bwiza.com
Amakuru Politiki

Umurenge Kagame Cup 2019: Ikipe ya Masaka ibabajwe n’akarengane yakorewe

Kuwa 15 Gicurasi Masaka ihabwa igikombe cy' Umujyi wa Kigali

Mu gihe byari biteganyijwe ko ikipe ya ruhago y’ Umurenge wa Masaka izakina umukino wa nyuma na Gihango yo muri Rutsiro, iravuga ko ibabajwe n’uburyo yaje kumva yatewe mpaga mu buryo itazi.

Ibi byashimangiwe n’ Umutoza wa Masaka , Yvan Sebashi ubwo yemezaga ko ikipe yaciwe inyuma n’ ubuyobozi bushinzwe imikino mu Mujyi wa Kigali.

Mu kiganiro na Bwiza.com, Sebashi yagize ati” Twerekanye ubushobozi bwacu mu mikino nk’ uko byagaragaye,  ariko byaje kudutungura dutangarijwe ko twatewe mpaga(forfait ) mu bisobanuro bike kandi bidahagije…, twararenganye pe!”.

Yakomeje anavuga ko ataribwo bwa mbere ikipe ye ihura n’ akarengane nk’ ako ngo kuko no mu mwaka ushize ikipe y’ Umurenge wa Nyarugenge yahawe amahirwe yo kwandikisha abakinnyi bashya kandi ntibyayigiraho ingaruka.

Mu rwego rwo kumva uruhande rw’ abashinzwe imikino mu Mujyi wa Kigali twagiranye ibiganiro n’ Ushinzwe imiyoborere myiza, Alexis Bucyana atubwira ko atagize uruhare rwose mu gihano cyafatiwe Masaka.

Ati” Nanjye nabyumvishe nk’ abandi numva ko ikipe ya Masaka yakinishije abakinnyi batemewe harimo uwitwa Samuel wari umukinnyi wa Ndera ibyo rero bagomba kubyakira uko”.

Umuyobozi muri RGB ushinzwe guteza imbere imiyoborere myiza ,Ruburika Antony, yavuze ko nta karengane kakorewe ikipe y’ Umurenge wa Masaka ngo kuko amabwiriza arasobanutse.

Ati” Abakinnyi ikipe yatangiranye nabo mu rwego rw’ Umurenge ni nabo igomba kuzamukana nabo kugeza ku rwego rw’ igihugu, Masaka yo muri Kicukiro yirengagiza ibyo izi, kuko yagiye gufata abakinnyi bakiniye Ndera yo muri Gasabo kandi yari yabatsinze mu mikino ibanza, urumva rero ko ari amanyanga!”.

Muri ruhago y’ abagabo, ikipe ya Masaka (Kicukiro) yatsinze Nyarugenge ibitego 2-1, Masaka ikomeza ku mukino wa nyuma ku bitego 6-2 kuko umukino ubanza Masaka yari yatsinze ibitego 4-1.

Mu wundi mukino wabereye i Gisagara, ikipe y’Umurenge wa Mamba yatsinzwe na Gihango (Rutsiro) ibitego 3-2, Gihango yakomeje ku mukino wa nyuma ku bitego 7-3 kuko umukino ubanza Gihango yari yatsinze ibitego 4-1.

Kuwa 15 Gicurasi 2019, nibwo ikipe y’umupira w’amaguru y’Umurenge wa Masaka mu kiciro cy’abagabo n’iya Rusororo mu bagore zegukanye igikombe k’irushanwa “Umurenge Kagame Cup” ry’umwaka wa 2019 ku rwego rw’Umujyi wa Kigali.

Irushanwa Umurenge Kagame Cup 2019 biteganyijwe ko rizasorezwa mu Karere ka Huye mu Ntara y’Amajyepfo tariki 09 Kamena 2019, aho ikipe ya Gihango yo mu Murenge wa Rutsiro izahura na Nyarugenge.

 

Izindi wakunda

Bwiza.com