bwiza.com
Ahabanza » Perezida Museveni yagize Maj. Gen. James Birungi umuyobozi mushya w’umutwe ushinzwe kumurinda
Amakuru Politiki

Perezida Museveni yagize Maj. Gen. James Birungi umuyobozi mushya w’umutwe ushinzwe kumurinda

Perezida Yoweri Museveni wa Uganda, akaba n’Umugaba w’Ikirenga w’Ingabo za Uganda, yagize Maj. Gen. James Birungi (ibumoso ku ifoto), umuyobozi mushya w’umutwe wa Special Forces Command (SFC) ushinzwe kurinda umukuru w’igihugu n’abandi bayobozi asimbuye Maj. Gen. Don Nabasa (uri iburyo ku ifoto).

Maj. Gen. James Birungi yari asanzwe ari umugaba mukuru w’ingabo zirwanira mu kirere nk’uko iyi nkuru dukesha Chimpreports ikomeza ivuga.

Ibi byatangajwe kuri uyu wa kabiri ninjoro mu butumwa bwanyujijwe kuri radio y’igihugu bwohererejwe imitwe yose y’ingabo.

Umuvugizi w’igisirikare cya Uganda, Brig. Richard Karemire ntiyabonetse ngo agire byinshi atangaza kuri izi mpinduka nk’uko iyi nkuru ivuga.

Gusa, umwe mu bayobozi yavuze ko Nabasa yoherejwe mu Bushinwa mu ishuri ry’intambara ryitwa China’s War College ngo arusheho gukarishya ubumenyi.

Maj. Gen. Nabasa yari yabaye umuyobozi wa SFC mu 2017 asimbuye kuri uyu mwanya umuhungu wa Perezida Museveni, Lt. Gen. Muhoozi Kainerugaba.

Maj. Gen. James Birungi yari umuyobozi wa Air Forces

Mu myaka yabanje, Nabasa yagiye ayobora imitwe inyuranye ya UPDF, uhereye kuri platoon y’ingabo zirwanira ku butaka mu 1999, aba n’umuyobozi w’umutwe ukoresha ibifaru mu 2000, aba umuyobozi ushinzwe ibikorwa bya za brigade kuva mu 2004 kugeza mu 2005.

Yayoboye umutwe wose ukoresha ibifaru hagati ya 2000 na 2007, aba komanda wa batayo kuva mu 2008 kugeza mu 2012, anaba komanda w’itsinda ritavuzwe kuva mu 2012 kugeza mu 2016.

Kuva muri uyu mwaka kugeza ashyizwe ku mwanya yari ariho, yari Umuyobozi Wungirije wa SFC. Hagati aho, Perezida Museveni ntaragena uzasimbura Gen. James Birungi ku buyobozi bw’ingabo zirwanira mu kirere (Air Forces).

 

Izindi wakunda

Bwiza.com