bwiza.com
Ahabanza » Uwatsinzwe urubanza ntitugomba kumuha icyuho cyo kwigomeka ku byemezo b’Inkiko- Urujeni Martine
Amakuru Politiki

Uwatsinzwe urubanza ntitugomba kumuha icyuho cyo kwigomeka ku byemezo b’Inkiko- Urujeni Martine

Ushinzwe kwegereza ubutabera abaturage muri Minisiteri y’Ubutabera, Urujeni Martine, avuga ko mu gihe umuntu yatsinzwe mu rubanza agomba kwishyura, ndetse ko atagomba guhabwa icyuho cyo kwigomeka ku byemejwe n’urukiko.

Yabitangaje kuri uyu wa Gatatu tariki ya 5 Kamena 2019, mu muhango wo gusoza gahunda y’inama nyunguranabitekerezo ku irangiza ry’imanza n’izindi nyandikompesha, zimaze iminsi zibera mu mirenge yose igize Igihugu. Akaba yasabye abanyamabanga nshingwabikorwa b’Imirenge kwitegura kurangiza imanza bifashishije ikoranabuhanga rizatangira mu minsi iri imbere.

Urujeni avuga ko umuturage agomba guhabwa ibyo yatsindiye hatabanje kubaho ayandi mananiza. Ati “”Biragoye kuvuga imiyoborere myiza abaturage batarabona ibyo batsindiye. Umuturage watsinze urubanza agomba guhabwa ibyo yatsindiye kandi mu gihe gikwiye”.

Akomeza avuga ko mu gihe umuntu yatsinzwe urubanza agomba kwishyura, ati “Uwatsinzwe urubanza ntitugomba kumuha icyuho cyo kwigomeka ku byemezo b’Inkiko. Agomba kumenya ko ari inshingano ze gufata iya mbere akarangiza urubanza yatsinzwe”.

Iyo umuturage abonye ubutabera ibindi biroroha

Ku wa 7 Gicurasi 2019, ubwo Minisitiri w’Ubutabera akaba n’intumwa nkuru ya Leta, Busingye Johnston yakiraga indahiro z’abahesha b’Inkiko b’Umwuga, abatari ab’umwuga, abanoteri ba Leta n’abanoteri bikorera, yabibukije ko umuturage agomba kubona ubutabera uko abwemererwa n’amategeko.

Yagize ati “Umuturage iyo abonye ubutabera ibindi byose ategereje cyangwa asabwa biroroha, iyo atabubonye birakomera, yumva hari ikibura gikomeye kugira ngo yumve ko koko ubuyobozi bukorera abaturage”.

Ubwo yitabiraga Inteko y’abaturage muri Werurwe 2019, mu Karere ka Ngororero, Intara y’Uburengerazuba, aho yatangizaga icyumweru cy’Ubutabera ku rwego rw’Igihugu, yabatangarije ko inzego z’ubutabera zibereyeho kubuha umuturage wese aho ari.

Asubiza ibibazo by’abaturage, yabasabye kujya bubaha ibyemezo by’inkiko. Ati “ibyo amategeko ateganya twese biratureba ku gipimo kimwe kandi tugomba kubyakira. Iyo urukiko rwaciye urubanza rukagutegeka kwishyura urishyura ntabwo utoroka. Ubwishyu bushingiye ku butabera”.

Yakomeje ababwira ko ubutabera budakora kubera ko umuntu afite ibya Mirenge, ahubwo ko bukora kuko bugomba gukorwa. Ati “Udafite ubushobozi na busa turamutegereza kugeza igihe azabubona akishyura umwenda w’abandi”.

Izindi wakunda

Bwiza.com
error: Alert: Ntabwo byemewe!!