bwiza.com
Ahabanza » Uganda: Igipolisi kiravuga ko cyataye muri yombi igisambo ruharwa cy’Umunyarwanda
Amakuru Politiki

Uganda: Igipolisi kiravuga ko cyataye muri yombi igisambo ruharwa cy’Umunyarwanda

Igipolisi cya Uganda mu Karere ka Kisoro kiravuga ko cyataye muri yombi igisambo kabuhariwe gikomoka mu Rwanda cyari cyarazengereje abatuye Kisoro no mu nkengero zaho.

Uyu mugabo watawe muri yombi ngo yitwa Kanyangoga Jean Baptiste, Umunyarwanda uvuga ko ari umutekinisiye ndetse ukora n’amatelephone ku Muhanda wa Mutanda.

Iyi nkuru dukesha kimwe mu binyamakuru byo muri Uganda iravuga ko Kanyangoga yafatanywe n’uwitwa Irankunda Gerald alias Ndereri, utuye mu Mudugudu wa Kamonyi, muri Kisoro.

Abakekwa bombi bavugwaho kuba bafite agatsiko kanini k’abagizi ba nabi kazengereje Akarere ka Kisoro bamena amazu, ububiko n’amaduka.

Aba ngo bakunze kwiba za mudasobwa, smart phones, tv, ibikoresho by’umuziki byo mu ngo ndetse n’amafaranga.

Raporo ngarukamwaka yasohowe n’Igipolisi cya Uganda mu mwaka ushize wa 2018 ishyira Abanyarwanda ku mwanya wa mbere mu banyamahanga bakora ibyaha byinshi muri Uganda.

Iyi raporo ivuga ko mu banyamahanga Abanyarwanda bakoze ibyaha 1322, bakurikiwe n’Abanyekongo bakoze ibyaha 368, Abanyasudani bakoze 128, Abanyatanzaniya bakoze 42, mu gihe Abanyakenya bakoze 36.

Guverinoma ya Uganda ikaba ikomeje gushinja Abanyarwanda gukora ibyaha bitandukanye muri Uganda ndetse benshi bagiye batabwa muri yombi bakanakorerwa iyicarubozo mbere yo kubasubiza mu Rwanda.

 

 

 

 

Izindi wakunda

Bwiza.com
error: Alert: Ntabwo byemewe!!