bwiza.com
Ahabanza » Nyarugenge: Ikipe y’abagore yakajije imyitozo ihigira gutwara igikombe ‘Kagame Cup’
Amakuru Imikino

Nyarugenge: Ikipe y’abagore yakajije imyitozo ihigira gutwara igikombe ‘Kagame Cup’

Ikipe y’Umurenge wa Nyakabanda, Akarere ka Nyarugenge, Umujyi wa Kigali, mu gihe yitegura umukino wa nyuma w’amarushanwa ‘Umurenge Kagame Cup’, irimo gukora imyitozo amanywa n’ijoro kugira ngo izegukane igikombe.

Ni ikipe y’abagore y’umupira w’amaguru, umukino wa nyuma izawukina ku Cyumweru tariki ya 9 Kamena 2019, kuri Sitade ya Huye mu Ntara y’Amajyepfo. Iyi kipe ikaba izacakirana n’iya Gihombo yo mu Karere ka Nyamasheke, Intara y’Uburengerazuba.

Iyi kipe ikorera imyitozo ku kibuga cy’ahazwi nka Tapis Rouge, hanze ya sitade ya Kigali (Stade Regional Nyamirambo). Kuba bakorera imyitozo mu kibuga kirimo umukungugu kandi sitade iri mu Murenge wabo, bavuga ko byari byiza kuba bayikoreramo ariko ko bari benshi bari bayikeneye, biba ngombwa ko bakorera aho.

Gukorera imyitozo mu kibuga kitagira icyatsi na kimwe ngo ntibyababuza gutwara igikombe

Mu kiganiro Bwiza.com yagiranye n’umutoza w’iyi kipe y’abagore, Tuyisenge Aimable Sandro, yavuze ko byari kuba byiza kurushaho kwitoreza muri sitade, ariko ko n’aho bakoreye bizeye ko bahagaze neza.

Ati “Twasanze ari benshi bayikeneye, gusa ibyo ntacyo bitubwiye kuko ikiturage ishinga ni ugutahana igikombe. Twakorera imyitozo mu mukungugu, twakorera kuri tapi, byose ni kimwe, kuko intego yacu ni ugutahana intsinzi”.

Akomeza avuga ko ikipe atoza igizwe ahanini n’abagore bakuze, bamwe bakaba basanzwe bamenyereye amarushanwa, ibi bikamuha ikizere cyo gutsinda ikipe y’i Nyamasheke.

Ati “Twizeye intsinzi, Bibiri kimwe cyangwa kimwe ku busa icyo nkwizeza cyo ntabwo umukino uzarangira tudafite igitego keretse Imana yonyine niyo izi ubushobozi. Imikino dukina tukaburamo igitego ni mike cyane, dufite abataka bamenyereye imyitozo”.

Umutoza Sandro watwaye igikombe cya mbere cy’iri rushanwa mu 2006 rikitwa Imiyoborere myiza, ubwo yatozaga ikipe y’abahungu ya Gatsibo, mu 2010 nabwo akagitwara atoza ikipe y’Umurenge wa Gisenya/ Rubavu na 2018 atoza Nyarugenge abahungu nabwo bakuyemo umurenge wa Mamba/Nyamasheke, n’ubu yizeye ko iki gikombe kizataha i Kigali.

Umutoza Sandro (Uwicaye), mu 2010 Umurenge wa Gisenyi umaze kwegukana igikombe Kagame Cup

Izindi wakunda

Bwiza.com
error: Alert: Ntabwo byemewe!!