bwiza.com
Ahabanza » Smart Phones za mbere zikorewe mu Rwanda zirajya ku isoko mu mezi abiri
Amakuru Ubukungu

Smart Phones za mbere zikorewe mu Rwanda zirajya ku isoko mu mezi abiri

Telephone za mbere zo mu bwoko bwa Smart Phones zakorewe mu Rwanda n’uruganda Mara Corporation zizaba zageze ku isoko mpuzamahanga mu gihe cy’amezi abiri nk’uko byemejwe kuri uyu wa Kane na Ashish Thakkar, umuyobozi w’iki kigo.

Ibi Ashish yabitangarije ubwo hatangizwaga inama ku bikorerwa muri Afurika yiswe mu Cyongereza ‘Made-in-Africa Leadership Conference’ yahuje abayobozi bakuru n’abayobozi ba za business hirya no hino ku mugabane.

Mu bintu by’ingenzi biri kuganirwaho muri iyi nama y’iminsi ibiri harimo imbogamizi n’amahirwe mu kuyobora no kwagura business muri Afurika, kugira ubuyobozi burambye mu bijyanye n’inganda nto n’iziciriritse, ubuyobozi bwa Afurika mu bushakashatsi mu by’ubumenyi, gutera inkunga iterambere ry’ibigo ku mugabane no kubaka business zihuza Abanyafurika kandi zirambye.

Ashish Thakkar yavuze ko kubaka no gushinga uruganda mu gice cyahariwe inganda (Special Economic Zone) mu Karere ka Gasabo bigeze ku musozo nk’uko iyi nkuru dukesha The New Times ikomeza ivuga.

Uruganda rw’amatelephone ya Mara mu Rwanda ruzakoresha abantu bagera kuri 200 guhera ku munsi wa mbere, aho 16% muri bo bazaba ari abagore nk’uko byemezwa na Ashish uvuga ko biri mu rwego rw’intego z’iterambere rirambye.

Uyu avuga ko bakora ubwoko butandukanye no mu biciro ku buryo bizaba biri hagati y’amadolari 100 na 200. Yongeyeho ko telephone zimwe zizaba zigenewe isoko ry’u Rwanda gusa mu gihe izindi zizaba zigenewe amasoko y’amahanga muri Afurika.

Ashish Thakkar, CEO wa Mara Corporation

Izo telephone zizaba zigenewe andi masoko ku mugabane, Thakkar yavuze ko zizaba ziriho logo ya Made in Africa, mu gihe izagenewe isoko ryo mu Rwanda zizaba ziriho logo ya ‘Made in Rwanda‘ na ‘Made in Africa‘.

Ikigo Mara Corporation, cyanaguze Banki y’Abaturage y’u Rwanda (BPR), gifite n’urundi ruganda rwa smart phones muri Afurika y’Epfo aho cyashoye miliyoni 100 z’amadolari. Izi smart phones zigiye gukorerwa mu Rwanda ngo zikazaba zihendutse kandi ziri ku rwego rwo hejuru muri quality.

Izindi wakunda

Bwiza.com
error: Alert: Ntabwo byemewe!!