bwiza.com
Ahabanza » Rusizi: Umupadiri Nzamurambaho n’umuryango we bashimiye umuryango wabarokoye muri Jenoside
Amakuru Kwibuka

Rusizi: Umupadiri Nzamurambaho n’umuryango we bashimiye umuryango wabarokoye muri Jenoside

Padiri Nzamurambaho Achile( hagati wambaye ikoti ryera) n'umuryango we bashyikiriza Karemera Gaspard ( wambaye karavati itukura) inka y'ishimwe.

Padiri Nzamurambaho Achile wari ufite imyaka 11 gusa muri Jenoside yakorewe abatutsi,ubu akaba ari umubitsi wungirije wa seminari nkuru ya Nyakibanda, we n’umuryango we barashimiye ku mugaragaro umuryango wa Fatakobije Félix bari baturanye mu cyari segiteri Kiranga ya Komini Gishoma, Perefegitura ya Cyangugu, ubu ni mu murenge wa Nzahaha mu karere ka Rusizi wabarokoye bose uko bari 10 ntihagire n’umwe wicwa.

Aganira na Bwiza.com, Padiri Nzamurambaho Achile uzwi cyane mu bikorwa by’ubumwe n’ubwiyunge yashyizemo imbaraga nyinshi ubwo yari padiri mukuru wa paruwasi gatulika ya Ntendezi mu murenge wa Ruharambuga, mu karere ka Nyamasheke,yavuze ko bari abana 8 bavukanaga, ubwo Jenoside yakorewe abatutsi yatangiraga muri Mata 1994, bahunga batatanye, ariko abana b’umusaza Fatakobije Félix bari bayobowe na mukuru wabo Karemera Gaspard babashakisha aho bari bose na se na nyina, babashakira inzu babamo babarindiramo, se witwaga Ndaruhutse Jean Crysostome na mukuru we uyu karemera abasha kubahungishiriza muri Kongo abandi barabagumana kugeza barokotse bose nta n’umwe wishwe.

Padiri Nzamurambaho yakomeje avuga ko nyuma yo kubona ko aba baturanyi babo batatatiye igihango bari baragiranye dore ko ngo kuva na kera imiryango yombi yari inshuti, nyuma y’uko se umubyara yitabiye imana nyuma ya Jenoside azize uburwayi busanzwe n’uwo musaza Fatakobije Félix akitaba Imana, yaje gusanga akwiye gukoranya umuryango we usigaye ukitura umuryango wabarokoye muri ibyo bihe byari bikaze gutyo,ubaha inka y’ishimwe.

Ati’’ imiryango yombi yari isanzwe ari inshuti magara muri Jenoside batwereka ko badukunda koko baraturinda mu buryo bwose bushoboka, bakura bamwe muri twe aho twari twihishe kwa marume badushakira inzu tubamo batugabuririramo,baturindiramo, papa na mukuru wanjye babashakira uburyo bwo kwambika bagera muri Kongo nubwo byari bikomeye cyane,twese turarokoka ,dusanga dukwiye gushimira uriya muryango nubwo tutabona icyo tuwuha gihwanye n’ibyo wadukoreye ariko uriya mukuru muri bo Karemera Gaspard twamuhaye inka ngo uko ibyaye ajye aziturira barumuna be kuko bose bitanze ngo tubeho.’’

Padiri Nzamurambaho Achile( hagati wambaye ikoti ryera) n’umuryango we bashyikiriza Karemera Gaspard ( wambaye karavati itukura) inka y’ishimwe.

Banashimira cyane uyu Karemera ko ubwo Jenoside yakorewe abatutsi yatangiraga, yafashe abasore b’abahutu n’abatutsi abategeka kutagira uwo bemerera kuvogera selile yabo ya Kibirezi koko barwanya interahamwe zose zashakaga kubinjirana ngo zice abatutsi bari bahahungiye, nubwo zaje guhuruza ibitero bya Yusufu Munyakazi mu Bugarama bikabaganza,ariko ngo ubwo butwari iyo bugirwa na benshi n’abari kurokoka bari kuba benshi cyane.

Karemera Gaspard uvuga ko we na barumuna be bashoboye kurokora abatutsi barenga 30 barimo n’uriya muryango wose w’abantu 10,nyuma akaza kugirwa konseye ya segiteri Kiranga,ubu akaba ari umurinzi w’igihango ku rwego rw’umurenge wa Nzahaha, ashimira uyu muryango wa padiri Achile ubahaye iyi nka nubwo ngo ubwo bawurwanagaho ngo ubeho atari yo bakoreraga ahubwo bwari ubumuntu n’umubano ukomeye bari bafitanye,akishimira ko wakomeje kandi utazashira,aboneraho no kuvuga icyamubabaje kurusha ibindi muri ibyo bihe.

Ati’’ kugira uwo urokora kwari ukwemera gupfa ariko nababajwe cyane n’umuturanyi twari twasezeranye kwambutsa abatutsi twari duhishe bakajya muri Kongo,nyamara tugeze iwe mugicuku,tumukomanze tumubwira ko ari twe,nk’aho yadukinguriye atuvugiriza induru ibitero birahurura,kubw’amahirwe turabicika,ndongera mbamarana ibindi byumweru 3 mu nzu mbona kubambutsa ariko uriya muturanyi wacu upfuye mu minsi ishize yaraduhemukiye cyane.’’

Umunyamabanga nshingwabikorwa w’uyu murenge Rwango Jean de Dieu,yashimye iki gikorwa anasaba n’abandi ko bacyigana kuko ari kimwe mu bikorwa by’ubumwe n’ubwiyunge bikomeje ngukataza muri uyu murenge, anasaba abagize uruhare muri Jenoside gutera intambwe yo gusaba imbabazi abo bahemukiye nk’uko padiri Ubald Rugirangoga wabitangije muri paruwasi yabo ya Mushaka ahora abibasaba,cyane cyane ko abo bahemukiye bo bahora biteguye kubababarira.

Imiryango yombi yishimira intambwe ubumwe n’ubwiyunge bugezeho muri uyu murenge

Izindi wakunda

Bwiza.com