bwiza.com
Ahabanza » Babyeyi Bacu, turabasabira iteka ryose- Mme Jeannette Kagame abwira Intwaza
Amakuru Politiki

Babyeyi Bacu, turabasabira iteka ryose- Mme Jeannette Kagame abwira Intwaza

Madamu Jeannette Kagame wifatanyije n’ababyeyi b’Intwaza batuye mu rugo Impinganzima rwa Huye na Nyanza, mu gikorwa cyo Kwibuka ku nshuro ya 25 Jenoside yakorewe Abatutsi mu 1994, kuri uyu wa Gatandatu tariki ya 8 Kamena 2019, yabashimiye kwiremamo icyizere cyo kongera kubaho kandi bakabigeraho.

Intwaza, ni ababyeyi bagizwe incike na Jenoside yakorewe Abatutsi mu 1994, muri uyu muhango wo kwibuka, Madamu Jeannette Kagame yabatangarije ko yazinduwe n’urukumbuzi, urukundo n’umutima w’ineza abafitiye ndetse ko n’intashyo bamwoherereje mu birori byo gusoza umwaka zamugezeho.

Muri uyu muhango wo kwibuka, wanitabiriwe n’ abanyamuryango ba Unity Club  n’Avega Agahozo, Madamu Jeannette Kagame avuga ko hashize imyaka myinshi iyi miryango yiyemeje ubufatanye mu bikorwa byo Kwibuka no kwita ku babyeyi b’Intwaza. Aba babyeyi akaba abashimira uruhare bagize mu kongera kwiyubaka.

Ati “Nyuma y’ibikomere byinshi mwahuye nabyo, byaba ibyo ku mubiri cyangwa n’ibyo tutabona, mwiremyemo icyizere cyo kongera kubaho kandi mwabigezeho. Duhora tubashimira ko mwakomeje ubuzima, mukabaho, tukongera kugira umuryango n’igihugu. Turabibashimira”.

Yakomeje agira ati “Iyo tubasuye, twiga byinshi bitwubaka, Twiga  kugaba ineza, urukundo n’ ubumuntu kuko muri ishusho y’urukundo. Muri mwe twiyibutsa  igisobanuro cy’umubyeyi, Maze tukaba aho abanyu batari, Tukabaganiriza nk’uko abanyu bari bubigenze, dore ko abenshi bari kuba bamaze kuba bakuru. Babyeyi Bacu, turabasabira iteka ryose, U Rwanda duhekeye, rukomeze kugira Intwari, Zimwe zibasha kwirenga, zikitangira u Rwanda, Ngo tutazongera kugira ibyago bihogoza Ababyeyi beza nkamwe”.

Yakomeje yibutsa Abanyarwanda bose muri rusange ko ubuzima bw’aba babyeyi bubareba, ati “Ndasaba buri wese kubabera ijisho, urumuri n’akabando kabasindagiza”.

Yasabye aba babyeyi gukomeza kuba ababyeyi beza b’Intwaza ndetse ko ubuvugizi bakorerwa buzakomeza kugira ngo ibyangombwa nkenerwa bagenerwa bizakomeze kubageraho.

 

Izindi wakunda

Bwiza.com
error: Alert: Ntabwo byemewe!!