bwiza.com
Ahabanza » Icyorezo cya Ebola cyageze muri Uganda
Ubuzima

Icyorezo cya Ebola cyageze muri Uganda

 

Ishami ry’umuryango w’Abibumbye ryita ku buzima OMS na minisiteri y’ubuzima muri Uganda, batangaje ko icyorezo cya Ebola cyamaze kugera muri iki gihugu mu karere ka Kasese.

Umwana w’umuhungu w’imyaka itanu y’amavuko ukomoka mu karere ka Kasese niwe byemejwe ko yanduye Ebola nyuma yo kumukorera isuzuma. Uyu niwe muntu wa mbere byemejwe ko yanduye Ebola muri iki gihugu.

Amakuru avuga ko uyu mwana yambutse umupaka ku cyumweru tariki ya 9 Kanama 2019 ajya muri Congo , aho yari kumwe n’abo mu muryango we. Nyuma yo kugaruka muri Uganda yatangiye kugaragaza bimwe mu bimenyetso bya Ebola birimo kuruka amaraso bahita bamujyana kwa muganga kugira ngo asuzumwe.

Ku wa kabiri tariki ya 11 Kanama nibwo ikigo cya Uganda gishinzwe gupima za virusi cyemeje ko uyu mwana yanduye Ebola mbere y’uko bitangazwa na minisiteri y’ubuzima y’iki gihugu. Abandi bantu umunani bari bari kumwe n’uwo mwana nabo bakaba bari gukurikiranwa.

Mu itangazo OMS yasohoye ifatanyije na minisiteri y’ubuzima, rivuga ko impande zombie zohereje itsinda ry’abatabazi ryihuse kugira ngo bafashe abandi bafite ibyago byo kwandura iyi ndwara.

Minisiteri y’ubuzima muri Uganda ikaba isaba abaturage ba Uganda gukorana na n’inzego zishinzwe abinjira n’abasohoka, inzego z’umutekano, abashinzwe ubuzima kugira ngo birinde ko Ebola yakwirakwira hirya no hino.

Iri tangazo rikomeza rivuga ko Uganda isanzwe yarakingiye Ebola abakozi bakora mu bikorwa by’ubuvuzi bagera kuri 4700. Biteganijwe ko kuwa gatanu tariki ya 14 Kanama 2019 bazatangira gukingira abandi bakozi bakora muri uru rwego ndetse n’abaturage bagaragaza bimwe mu bimenyetso bya Ebola mu rwego rwo gukumira icyi cyorezo.

BBC dukesha iyi nkuru, ivuga ko Ebola imaze guhitana abarenga 1400 muri Congo naho abarenga 2000 bamaze kwandura Ebola mu mezi icumi ashize ihageze.

Nkurunziza Viateur@ Bwiza.com

Izindi wakunda

Bwiza.com