bwiza.com
Ahabanza » Lt. Joel Mutabazi yavugiye mu rukiko ubuzima bukakaye abayemo muri gereza
Amakuru Politiki

Lt. Joel Mutabazi yavugiye mu rukiko ubuzima bukakaye abayemo muri gereza

Lt. Joel Mutabazi wahoze mu mutwe w’ingabo zishinzwe kurinda umukuru w’igihugu, yitabye Urukiko rw’Ubujurire kugira ngo haburanishe ikirego cye cy’ubujurire yatanze, akomoza ku buzima avuga ko abayemo muri gereza afungiyemo.

Lt Mutabazi avuga ko afunzwe mu buryo bunyuranyije n’amategeko muri kasho ya gisirikare i Kanombe kandi yarakatiwe, agomba kuba afungiye ku Murindi muri gereza ya gisirikare.

Yavuze ko arwaye amaso, umuvuduko w’amaraso na Hepatite, bityo ko akeneye amadarubindi yandikiwe na muganga.

Lt Mutabazi yavuze ko afungiye muri Kasho ya gisirikare i Kanombe, mu cyo yise akumba gafite metero 1 kuri 1.8, katagira idirishya, gafite urugi rwa metero ebyiri.

Yavuze kandi ko aho afungiye kugira ngo uhagere ubanza gufungura inzugi enye kandi ko aho uca ngo umugereho hose hari za camera.

Avuga ko muri ako kumba nta bwiherero bubamo, yituma akanihagarika mu kadobo nako avuga ko kashizemo isabune.

Lt Mutabazi avuga ko agaburirwa ibishyimbo, ibigori na kawunga kandi ngo aya mafunguro ntabwo ajyanye n’uburwayi bwe, akifuza koroherezwa ngo abashe kubona ifunguro rizima.

Me Amani wunganiye Lt Mutabazi yashimangiye mu rukiko ifungwa ry’umukiriya we mu buryo bunyuranyije n’amategeko. Ashingiye ku bibazo by’uburwayi afite, yasabye ko yaburana ari hanze, agafungurwa by’agateganyo.

Mu Ukwakira 2014, nibwo Lt Joel Mutabazi yahamijwe ibyaha birimo gutoroka igisirikare, gutunga intwaro n’amasasu mu buryo bunyuranyije n’amategeko, gukwiza impuha zigamije kwangisha leta y’u Rwanda mu mahanga, ubugambanyi, kugirira nabi Umukuru w’Igihugu, ahanishwa igifungo cya burundu no kwamburwa impeta za gisirikare.

Lt Mutabazi yajuririye igihano yakatiwe n’urukiko avuga ko hatakurikijwe itangwa ry’ibirego, ko yaburanishijwe ku gahato ndetse n’abatangabuhamya atemera. Gusa ubushinjacyaha bwo bukavuga ko impamvu ze z’ubujurire zidafite ishingiro.

Lt Mutabazi wagejejwe mu rukiko rw’Ubujurire kuri uyu wa Kabiri tariki ya 11 Kamena 2019, umwunganira yavuze ko uburwayi bwe bumusaba kubonana n’abandi bakaganira agaseka, ariko ko we afunzwe wenyine.

Abandi bari mu kirego kimwe na Joel Mutabazi cyo gukorana na FDLR na RNC, barimo Kalisa Innocent, Nibishaka Bisangwa Cyprien, Ngabonziza JMV, Ndayambaje Aminadabu, Maniriho Barthazar na Nizeyimana Pelagije, bemeye ibyaha baregwa, bavuga ko biteguye kuvugisha ukuri kose, bagasaba imbabazi, urukiko rukaba rwabagabanyiriza ibihano bakaba bafungwa imyaka itanu. Urukiko rwavuze ko babiri mu bari bajuriye baretse ubujurire, abo ni Muhirwe Simon Pierre na Musabe Anselme.

 

 

 

 

 

Izindi wakunda

Bwiza.com
error: Alert: Ntabwo byemewe!!