bwiza.com
Ahabanza » Kuba abafite ubushobozi bajyana abana babo kwiga hanze, nta kibazo mbibonamo- Ingabire Immaculée
Amakuru Politiki

Kuba abafite ubushobozi bajyana abana babo kwiga hanze, nta kibazo mbibonamo- Ingabire Immaculée

Ni kenshi abantu benshi bakunze kwibaza ku bayobozi bakomeye mu gihugu cyangwa se abandi bifite, bajyana abana babo kwiga mu mahanga rimwe na rimwe bakiri bato, mu gihe bivugwa ko mu Rwanda ireme ry’uburezi rwazamutse. Ku bwa Ingabire, avuga ko nta kibazo abibonamo.

Ingabire Marie Immaculée ni impirimbanyi mu kurwanya ruswa n’akarengane akaba n’Umuyobozi wa Transparence International Rwanda, by’umwihariko akaba akunze kugaragara ku mbuga nkoranyambaga rimwe na rimwe atanga ibitekerezo ku makuru agezweho mu gihugu, ashima cyangwa anenga.

Ingabire agendeye ku nkuru ya kimwe mu binyamakuru byo mu Rwanda yavugaga ku kiganiro abanyamakuru bagiranye na bamwe mu bayobozi ba za kaminuza zo mu Rwanda, kuri gahunda igamije gukangurira abanyamahanga kwiga mu Rwanda (Study in Rwanda). ku rukuta rwe rwa Twitter, yashyizeho umutwe wayo wagiraga uti “Ireme ry’uburezi ryibanzweho muri gahunda igamije kureshya abanyamahanga mu burezi bw’u Rwanda’ nibwo bamwe bahereye bavuga ko umunsi abakomeye bazajya bashyira abana babo mu mashuri yo mu Rwanda rizaba rihagaze neza.

Nizeyimana Bonaventure, yahise atanga igitekerezo cye kuri iyi ngingo agira ati “Ibi tuzabyemera ari uko n’abana b’abayobozi nabo batakijya kwiga iyo bigwa mu mahanga bakiga muri ayo mashuri muvuga ko ireme ry’ uburezi ryazamutse”.

Nsengumuremyi na we ati “Ushobora gusanga n’uyu uri gukora ubu bukangurambaga abana be nta n’umwe uhiga”.

Ingabire we abona nta kibazo kirimo kuba abana b’abakomeye bajyanwa kwiga hanze mu gihe bivugwa ko ireme ry’uburezi mu Rwanda ryazamutse mu myaka 25 ishize.

Ati “Kuba abafite ubushobozi bajyana abana babo kwiga hanze, ubwabyo nta kibazo mbibonamo. Ikibazo kiri mu kwemeza ko dufite ibyo mu by’ukuri tudafite kandi tuzi neza ko tutabifite”.

Umuyobozi wungirije wa Kaminuza ya Kigali, Prof. Abraham Waithima, avuga ko atemeranywa n’abavuga ko mu Rwanda nta reme ry’uburezi rihari, agira ati “Hari ikoranabuhanga rigenda rivumburwa n’abize mu Rwanda. Hari abize mu Rwanda bajya gukomereza hanze mu byiciro bihanitse bakaba aba mbere, ntiwavuga rero ko aho yize nta reme ry’uburezi rihari”.

Umuyobozi wungirije wa kaminiza y’ubukungu n’ubukerarugendo (UTB), Prof. Tombola Gustave, na we avuga ko ireme ry’uburezi mu Rwanda rihari, ko urebye ibyagezweho mu burezi bw’u Rwanda mu myaka 25 ishize, ari byinshi kandi byiza.

Izindi wakunda

Bwiza.com