bwiza.com
Amakuru mashya

Inzu 2000 zakwigonderwa na buri wese zigiye kubakwa i Nyamirambo

Kompanyi yitwa Remote Group ifatanyije na Rugarama Parka Estate bagiye kubaka inzu 2,000 zishobora kwigonderwa n’ab’amikoro make i Nyamirambo mu Karere ka Nyarugenge.

Ibi ngo bizakorwa hisunzwe igishushanyo mbonera cy’Umujyi wa Kigali ndetse n’amabwiriza y’Ikigo cy’Igihugu Gishinzwe Imiturire.

Izi nzu nk’uko itangazo ryashyizwe ahagaragara n’iyi Kompanyi ribitangaza, zizacumbikira abantu ibihumbi 14 kandi bamwe bakazahabonera akazi gahoraho n’ak’igihe gito.

Uyu mushinga uzatwara miliyoni imwe n’ibice bitatu y’amadolari ya Amerika ukaba waratewe inkunga na Banki y’Amajyambere mu Rwanda na Shelter Africa.

Muri izi nzu hazaba harimo inyubako rusange, amaduka ndetse na parikingi rusange ndetse zizengurutswe n’isoko.

Abazubaka aya mazu nk’uko itangazo bashyize hanze ribivuga, bavuga ko bazagabanya igiciro cy’ubwubatsi bityo ko n’igiciro cy’inzu kizaba kidahanitse.

Bati “ Inzu imwe izaba ihendutse ku buryo ugendeye ku mikoro y’ Umunyarwanda, yabasha kuyigondera. Kugira ngo ibi bigerweho twateguye uburyo bwitwa ‘Aerated Autoclaved Concrete masonry’ butuma ibikenewe byose bikorerwa mu gihugu, hirindwa kubitumiza hanze.”

Hagati aho, inyigo yakozwe mu 2018 yiswe “Housing Market Demand, Housing Finance and Housing Preferences for the City of Kigali” yagaragaje mu Mujyi wa Kigali hakenerwa amazu 31,279 buri mwaka. Ni mu gihe haba hubatswe agera ku 1000 gusa. Ibi bivuze ko haba habura inzu zigera 30,279. Iyi nyigo yagaragaje ko izi nzu zikiri iyanga mu gihe u Rwanda ruteganya ko  35%  by’Abanyarwanda bazaba batuye mu Mijyi bavuye kuri 17.8% mu 2017.

 

 

 

 

Izindi wakunda

Bwiza.com