bwiza.com
Amakuru Politiki

Nyamasheke: Abagore baracyagundagurana n’inzitizi nyinshi mu iterambere

?

Bamwe mu bagore b’imirenge itandukanye y’Akarere ka Nyamasheke bavuga ko n’ubwo ubuyobozi bw’akarere kabo bufatanije n’izindi nzego za Leta bukora ibishoboka byose ngo batere imbere, bakigundagurana n’inzitizi nyinshi zikibabangamiye zituma benshi bahora mu bukene uko umwaka utashye ugasanga badatera intambwe ishyitse mu iterambere.

Mu kiganiro na Bwiza.com, bamwe muri bo bavuze ko bimwe mu bituma badatera imbere birimo amakimbirane yo mu miryango akigaragara henshi akazahaza cyane umugore kuko iyo atakivuga rumwe n’umugabo we gutera imbere biba bitagishobotse, inda nyinshi zikomeza guterwa abangavu
bigakurura imyiryane mu miryango yabo, bamwe muri bo bagata amashuri ntibabe bacyizeye ejo hazaza heza, kuba hari benshi batabasha gukorana n’ibigo by’imari kubera ubukene cyangwa imyumvire ikiri hasi, kuba harimo abatazi gusoma,kwandika no kubara bakaba badashobora gukora imishinga migari,kuba hari abakibaswe n’ubusinzi bukabije,n’ibindi.

Umwe mu bagore bo mu Murenge wa Cyato yagize ati “Turagenda tujijuka ni byo kandi tumenya agaciro k’iterambere ariko nk’aha iwacu umugore yazamuka ate acyiziritse ku isuka gusa ,nta yindi mishinga y’iterambere yamuzamura n’ibyo ahinze ntabashe kubigeza ku isoko kubera imihanda mibi? Yagana SACCO se yanaguza ayo mafaranga akayakoresha iki kindi? Ikindi kandi ni uko n’ubushoreke bwiganje ino buteza umutekano muke cyane mu miryango myinshi tugahera muri ibyo iterambere rikadusiga,tukumva dukwiye kwegerwa kurushaho n’ubuyobozi kugira ngo ibi byose bituzitira tubashe kubyigobotora.’’

Aba bagore basanga hari byinshi bigikorwa ngo umugore wo muri aka karere wese akore ku ifaranga

Mu nteko rusange y’inama y’igihugu y’abagore iherutse kuba ku rwego rw’aka karere, aho harebwaga aho imihigo aba bagore bahize bageze bayesa, ibibazo nk’ibi byagarutsweho,bamwe mu bagore ntibanatinya kuvuga ko ikibazo cy’ubusinzi kigenda gifata indi ntera mu bagore bamwe na bamwe muri aka karere na cyo kibangamiye iterambere, hakiyongeraho n’imishinga itanga
amafaranga menshi mu baturage ikiri iya ntayo muri aka karere na byo bigatsikamira iterambere ry’umugore.

Uzamukunda Bernadette,umuhuzabikorwa w’inama y’igihugu y’abagore mu murenge wa Mahembe, yagize ati ’’Twunguranye byinshi bizadufasha mu iterambere ariko abagore bo mu murenge wacu baracyafite ibibazo,cyane cyane ko na VUP yahaga bamwe akazi bayihakuye tukifuza ko yagaruka kugira ngo ababuze imirimo bongere bayibone. Ikindi tutahisha gitsikamira abagore b’iwacu ni ubusinzi bukabije kuri bamwe bukurura n’amakimbirane akomeye mu ngo,aho usanga umugore ari mu kabari ke,umugabo mu ke bakageza nijoro cyane bakinywa batazi n’uko abana biriwe, na byo biratubangamiye rwose ariko ubuyobozi bw’umurenge bwatangiye kubihagurukira ahari bicitse hari
icyo byatanga mu kuzigamira ingo.’

Avuga kandi ko benshi mu bagore bo muri uyu murenge bagifite ubukene bugaragara butuma batinya kugana ibigo by’imari ngo baguze amafaranga bayakoreshe biteze imbere, agashima icyakora perezida Kagame wabahaye umuhanda munini wa kaburimbo Kivu belt, bamwe mu bagore baho bakaba baratangiye kuwubyaza umusaruro bawukoreraho ubucuruzi buciriritse.

Umuhuzabikorwa w’inama y’igihugu y’abagore muri aka karere,Mukamazimpaka Charlotte avuga ko inteko rusange nk’iyi ari urubuga rwiza rwo gucoca ibi bibazo byose, akishimira ingamba zafashwe kuri ibi bibazo byose,cyane cyane ko,ku bufatanye n’urugaga rw’abagore rushamikiye mu muryango FPR Inkotanyi,hari abagore 75 bagiye gufashwa kwiteza imbere, bakazanakomeza kungurana
ibitekerezo byafasha n’abandi bakiri hasi kuzamuka.

Umuyobozi w’aka karere wungirije ushinzwe imibereho myiza y’abaturage, Mukamana Claudette asanga ingamba zafatiwe muri iyi nama rusange zizungura byinshi mu iterambere ry’abagore b’aka karere,agasaba abagize inama y’igihugu y’abagore bose,ku bufatanye n’izindi nzego gukora ibishoboka byose bagahangana n’izi nzitizi zikigaragara,abagore bagakomeza inzira y’iterambere
rirambye biyemeje.

Umuhuzabikorwa w’inama y’igihugu y’abagore mu karere ka Nyamasheke, Mukamazimpaka Charlotte, asanga kuganira bizana ibisubizo byinshi ku iterambere ry’abagore

Izindi wakunda

Bwiza.com