bwiza.com
Amakuru Politiki

Umuryango twifuza ni ufite uburyo bwuzuye mu mfuruka zose z’ubuzima- Umutoni Nadine

Minisiteri y’Uburinganire n’Iterambere ry’Umuryango (Migeprof), isobanura ko umuryango wifuzwa mu gihugu ari ufite ubuzima bwiza, umugabo n’umugore bazira amakimbirane, abana biga, abakobwa badaterwa inda zitateguwe, urimo urubyiruko ruzira ibiyobyabwenge n’ibindi bishobora kuwuhungabanya.

Mu kiganiro ‘Intambwe Iganje’ kuri RBA, Umunyamabanga Uhoraho muri Minisiteri y’Uburinganire n’Iterambere ry’Umuryango (Migeprof), Umutoni Gatsinzi Nadine, yasobanuye ko umuryango utekanye ariwo igihugu cyifuza.

Yagize ati “Umuryango utekani ni ufite abawubayemo babanye mu buryo butekanye, ni ukuvuga ngo nta makimbirane, uzira umwiryane, ababayemo bose bafite ubuzima bumeze neza, ari umugore, ari umugabo babanye neza, abana babo bafite ubuzima buzira umuze. Ni abana bitaweho, badafite imirire mibi, bajya ku ishuri bakiga bagataha, bakamenya bakazagirira igihugu akamaro,…”.

Arakomeza avuga ku muryango utekanye igihugu gikeneye, ati “ Ni umuryango tudasangamo abana b’abakobwa batwara inda zitateguwe, udafite abana b’abahungu bajya mu nzoga n’ibiyobyabwenge bitandukanye, ubayeho mu buryo ubona ko ubasha kwiteza imbere, udakennye. mbese umuryango ufite ubuzima mu buryo bwuzuye mu mfuruka navuga zose z’ubuzima kandi n’abawubayemo ubwabo batekanye, uwo niwo muryango twifuza”.

Padiri Uwumukiza Casimir, ushinzwe Umuryango muri Kiliziya Gatolika, na we wari umutumirwa muri iki kiganiro, avuga ko uyu muryango wifuzwa urangwa n’ibyiza gusa ushoboka.

Ati “Urashoboka kuko iyo abantu bubaka urugo hagati yabo baba bagamije ikintu kiza imbere yabo, n’ubwo bahura n’ingorane ariko bagenda babitsinda, ntabwo watangira umuryango w’abatagatifu , bagenda biyubaka gahorogahoro, ubundi umuryango mwiza umuntu agenda awitoza gahorogahoro, usenga, uganira mu rugo, mbese ufite gahunda y’iterambere,…”.

Mu gihe u Rwanda rwifuza umuryango utekanye, usanga hirya no hino gutandukana kw’abashakanye nabyo bigenda bifata indi ntera, iki kikaba cyaba kimwe mu bigaragaza ko muri uku gutekana k’umuryango hakirimo amakorosi.

Umunyamabanga Uhoraho muri Minisiteri y’Ubutegetsi bw’Igihugu, Ingabire Assumpta, avuga ko atari gatanya gusa nk’ikibazi cyugarije imiryango nyarwanda, ahubwo ko ibibazo byo bikiri byinshi, rimwe na rimwe ngo bikururwa n’uko abantu babanye.

Ati “Imiryango yacu iracyafite ibibazo bitandukanye biyugarije, bashobora no kudatana ariko bakabana mu makimbirane, abana babo ntibige cyangwa bakanagwingira, iyo usubiye inyuma ukareba impamvu z’ibyo bibazo hari aho ugera ugasanga wenda abantu babanye, bahuye bate? Barezwe bate, bakuze bate?

Agendeye ku bushakashatsi avuga ko bwagiye bukorwa, ngo iyo umuntu yakuriye mu makimbirane hari igihe na we bigenda bikamuherekeza, umuryango we ukazajya uhoramo intonganya, by’umwihariko ko mu nzego z’ibanze bafite uburyo bwo kumenya imiryango ibanye neza bakagerageza kuyifasha kwiyunga no gushaka icyayiteza imbere.

 

Izindi wakunda

Bwiza.com