bwiza.com
Ahabanza » Abarenga 90% bahumeka umwuka uhumanye- Dr. Biruta Vincent
Amakuru mu Rwanda

Abarenga 90% bahumeka umwuka uhumanye- Dr. Biruta Vincent

Minisitiri w’Ibidukikije mu Rwanda, Dr. Vincent Biruta, avuga ko Abanyarwanda bazifatanyiriza hamwe mu kurwanya ihumana ry’umwuka uhumekwa kimwe mu bibazo byugarije ubuzima bw’abatuye isi, bityo ko abagera kuri 90% mu buzima bwabo bwa buri munsi bahumeka umwuka uhumanye.

Kuri uyu wa 5 Kamena 2019, nibwo u Rwanda rwifatanyije n’Isi yose kwizihiza umunsi mpuzamahanga w’ibidukikije. Dr Biruta ubifite mu nshingano akaba avuga ko Ubushakashatsi bwakozwe mu 2017 bwerekanye ko ibigira uruhare runini mu ihumana ry’umwuka mu Rwanda ari imikungugu ifite umurambararo uri munsi ya mikoro 10 n’indi ifite umurambararo wa mikoro 2,5 hakiyongeraho gazi ya Azote.

Imikungugu ivugwa aha ngo ni uruvangitirane rw’utuntu duto tutaboneshwa ijisho twihuza n’ibijojoba bigatumuka mu kirere. Iyo abantu bahumetse iyo mikungugu ngo bishobora kubaviramo indwara zifata umutima n’ibihaha bikaba byanahitana ubuzima bwabo.

Mu rwego rwo kurwanya ihumana ry’umwuka, U Rwanda ngo rwashyizeho umunsi uhoraho ibinyabiziga bikumirwa mu gace runaka, rushyiraho itegeko ryo gusuzumisha ibinyabiziga bikoresha moteri, runagabanya ibiciro bya gazi yo gutekesha aho gukoresha amakara.

Ati “Turashishikariza kandi ikoreshwa rya biyogazi, imbabura zikoresha ibicanwa bizwi ku izina rya palete na burikete (bikomoka ku bishingwe), kandi duherutse kubaka muri Kigali ikigo gishinzwe kugenzura ubwiza bw’umwuka duhumeka.”

Yakomeje avuga ko umwuka uhumanye uza ku isonga mu bibangamiye ubuzima bwiza ku isi hose. Ati “Abarenga 90% bahumeka umwuka uhumanye, naho buri mwaka abagera kuri miliyoni ndwi barapfa biturutse ku ihumana ry’umwuka.”

Dr Biruta akaba ashishikariza buri muntu wese utuye mu Rwanda gutangira gukoresha uburyo bwo guteka budahumanya umwuka, nko gutekesha gazi cyangwa se umuriro w’amashanyarazi, mu rwego rwo gushyigikira ingamba zafashwe mu kurwanya ihumana ry’umwuka duhumeka.

Ku batwara imodoka arabasaba guhora bagenzura ko zidahumanya umwuka [duhumeka] bitari ngombwa. Ati “Abatwara ibinyabiziga barakangurirwa kuzimya za moteri mu gihe baparitse aho kuzisiga zihinda, kuko ziba zisohora imyotsi irimo ibihumanya umwuka abanyamaguru bahumeka”.

Mu rwego rwo kurwanya ihumana ry’umwuka, Min. Biruta arasaba Abanyarwanda gutera ibiti ariko bigaterwa mu ntera runaka uvuye ku ngo kugira ngo bitazangiza. Gutera ibiti by’imbuto kugira ngo binafashe mu kongerera intungamubiri abagize umuryango, bigahashya inzara, bikabungabunga ibidukikije, bikaba indiri y’ibinyabuzima bikomoka iwacu, bikanasukura umwuka uhumekwa.

Izindi wakunda

Bwiza.com
error: Alert: Ntabwo byemewe!!