bwiza.com
Amakuru Politiki

Impunzi z’Abarundi ziri mu Rwanda zashyikirijwe imfashanyo n’u Buyapani

Ambasaderi w’u Buyapani mu Rwanda, Takayuki Miyashita yashyikirije impunzi z’Abarundi ziri mu Rwanda mu nkambi ya Mahama, imfashanyo igihugu ahagarariye cyazigeneye. Iyi mfashanyo ikubiyemo ibigori, ibishyimbo ndetse n’ifu y’igikoma.

Amb. Takayuki  wabashyikirije iyi nkunga, yagize ati “Turabizi ko ari byinshi bikenewe muri iyi nkambi kuko n’abantu bakomeza kwiyongera. Icyo dukoze ni ugufasha abatishoboye, ibyo dutanze bifite agaciro ka miliyoni y’amadolari ya Amerika. Bizafasha abagore batwite, abana bakivuka n’abandi bakiri bato babayeho nabi.”

Yakomeje avuga ko iyi nkunga yashyikirijwe PAM igenera ibiribwa impunzi. Uhagarariye PAM mu Rwanda, yavuze ko iyi nkunga irafasha izi mpunzi z’Abarundi kurwanya imirire mibi mu bana.

Ati “Murabona inyuma yacu imifuka myinshi y’ibishyimbo, ifu y’igikoma n’ibindi, tuzabikoresha mu buryo butandukanye turwanya indwara ziterwa n’imirire mibi mu bana bato ndetse no kugaburira abana ku ishuri”.

Muri iyi nkambi ya Mahama, nyuma y’ibishyimbo, amavuta, ibigori, umunyu n’ibindi, buri mpunzi igenerwa amafaranga 5400Frs kugira ngo zibashe guhinduranya ibiribwa zirya bakabasha kwigurira n’imboga. Gusa zikavuka ko nayo ari make.

Uhagarariye izi mpunzi, Pasiteri Jean Bosco Ukwibishatse, yagize ati “Ubusanzwe umuntu yandikiwe 5400Frs ku kwezi, murumva ko ukwezi kose biragoye cyane, turimo kugerageza dusaba ko yakongerwa kuko aya mafaranga ni make,…”.

Uhagarariye u Buyapani mu Rwanda yagejejweho iki kibazo cy’izi mpunzi cy’aya mafaranga make zigenerwa, azitangariza ko abibona ko ibibazo ari byinshi, ko ibibazo zifite arabigeza kuri Leta y’u Buyapani, nyuma bazabivuganeho n’u Rwanda n’indi miryango yita ku mpunzi ngo kugira ngo barebe ko hari icyavugururwa.

U Rwanda rwakiriye impunzi z’Abarundi zisaga ibihumbi 70, abagera ku bihumbi 61 bakaba bari muri iyi nkambi ya Mahama, mu gihe abandi baba mu bice bitandukanye by’igihugu.

 

 

Izindi wakunda

Bwiza.com
error: Alert: Ntabwo byemewe!!