bwiza.com
Ahabanza » Rwanda uteye neza kandi ukita neza
Amakuru Amateka Amateka n'umuco

Rwanda uteye neza kandi ukita neza

Naraye ndose u Rwanda ndaza umutima i rwanda

Nkoze ku bahanzi ngo bamvune nkivuga

Babyiganira kuza mu mvugo inavumera

Ivumbitse imvumbara isumba ikivumvuli

Imvano iva ku Muvumba uhuza imvano nyinshi.

 

Inzira y’uru rugendo ihera amajyaruguru

Igakomereza ahandi mu mpugu z’i Gasabo

Nturutse kuri Gasabo iteganye na Rutunga

Nshyama ngana i Gasagara ndeba ku Bwimiyange

Nciye kuri Gicaca nteganye na Ruganda

Manuka Umunini wose ndeba Rudakabukirwa

Nanga guca Rugarama ngw’inkuru ibonereho Kibara

 

Ntumbiriye ku Gisozi nibutse inkuru zaho

Nsanze ariho yaguye nyiri ijana ry’ikirenga

Iri ritagira imisago mpitamo iya Bweramvura

kwa Nkotanyi cyane wagenze igihugu cyose

Akaba se wa Rutarindwa bombi we na Muhigirwa

Reka nkomeze urugendo nitahire i Jabana

Nkore kw’ijuru ryaho kuri Jari na Rubingo

Ntere ingingimira abo kuri Ngiryi na Rutongo

Manuke iya Nyakabungo ndeba na Nyamitanga

 

Reka ntire na Kavuna, Kavuna Karyankuna

Sinaniwe ndashonje kandi nshonje mpishiwe

Nambuke Nyabarongo nciye iyo mu Muhanda

Nambuke Nyaruteja ngende Kibaya yose

Nomokere i Rubumba ngende Akavuza kose

Mpepere abo ku Ruyenzi nitahire Nkoto

Nyure i Sheli na Butera nteze kuri Gihinga

kwa Bene Kazenga kw’Ijuru rya Kamonyi

 

Inkuru igere ku Muganza wa Runda na Gihara

Ko ngenda ngaba ibikingi nkikiye ijuru ryabo

Bansange ku Kamonyi ijabiro kwa Mazimpaka

Mbamurikire u Rwanda kandi ndubihere

 

Mpere amajyaruguru nerekeza i Burera

Uwa mbere muhe Bungwe yongereho Nyabyondo

Nashyiraho gushima mwongere na Kinihira

Nkomeze nkate ibikingi Tumba ibone umutware

Aturane na Gifumba mwongere na Bushenya

Nantaramira neza mwongereho na Butaro

Mutuze na Kindoyi muhete mu Rubonobono

Ature na Nyamicucu acumbikire abagenzi

Nabura amazimano abatembereze Rusumo

Musongati ibataramire cyangwa abo mu Gasiza

 

Nibamanuka mu Cyeru barare iya Ndongozi

Bicare mu Gahunga batekere n’agatabi

Bibuke ingabo yaho yazengereje abazungu

Bigize Rwivanga bagamije akarande

Induru ayigira ndende inkuru mbi imutanga imbere

kwa bene Rugigana u Rwanda arugira indahiro.

 

Ubwo nkicaye mu nteko kw’Ijuru rya Kamonyi

kwa Nyamugirubutangwa wizihiye ingabo

Nkitwaje ubwo bugirwa nitegeye u Rwanda

Nkiri mu majyaruguru nkomeze ngabe ibikingi

Ningera kuri Nemba ndeba Nyamugali imbere

Nyigabire umukunzi ujya ankeza kubarusha

I Rugarama na Cyahi nongereho Gafumba

 

N’undi uje amuherekeje mwihere Mucaca

nayo Rukandabyuma nyigabire Umutware

Uzatwara abo bose agatura Kilibata

Ningera mu Busengo ndeba Rugendabari

Indirikirwa zaho nzihe ho igikingi

Rwankuba na Nyarubuye nongereho na Coko

Manuka iyo kuri Janja aho kuri Misiyoni

Wongereho Gashyamba ukurikize Buhimbi.

 

Uw’intwari kubarusha akagira n’amakenga

Ati nyihera Rulindo n’utundi dushamikiyeho

Umpaye ahagana i Tumba ukongeraho Nyabirori

Cyangwa se na Shyorongi ireba iya Nyamirembe

Bugaragara na Shyorongi wometseho Kijabagwe

Naha abanya Kirenge kwigira Kigarama

Rukozo na Kadendegeri twigira iya Bwimo

Ntarabana na Rusasa isanganira abatware

Baturutse i Mugote bigira i Muyange

 

Nawe nyina wabo waruciye akarumira

ati nsanzwe ndi Nyampinga nigabaniye

Masoro ukampeta Shengampuli

na Kisaro na Kinihira ukandinda abazungu

bigize rwivanga nkicara mu Marembo

na Rebero imbere yanjye nkibariza Batunzi

impamvu iyoboka itinze ituranye na Ndorandi

Ubwo utanga utazigama nyongera na Cyinzuzi

nongereho Rudogo mperaho mbona umwanya

wo kukwaka Migendezo nsatira Remera

 

Ntawima Umwari usanga afite gahunda

Mperako ndamuhimba mwongeraho na Ndarage

Nsoreza Budakiranya nti ubwo ukunda amatunda

Nshyiraho na Nyirangarama yirimire agasenda

ko gusenda amagambo

Ukunde baguhe impundu zanaga aho hose

za Butangampundu, Base na Cyohoha

 

Bakabamo umuhungu usanzwe afite amabinga

wikundira n’uturayi duturuka Amajyaruguru

Ati Rugabishabirenge ko ndeba ugaba ibikingi

Ntugere ku Birunga nkwatseho n’agapande

Nkigira mu Musanze ahegereye iya Busogo

Nkongeraho Gisesero na Nyagisozi yayo

Namanuka mu Cyuve ureba n’i Bukinanyana

Rwebeya yo mu cyayi twohereza i Mahanga

Kikazana amadovise agatunga uru Rwanda

 

Nti ubwo uzana amadovize twicara dutegereje

jyanaho na Gataraga wongereho Rubindi

Ujyane i Kinigi yose yuzuyemo ibikoko

Bikurura Abazungu bazana amadovize

Gabana Kabatwa yose ushyireho Rugendabari

Itwarire Nyakinama inama zo mu Murera

Zibere mu rugo iwawe zishyure ibifaranga

Twuzuze mu ma Banki twubake amahoteri

Ducumbikire abazungu bazane amadovize

 

Shyiraho abahanga bazi gutekereza bazi inkuru

Z’iwacu uhereye Nyamagumba ureba igihu cyose

Izo ndushyi z’abazungu zishyure ibifaranga

Twikorere imishinga iteza imbere uru Rwanda.

Ushaka no kuruhuka avuye iyo mu Birunga

Amanuke agane Remera hejuru ya Ruhondo

Arebe ibiyaga byacu bitera amahumbezi

Yirukana umunaniro akuye iyo ku Birunga

Yishyure ibifaranga na Padiri abona ihaho.

 

Ba Diaspora iyo muri hose, mbakumbuze iwanyu,

mbatakire iwacu, utabonamo iwabo,

yihangane, umusibo ni ejo ejobundi azibona yishime,

n’undi wese ubyifuza anyunganire dutake u Rwanda rwo gahoraho ingoma ibihumbi.

Ndangize nduririmba, ubishobora anyakire nk’utagira iyo avuka

Nkumbuye ng’i Nduga yaaacu imwe y’Akamaliza n’aka Mayanja ayibambe

Nkumbuye ng’i Nduga yaaacu imwe Mbuye n’Ururumanza ayibambe

Nkumbuye u Buganza bwacu bumwe bwa Duha ndora Rutooma ayi bambe

Nkumbuye Buganza y’eeepfo imwe ya Kabare na Mukarange ayibambe

Nkumbuye i Gisaka cyaaacu kimwe cya Rukongi yo mi Mirenge ayibambe

Nkumbuye i Gihunya yaaacu imwe ya Cyimbazi ndora Bisenga ayibambe

Nkumbuye i Migongo yaaacu imwe ya Gatore na Nyakarambi ayibambe

Nkumbuye Umutara waaaacu umwe wa Gituza na Nyagahaaanga ayibambe

Nkumbuye urukiga rwaaacu rumwe rwa Yaramba ndora Miyove ayibambe

Nkumbuye Umurera waaacu umwe wa Kidaho ndora Busengo ayibambe

Nkumbuye Ubugoyi bwacu bumwe bwa Nyundo na Busasamana ayibambe

Nkumbuye Ubushyiru bwaaacu bumwe bwa Gasiza na Kibihekane ayibambe

Nkumbuye Kingongo yaaacu imwe ya Muhororo na Bweramana ayibambe

Nkumbuye na Nyanza yaaacu imwe ya Cyaratsi cy’Abakamyi ayibambe

Nkumbuye na Nyanza yaaacu imwe ya Mwima na Mushirarungu ayibambe

Nkumbuye Bwanamukali imwe ya Mbazi na Mutiwingoma ayibambe

Nkumbuye na Nyaruguru imwe ya Nkima na Bwangakinyoma ayibambe

Nkumbuye Buhanga yaaacu imwe y’Umukindo wa Makwaza ayibambe

Nkumbuye Busanza yaaaacu imwe ya Mpanda na Nziranziza ayibambe

Nkumbuye Kaduha yaaacu imwe imwe ya Suti ndora Kavumu ayibambe

Nkumbuye Ikinyaga cyaaacu kimwe cya Bugarama na Nyakana ayibambe

Nkumbuye Ikinyaga cyaaacu kimwe ya Shagasha na Gasharu ayibambe

Nkumbuye Ikinyaga cyacu kimwe cya Gikundamvura na Mpinga ayibambe

Nkumbuye mwe mwese bene Rugira

Mutunge Mutunganirwe

Ntagengwa Servil Omar

2019 Beligique

 

 

Izindi wakunda

Bwiza.com
error: Alert: Ntabwo byemewe!!