bwiza.com
Ahabanza » Peace Cup: Rayon Sports yasezereye AS Kigali mu gikombe cy’Amahoro biyifasha kugera muri 1/8
Uncategorized

Peace Cup: Rayon Sports yasezereye AS Kigali mu gikombe cy’Amahoro biyifasha kugera muri 1/8

 

Ikipe ya Rayon Sports isezereye ikipe ya AS Kigali mu mikino y’igikombe cy’Amahoro mu ijonjora ribanza, nyuma y’uko Rayon Sports itsinze AS Kigali kuri penaliti 4- 2. Ibi bije nyuma y’uko amakipe yombi anganyije igitego 1-1 mu mikino yombi.

Uyu mukino wabaye uyu munsi , warangiye ikipe ya AS Kigali itsinze Rayon Sports igitego kimwe ku busa (1-0). Uyu mukino ukaba wari uwo kwishyura dore ko umukino ubanza Rayon Sports yari yatsinze AS Kigali igitego kimwe ku busa.

Uyu munsi rero amakipe yombi yagombaga kwisobanura kugira ngo haboneke ikipe ikomeza mu kindi cyiciro cya 1/8 cy’irangiza. Rayon Sport niyo yari yakiriye umukino ukaba wabereye kuri stade Regional I Nyamirambo. Uyu mukino ukaba warangiye As Kigali itsinze Rayon Sports Igitego kimwe ku busa cyatsinzwe na Benedata Janvier bakunze kwita ‘Jijiya’ ku munota wa 28 w’umukino.

Ikipe ya AS Kigali yatangiye umukino isatira mu buryo bukomeye bituma rutahizamu wayo Frank Kalanda ahusha igitego cyari cyabazwe. Ku munota wa 28 nibwo iyi kipe y’abanyamujyi yafunguye amazamu binyuze kuri Benedata Janvier ahawe umupira na Frank Kalanda.

Rayon Sports yagerageje gukora impinduka ishyiramo Michael Sarpong ariko kwishyura igitego birananirana umukino urangira ku nsinzi ya AS Kigali. Nyuma y’uko umukino wari urangiye amakipe yombi yahise atera penaliti kuberako amakipe yombi anganya igitego kimwe kuri kimwe mu mikino yombi.

Rayon Sport yatsinze penaliti 4 kuri 2 za AS Kigali ibifashijwemo na Michael Sarpong, Bukuru Christophe, Manishimwe Djabel na Donkor Prosper. Mu gihe penaliti za AS Kigali zinjijwe na Ntamuhanga Tumaini ’titi’ na Nininahazwe Fabrice. Abahushije penaliti za As Kigali ni  Frank Kalanda na Bishira Latif.

Nubwo ikipe ya AS Kigali yatsinzwe, ishobora kubona amahirwe yo gukomeza muri 1/8 nk’ikipe yatsinzwe neza( Best Looser) kuko yatsindiwe kuri penaliti. Rayon Sports yari imaze imikino 20 yikurikiranya idatsindwa.

Tombora y’uko amakipe azahura muri 1/8 izaba kuwa gatandatu tariki ya 8 Kamena 2019 nyuma y’indi mikino isigaye iteganijwe kuba kuri uyu wa gatandatu.

Dore uko imikno yabaye uyu munsi yagenze:

Rayon Sport 0 -1 AS Kigali ( agg 1-1, peanaliti 4-2)

Unity SC 0 – Mukura (agg 0-5)

Intare FC 1-1 Interforce ( agg 4-3)

Gasogi United 1-0 Hope Fc ( agg 3-2)

Espoir yakomeje muri 1/8 nyuma y’uko Sunrise yikuye mu irushanwa.

 

Nkurunziza  Viateur  Bwiza.com

Izindi wakunda

Bwiza.com
error: Alert: Ntabwo byemewe!!