bwiza.com
Ahabanza » RIB irahakana irekurwa ry’ umuyobozi wa Supermarketings Global Ltd
Amakuru

RIB irahakana irekurwa ry’ umuyobozi wa Supermarketings Global Ltd

Nyuma y’ amakuru Bwiza.com ikesha bamwe mu  bambuwe na Supermarketings Global Ltd , Urwego rushinzwe ubugenzacyaha(RIB) burabeshyuza amakuru avuga ko umuyobozi wayo watawe muri yombi mu mpera za Gicurasi 2019, yaba yarekuwe.

Ibi byashimangiwe  mu kiganiro Bwiza.com yagiranye n’ Umuvugizi wa RIB, Modeste Mbabazi ubwo yagiraga ati” Twebwe nk’ ubugenzacyaha twakoze akazi kacu kuko uwo ukekwakwaho gukorera ibyo byaha twamushyikirije ubushinjacyaha ubwo nabwo buzakora akazi kabwo”.

Abiga muri Kaminuza y’ U Rwanda bashoye muri Supermarketings Global Ltd bararirira mu myotsi

Bamwe mu banyeshuri biga muri Kaminuza y’u Rwanda ishami ry’Icungamutungo n’Ubucuruzi (CBE) riherereye i Gikondo mu Mujyi wa Kigali bakomeje kuririra mu myotsi nyuma yo gushora no kwamburwa amadorari menshi na Supermarketings Global Ltd.

Umwe muri abo banyeshuri , Mutesi Emmerence yatangarije Bwiza.com ko amaze kumva ko ashobora kuzunguka amafaranga menshi Supermarketings Global Ltd yahise ashoramo amadorari y’ amanyamerika magana arindwi na makumyabiri($720).

Uwundi ni Dushimimana Nazia wavuze ko yashoye muri Supermarketings Global Ltd amadorari y’ amanyamerika igihumbi n’ amagana ane na mirongo ine ($ 1440).

Barasaba ko Leta yabarenganure bitewe n’ uko iyi sosiyete  Supermarketings Global Ltd icyangombwa yahawe na RDB ariko ntiyaza kugenzura imikorere y’ iyi sosiyete.

N’ubwo bimeze bityo, iyo abahoze ari abakiliya Supermarketings Global Ltd bagerageje kwinjira ku rubuga rwayo bahasanga ubutumwa bubizeza ko bazishyurwa vuba.

Ibyo nibyo ubona iyo winjiye ku rubuga rwa Supermarketing Global LTD

Supermarketings Global Ltd yakoraga ite?

Iyo usuye urubuga rwa interinet rw’iki kigo, bakwereka ko mu gihe wifuza gukorana nabo hari amafaranga ugomba kwishyura, ku buryo nabo buri munsi hari ayo bakungukira.

Uwifuzaga kwinjira muri Supermarketings Global Ltd yishyuraga amafaranga ariko akayishyura hakurikijwe agaciro k’idolari.

Urugero uwatangizaga amadorali 30, iki kigo cyamwungukiraga amadorali 0.75 ku munsi, utanze amadorali 60 akungukirwa amadorali 1.5 ku munsi, utanze amadorali 120 we yungukaga amadorali 3 ku munsi, utanze amadorali 240 akungurwa amadorali 6 ku munsi.

Utanze amadolari 480 akunguka amadorali 12 ku munsi, utanze amadorali 960 akunguka amadorali 28.8 ku munsi, utanze amadolari 1920 akunguka amadolari 57.6, utanze amadolari 3800 akunguka amadorali 114 ku munsi, utanze amadorali 7600 akunguka amadorali 228 ku munsi naho utanze 15200 we yungukaga amadorali 456 ku munsi.

Ayanyuma yo gushora yari amadolari 30 400 akunguka amadolari 912 ku munsi

Supermarketings Global Ltd kandi yabwiraga babandi bamaze kwinjiramo ko batagomba kwicara ahubwo bagomba gushaka abandi bakiriya, niba bifuza kubona amafaranga menshi.

Uko iki kigo cyatangaga inyungu ni uko mu gihe wazanaga umukiriya, wahabwaga guhera inyungu ihera kuva 2.5% kugeza 10% by’amafaranga uwo mukiriya azanye.

Hari hashize amezi atandatu abatari bake biganjemo urubyiruko, bayobotse ikigo kizwi nka Supermarketings Global Ltd, aho bashoragamo amafaranga yabo na cyo kikabungukira mu buryo bavugaga ko budasanzwe.

Abanyarwanda barenga 6000 nibo bari barayobotse ubu bucuruzi bw’amafaranga butemewe mu Rwanda, aho bari bamaze gushoramo arenga ibihumbi 79 by’amadolari, ni ukuvuga miliyoni zirenga 71 z’amafaranga y’u Rwanda.

Urwego rw’igihugu rw’ubushinjacyaha RIB rwatangaje ko rwataye muri yombi umuyobozi wa Supermarketings Global Ltd yari imaze iminsi ikora ubucuruzi bw’amafaranga burimo uburiganya (crypto-currency scam).

Izindi wakunda

Bwiza.com