bwiza.com
Amakuru Politiki

Igipolisi kishe Abarundi batatu bakekwagaho kugaba igitero mu Nkambi y’Impunzi ya Nduta

Igipolisi cya Tanzania kiciye hafi y’umupaka w’u Burundi Abarundi batatu bitwaje intwaro bakekwagaho kuba abagizi ba nabi bagabye igitero mu Nkambi y’impunzi z’Abarundi ya Nduta.

Umuyobozi w’Akarere ka Kibondo yemeje aya makuru y’iyicwa ry’aba batatu ku mugoroba wo kuwa Mbere, yemeza ko bose ari Abarundi.

Mu kiganiro n’itangazamakuru kuri uyu wa Kabiri, uyu muyobozi wa Kibondo yashakaga gusobanura ko aba bantu bishwe n’igipolisi bari mu gatsiko k’inyeshyamba kateye Inkambi y’Impunzi ya Nduta mu cyumweru gishize nk’uko Bwiza.com yanabibagejejeho.

Tanzania: Igitero mu Nkambi y’Impunzi ya Nduta cyakomerekeje babiri

Ubuyobozi buvuga ko aba bantu bari Abarundi bitwaje intwaro, igipolisi kikaba cyarabakurikiranye kugeza ku mupaka wa Tanzania n’u Burundi bakababuza kwambuka ngo bahunge.

Kuva icyo gitero cyagabwa mu Nkambi y’Impunzi ya Nduta kuwa Gatanu w’icyumweru gishize, ngo ubuyobozi n’igipolisi bakomeje gukurikirana abakigabye. Polisi ngo ikaba yarakoze iperereza mu nkambi ikabona ibimenyetso bigaragaza ko abo bantu bari bavuye mu Burundi kandi bashaka guhunga ngo basubireyo.

Bwana Louis Bura, Umuyobozi w’Akarere ka Kibondo akaba yakomeje avuga ko ako gatsiko ari agatsiko gari ku murongo, aho ngo abakagize basaga 10 bihishe mu gashyamba kari hafi y’inkambi kuva muri weekend yose kugeza kuwa mbere nimugoroba ubwo bageragezaga gucika bagacakirana n’igipolisi hakabaho kurasana batatu muri bo bakahagwa abandi bakabasha guhungira mu Burundi.

Akarere ka Kibondo karimo inkambi ebyiri z’impunzi z’Abarundi ari zo Nduta na Mtendeli. Inkambi ya gatatu yakira impunzi z’Abarundi ni iya Nyarugusu iherereye mu Karere ka Kasulu.

Izi nkambi ngo mu minsi ishize zikaba zaragiye zibasirwa n’ibitero bya hato na hato by’abantu bitwaje intwaro bavuga Ikirundi.

 

 

Izindi wakunda

1 Igitekerezo

Impunzi z'Abarundi ziri muri Tanzania zirarira ayo kwarika - bwiza.com 08/06/2019 10:30 am at 10:30 am

[…] Tanzania: Igipolisi cyise abarundi batatu b’inyeshyamba […]

Subiza

Tanga Igitekerezo

Bwiza.com