bwiza.com
Ahabanza » Afurika y’ Epfo: Umurundi wagiye gufata mu mugongo umuryango wa Camir Nkurunziza yararashwe
Amakuru Politiki

Afurika y’ Epfo: Umurundi wagiye gufata mu mugongo umuryango wa Camir Nkurunziza yararashwe

Umugabo w’ umurundi wari wagiye gufata mu mugongo umuryango wa nyakwigendera Camir Nkurunziza yarashwe mu bitugu  kuri uyu wa Kabiri tariki ya  4 Kamena 2019.

Uyu mugabo yarashwe  urusasu rwo mu bitugu ubwo yari mu modoka agiye kwihanganisha  umupfakazi wa  Camir Nkurunziza ageze imbere y’urugo.

Uyu murundi avugwaho kuba yari inshuti magara ndetse ko yanakoranaga na nyakwigendera, nk’ uko tubikesha RFI.

Amakuru aturuka muri Afurika y’ Epfo yemeza ko uyu mugabo w’ inshuti ya Nkurunziza akimara kuraswa yahise ajyanywa kwa muganga ndetse n’ ubuzima bwe bugenda neza.

Aya makuru akomeza kandi avuga ko  umurundi warashwe nta n’ ahantu ahuriye n’ ibitekerezo bya politike , nk’ uko bitangazwa n’ umugore wa nyakwigendera unemeza ko icyo gikorwa cy’ ubugizi bwa nabi cyakorewe imbere y’iwe atari impanuka.

Umugore wa Camir Nkurunziza , Annet Kabasindi yatangarije RFI ko ibi bikorwa byose bigamije gutera ubwoba.

Ati” Abishe umugabo wanjye barashaka guducecekesha ndetse bakanibasira abaje kudufata mu mugongo”.

Kugeza magingo aya, ibinyamakuru bimwe byandikirwa muri Afurika y’ Epfo bivuga ko Camir Nkurunziza na mugenzi we  bishwe barashwe na polisi ubwo yabahagarikaga bakanga bamaze kwiba imodoka.

Ku rundi ruhande,BBC yatangaje ko uyu nyakwigendera Nkurunziza yaratuye muri Afurika y’ Epfo kandi ngo yaba yarishwe ku mpamvu za politike kuko yari umwe mu barwanya Leta y’ U Rwanda.

Umuhango wo gushyingura Camir Nkurunziza utegenyijwe kuwa 7 Kamena 2019 muri Afurika y’ Epfo mu Mujyi wa Cape Town.

 

 

 

 

Izindi wakunda

Bwiza.com