bwiza.com
Amakuru Politiki

Igisirikare cya Uganda kivuganye Umunyekongo nyuma yo gukozanyaho

Umunyekongo w’imyaka 28 kuri uyu wa gatatu yiciwe mu kurasana n’ingabo za Uganda mu bujura bwaberaga mu Karere ka Kisoro.

Uyu munyekongo wishwe biravugwa ko yitwa Louise Louis Nambajimana utuye Busanza, muri Kivu y’Amajyaruguru muri Repubulika iharanira Demokarasi ya Congo.

Uyu yarashwe n’abasirikare ba Uganda baturuka ahitwa Kanombe, mu Mudugudu wa Giharo, muri Muramba ahagana saa 12h30 z’amanywa kuri uyu wa gatatu ushize.

Francis Nzabona, Umuyobozi wa Muramba, avuga ko Nambajimana wari ufite imbunda, yashinze bariyeri itemewe ahagana saa tatu z’umugoroba agatangira kwambura abahisi n’abagenzi.

Nzabona akavuga ko abambuwe babimenyesheje komanda w’ingabo ziri kanombe wahise wohereza abasirikare muri ako gace ngo bate muri yombi ukekwa nk’uko tubikesha Chimpreports.

Peter Mugisha, umuyobozi w’akarere ka Kisoro, avuga ko uyu Nambajimana yanze ko bamuta muri yombi agahangana n’abo basirikare akabarasaho bigatuma umwe muri bo amusubiza mu rwego rwo kwirwanaho akamurasa akamwica.

Mugisha akomeza avuga ko hafashwe imbunda ya SMG irimo amasasu 12 yari ifitwe na Nambajimana, ngo Uganda ikaba iri kuvugana na Repubulika iharanira Demokarasi ya Congo ngo umurambo we kuri ubu uri mu buruhukiro bw’ibitaro bya Kisoro ucyurwe.

 

 

Izindi wakunda

Bwiza.com