guhagararira igihugu mu marushanwa nyafurika muri gabon, bamaze ibyumweru bibiri bisaga baraheze i Brazaville bameze nk’imfungwa nyuma yo kubura amafaranga yo kwishyura hotel bararagamo.

Bivugwa ko ubusanzwe aba bateramakofe bagombaga kugenda ari 11 ariko batanu akaba ari bo bishyuriwe itike y’indege n’ishyirahamwe ry’Umukino w’Iteramakofe mu Burundi.

Nyuma yo kutabasha kwishyura hotel bari bacumbitsemo, ba nyirayo bafatiriye aba bakinnyi bavuga ko badashobora kubarekura batishyuye amafaranga y’icumbi n’ibyo bafunguraga.

Ni amafaranga kuri ubu amaze kugera ku bihumbi 11 by’Amadolari mu gihe imikino ikirangira bishyuzwaga amadolari 4,900.

Amakuru ava muri Gabon agera ku rubuga UbmNews akaba avuga ko abo bakinnyi babayeho nabi kuko batagaburirwa uko bikwiye kandi ari nako fagitire igenda izamuka.

Minisiteri y’imikino ntacyo iravuga kuri iki kibazo ariko abo bakinnyi bavuga ko ikizi.

Umwe muri bo witwa Eric Ndayishimiye akaba yabwiye BBC ko minisiteri ya siporo n’umuco mu Burundi yari yabijeje kubacyura ariko amaso yaheze mu kirere.

Ambasade y’u Burundi muri Gabon nayo ngo ikaba yarabuze uko yakemura iki kibazo, aho ngo ivuga ko ishobora kubishyurira ayo mafaranga ariko itizeye ko yazayasubizwa.

Izindi wakunda

Bwiza.com
error: Alert: Ntabwo byemewe!!