bwiza.com
Ahabanza » Abaturiye umupaka wa Gatuna uhuza u Rwanda na Uganda barasaba kwemererwa guhahirana
Amakuru Politiki

Abaturiye umupaka wa Gatuna uhuza u Rwanda na Uganda barasaba kwemererwa guhahirana

Ikigo cy’Imisoro n’amahoro (RRA) gitangaza ko cyakomoreye by’agateganyo amakamyo apakira imizigo iremereye guca ku mupaka wa Gatuna urimo gukorerwaho imirimo y’ubwubatsi ihuriweho n’u Rwanda na Uganda, ariko abahaturiye bagasaba ko nabo bakwemererwa guhahirana.

Aba baturage basaba ko bakwemererwa kwambuka bakajya muri Uganda bagahaha, ibyo baguzeyo bakemererwa kubyinjirana mu Rwanda mu gihe n’Abagande basaba ko ibyo baguze mu Rwanda bakwemererwa kubijyana iwabo.

Ubwo radiyo Ijwi rya Amerika yageraga kuri uyu mupaka wa Gatuna kuri uyu wa Mbere tariki ya 10 Kamena 2019, yahasanze Abanyarwanda batandukanye bari baturutse hirya no hino nyuma yo kumva amakuru avuga ko amakamyo yakomorewe, nabo biyumvisha ko bemerewe gutambuka nk’uko byahoze.

Aba baturage ngo biyumvishaga ko kuba amakamyo yemerewe guhita, nabo bakomorewe kongera guhahirana n’abaturanyi bo muri Uganda.

Uyu ati “Twamenye ko umupaka ufunguye amakamyo arimo kugenda, umubyeyi yaduhaye inka za Girinka navuga nti nibura najya no kugura n’umunyu wo guha iyo Nka kuko imaze kuma kubera ko nta munyu, igikuya kiva Uganda, mu Rwanda nta gikuya tugira, ngeze ahangaha nzi ko barimo kwambuka ariko nsange bidakunda, ndatashye”.

Yakomeje avuga ko kuba nta we utambuka ngo ajye muri Uganda, ari igihombo. Ati “Ndahombye nyine, ubwo nyine iyo nka irisura n’abana, nkanjye ndi umupfakazi maze gupfusha abagore kabiri none bamfashije iyi Nka ngo ijye iha abana amata, none uwo munyu sinkucyuye, singuriye n’abana akawunga ko kurya, umupaka urafunze ntaho nanyura n’umugande wari kumfasha ntibishobotse, natinye kuko bambwiye ko nta muntu urimo guca muri duwani uretse amakamyo gusa”.

Aba baturage bavuga ko kureka amakamyo agaca kuri uyu mupaka ari inyungu ku bihugu byombi ariko na none bikaba igihombo mu gihe n’abaturage bataba bemerewe kwambuka ngo bahahire muri Uganda, n’Abaturuka yo bemererwe kugera ku butaka bw’u Rwanda ngo bahahe basubiraneyo amahaho.

Ati “Inyungu zo zirahari ni nyinshi, nkanjye n’ubwo ndi mu kiciro cya mbere inyungu irahari kuko Leta iba irimo kwinjiza imisoro, nkanjye ndimo kuhahombera kubera inzara, nk’ubu umwana wanjye yazaga kunsura avuye Uganda na njye nkajyayo, none se ubwo urumva hari inyungu irimo?

Uyu na we ati “Inaha igitoki kigeze kuri 250Frs kandi muri Uganda igitoki ni 100 kuko bo babuze aho babigurisha, inaha duhingira 600Frs ubwo harimo ibiro bine by’ibitoki none inaha n’ibiro bitatu ntabirimo, ubwo se urumva inzara itagiye kutwica. Nibafungure n’abantu bajyeyo”.

Abanya Uganda batemberaga ku mupaka bavuga ko bemerewe kwinjira ku butaka bw’u Rwanda ariko ko ntacyo bemerewe kuhahaha. Uyu ati “Sinzi icyabaye, ni ugutembera gusa, mu rugo ni Rwagatambala[Uganda]”. Akomeza avuga ko adashobora kugura mu Rwanda ikilo cy’ibishimbo cyangwa ikindi kintu ngo yemererwe kucyambukana.

Minisitiri w’Ububanyi n’amahanga w’u Rwanda, Dr Sezibera Richard, avuga ko izi kamyo ziramara ibyumweru bibiri zikoresha uyu mupaka.

Ati “Muri ibi byumweru bibiri ababishinzwe bifuza ko iyi mihanda cyane cyane bayikorera isuzuma, kuyikorera isuzuma rero ni ukureka imodoka zose n’iziremereye zigacamo basanga nta kibazo gihari bagakomeza, basaga hari ibibanza kunozwa bikabanza kunozwa, byarangira byose umupaka ugakoreshwa nk’uko bisanzwe”.

Kuva mu kwezi kwa kabiri uyu mwaka nibwo Guverinoma y’u Rwanda yatangaje ko kubera imirimo y’ubwubatsi irimo gukorerwa ku mupaka wa Gatuna amakamyo yahacaga apakiye imizigo iremereye yakwifashisha umupaka wa Kagitumba mu Burasirazuba bw’igihugu.

Ubwo amakamyo yabuzwaga gutambuka kuri uyu mupaka hari abahise bavuga ko u Rwanda rwafunze umupaka kubera umwuka mubi uri hagati yarwo na Uganda ariko rwo rukabihakana ruvuga ko ari ukwirinda ko urujya n’uruza rw’amakamyo aremereye rubangamira imirimo y’ubwubatsi.

Kuva mu mpera z’ukwezi kwa kabiri kandi nibwo u Rwanda rwatangiye kugina inama Abanyarwanda kureka ingendo bakoreraga muri Uganda, rwiteze ko bagerayo bagahohoterwa.

 

 

Izindi wakunda

Bwiza.com
error: Alert: Ntabwo byemewe!!