bwiza.com
Ahabanza » Rwamagana: Abafatanyabikorwa bizeje Akarere kuzahigura imihigo ku kigero cya 100%
Amakuru mu Rwanda

Rwamagana: Abafatanyabikorwa bizeje Akarere kuzahigura imihigo ku kigero cya 100%

Mu gikorwa cyo gutangiza imurikabikorwa ry’abafatanyabikorwa mu iterambere  ry’Akarere ka Rwamagana, hamuritswe ibikorwa byakozwe n’abafatanyabikorwa mu Iterambere ry’akarere  mu mwaka w’ingengo y’imari 2018/2019. Bakijeje ko bazahigura 100%.

Umuyobozi w’ihuriro ry’abafatanyabikorwa mu iterambere ry’akarere JADF, Uwayezu Valens yavuze ko bagize uruhare mu bikorwa byinshi ahanini bigamije gukemumura ibibazo bibangamiye umudendezo w’abaturage byatwaye amafaranga arenga miriyari  ebyiri n’igice.

Yagize ati “Uyu munsi twatangiye igikorwa cyo kumurikira abaturage ibyo tubakorera nk’abagenerwabikorwa , nk’abafatanyabikorwa bibumbuye muri JADF ibikorwa twateye inkunga cyangwa twagizemo uruhare byatwaye amafaranga arenga miriyari ebyiri n’igice ndetse n’ibindi bikorwa uyu munsi twamuritse bimwe muri byo bikorwa twakoreye abaturage  muri uyu mwaka w’imihigo”.

Uwayezu yakomeje avuga imihigo y’ibikorwa by’abafatanyabikorwa b’akarere bazayesa 100% ndetese anavuga ko imikoranire myiza n’akarere ariyo ituma bagera ku mihigo biyemeje.

Yagize ati “Imihigo twasinyanye twebwe tubona ko tumaze kugera kuri 99% umuhigo umwe nawo usigaye tuzaba nawo twamaze kuwugeraho ijana ku ijana, nagira ngo nashimire ubuyobozi bw’Akarere kacu kubera imikoranire myiza bituma ibikorwa umufatanyabikorwa  agiye gukora byihuta “.

Abaturage bishimiye gahunda yo kubamurikira ibikorwa bibakorerwa bakavuga ko nabo bizabafasha gusobanukirwa n’uruhare rw’abaturage mu bibakorerwa.

Uwambaje Jeannette ni umwe mu baturage bishimiye  imurikabikorwa ry’abafatanyabikorwa b’akarere. Yagize ati “Twishimiye ibikorwa birimo gukorerwa hano kuko twasuye ibikorwa bikorwa n’imishinga ndetse n’abikorera ku giti cyacu ndetse hano hari serivisi zitangwa n’ubuyobozi nk’izitangirwa ku murenge no muri serivisi z’ubutaka byose bagiye badusobanurira aho dufite ibibazo turasobanukirwa neza,bituma twebwe nk’abaturage tumenya ibikorwa biri mu karere kacu ndetse natwe uruhare rwacu nko mu mihigo n’ibindi bikorwa bikorwa mu karere twamenye aho bikorerwa”.

Umuyobozi w’akarere ka Rwamagana Mbonyumuvunyi Radjabu  yavuze ko abaturage bagomba kumurikirwa ibikorwa bibakorerwa anasaba abafatanyabikorwa gukorera hamwe .

Yagize ati “Bafatanyabikorwa b’akarere kacu nagira ngo mbashimire ibikorwa mukora  ku neza y’abaturage, ni muri gahunda ya nyakubahwa Perezida wa Repulika ahora adutoza,  ibintu 3 by’ingenzi nk’umurongo mugari twahawe aribyo   gutekereza ibintu bigari, hakaba ubumwe  gukorera hamwe nk’Abanyarwanda  ndetse no kwereka abagenerwabikorwa ibibakorerwa aribo baturage bacu nk’abanyarwanda tugomba kumushyigikirano”.

Hasozwa iri murikabikorwa, ku wa Gatanu tariki ya 7 Kamena, yashimiye abafatanyabikorwa bitabiriye iri murikabikorwa, avuga ko bigaragaza ubufatanye kandi ko imikorere nk’iyi ari igikorwa cyiza kidufasha kugaragariza abagenerwabikorwa ibyo bakorerwa ndetse tukanafatanya mu kubishyira mu bikorwa.

Ati “Ubu bufatanye n’ubu bumwe bikomeze, ntibigarukire muri iri murikabikorwa”. Yasabye urubyiruko rwitabiriye iri murikabikorwa ko rwahakura isomo ryabafasha kwihangira imirimo no kwishakamo ibisubizo, rukabigeraho rwirinda ibiyobyabwenge.

Abafatanyabikorwa b’akarere ka Rwamagana mu itarambere bitabiriye imurikabikorwa barenga 65 harimo imiryango itegamiye kuri Leta ndetse n’abikorera ndetse n’inzego  z’ibanze.

Izindi wakunda

Bwiza.com
error: Alert: Ntabwo byemewe!!