bwiza.com
Ahabanza » Byagira ingaruka ki ku Bufaransa buramutse bwerekanye inyandiko z’ibanga ku Rwanda hagati ya 1990-1994?
Amakuru mu mahanga

Byagira ingaruka ki ku Bufaransa buramutse bwerekanye inyandiko z’ibanga ku Rwanda hagati ya 1990-1994?

Muri inyurabwenge  bita Secret- Defense ,Ubufaransa bwakomeje kwanga gutangiza gahunda yo gutanga amakuru ku ruhare iki gihugu cyagize muri Jenoside yakorewe Abatutsi mu Rwanda muri 1994.

Aya makuru yose ari mu bubiko i Paris akubiyemo amabanga abategetsi b’ Ubufaransa bagiranye na Leta ya Habyarimana ariko byaja no kugira uruhare rukomeye muri jenoside.

Inyandiko zifitanye isano ikomeye n’ itegurwa ndetse n’ ishyirwa mu bikorwa rya jenoside yakorewe Abatutsi ziramutse zibonetse zishobora gutuma nyakwigendera Mitterrand ajyanwa mu nkiko nubwo yapfuye.

Aya mabanga rero ashingiye ahanini ku masezerano n’ ibikorwa bya politiki ndetse n’ ibya gisirikare Ubufaransa bwagiranye n’ U Rwanda mbere na nyuma ya jenoside.

Imfashanyo mu bya gisirikare Ubufaransa bwahaye Leta ya Habyarimana hagati ya 1990 na 1994 ndetse n’ uburyo indege yahanuwe bigatuma jenoside iba ni bimwe mu bintu by’ ingenzi bishobora kuzamenyekana mu gihe inyandiko ziri mu bubiko i Elysee zashyirwa ahagaragara.

Inzobere zishinzwe kugenzura iki kibazo zikomeza kuvuga ko nubwo harimo inyandiko zatwitse n’ izindi zanyerejwe ntakabuza ko ukuri kuzashyirwa ahagaragara.

Mu mwaka w’ i 1998 ,ubwo abadepite bagenzuraga dosiye y’ U Rwanda muri Minisiteri y’ Ubutwererane inzira zari zikiri nyabagendwa aho bashoboraga kubona inyandiko zose bakeneye ariko ubu ntibigishoboka, nk’ uko tubikesha Rwandapodium.

Iyo hagize umuntu wifuza kumenya amakuru kuri izo nyandiko mu ncamake abwirwa ko ibyo ari amabanga ya Repubulika.

Umunyamateka ndetse n’ umushakashatsi kuri jenoside yakorewe Abatutsi ,Hélène Dumas asanga muri 2015, ubushake bwagaragajwe na François Hollande bwo kwerekana uruhare rwa François Mitterrand muri jenoside butaragize icyo butanga kuko bwari buhagije kugira ngo ikibyimba kimeneke.

Umunyamabanga wa Mitterand , Dominique Bertinotti, yakomeje gukomera ku mabanga ya shebuja ndetse yanga ko hagira inyandiko ijya hanze.

Umunyamakuru wahoze akorera ikinyamakuru de La Croix , Laurent Larcher, kuri ubu akaba ari umujyanama wa Perezida w’ Ubufaransa, Emmanuel Macron muri Afurika, yemeza ko hari umurimo wo gusoma no inyandiko wabaye ariko ntacyo watanze.

Perezida Nicolas Sarkozy na Balladur bakoranye politiki nabo babigize ibanga rikomeye kuko iyo baza kugira ubushake ayo mabanga yari kujya hanze.

Usibye icyizere François Hollande yari yaratanze, na Perezida Emmanuel Macron wari wiyemeje kuzakora uko ashoboye akagaragaza ukuri kuri izo nyandiko muri 2018 ubwo yakiraga Perezida w’ U Rwanda Paul Kagame muri Elysée.

Ingabo z’ Ubufaransa muri zone Turquoise, 1994

Hari dosiye nyinshi za François Mitterrand n’ abaminisitiri be zibitse mu nzego z’ iperereza nka DGSE (Direction générale de la sécurité extérieure), Minisiteri y’ ingabo ndetse n’ iy’ ubutwererane.

Abashakashatsi nka Stéphane Audoin-Rouzeau na Hélène Dumas bazi byinshi ku bufatanye bw’ Ubufaransa na Leta y’ abajenosideri begejweyo ku rutonde rw’ abagomba kwegera ububiko burimo izo nyandiko.

Naho umushakashatsi , François Graner, wanditse « Le Sabre et la machette: officiers français et génocide tutsi » avuga ko mu Bufaransa hari umuco mubi w’ abayobozi bakingirana ikibaba ndetse bakanga no gutanga amakuru.

François Graner asanga abo bategetsi bateye batyo nibo batuma politike « Françafrique », isubira inyuma kuko ituma inyungu za benshi zibangamirwa na bamwe.

Ibyo bifitanye isano n’ uburyo Ubufaransa butigeza bushaka kwerekana ukuri ku iyicwa rya Thomas Sankara muri 1987 ndetse n’ umucamanza, Bernard Borrel wiciwe muri Djibouti 1995 , aho izi dosiye zose zishyirwa mu gatebo kamwe cyiswe Secret- defense.

Prof. André Guichaoua wigishe muri Université Paris I avuga ko igihe cyari kigeze kugira ngo Leta ikuraho urujijo ku ruhare abategetsi b’ iki gihugu bagize muri jenoside yakorewe Abatutsi .

Uyu mwalimu w’ inzobere muri politiki y’ Ibiyaga Bigali akomeza kuvuga ko usibye Ubufaransa buvugwa muri iki kibazo gikomeye cya jenoside yabereye mu Rwanda ngo n’ abandi bakwiriye kwerekana uruhare bagize.

Iki kibazo cyo guhisha inyandiko mu bubiko kirareba na none Ubwongereza, Leta Zunze Ubumwe za Amerika ndetse n’ Ubuswisi kuko ibi bihugu byari bifite inyungu zikomeye mu Rwanda mbere ya 1994.

Igihugu cy’ Ubudage nicyo cyabaye ya nyuma mu byohereje ingabo mu Rwanda ndetse cyari gifite n’ ingabo i Kanombe hafi y’ aho indege yahanuriwe tariki ya 6 Mata 1994.

Ntawakwibagirwa kuvuga ko n’ ibihugu bituranye n’ U Rwanda bigomba kugira icyo bivuga kuko byigira nkaho bitabireba mu gihe hari amakuru atandukanye ava mu nzego zaho z’ iperereza.

Izindi wakunda

Bwiza.com