bwiza.com
Amakuru mu Rwanda

Musanze: Imiryango isaga itanu yazonzwe n’imbaragasa kubera kurara mu byatsi

Abaturage bo mu Kagari ka Mudakama, Umurenge wa Gataraga mu karere ka Musanze, bavuga ko barara mu byatsi kubera amikoro make, bityo ko batoroherwa n’imbaragasa zirara zibarya.

Ni imiryango irenga itanu, bose bavuga ko bari mu kiciro cya mbere cy’ubudehe, bamwe n’ubwo barara ku byatsi cyangwa se amababi y’ibiti, bavuga ko biyorosa inzitiramibu.

Nyirakadari Floride, umwe muri aba baturage, avuga ko amaze imyaka itandatu aryama kuri ibi byatsi, agira ati “Yego ndara ku byatsi, nibyo ndaramo nkiyorosa Supaneti, birandya pe [Imbaragasa], nkarwara shishikara nkishima, nkarwara n’igisebe kubera kwishima”.

Abatuye muri aka gace baganiye na Flash Tv, bavuga ko atari uyu Floride urara ku byatsi gusa, ahubwo ko hari n’indi miryango igera muri ine bahuje ikibazo.

Uyu we avuga ko abiraraho, ariko ko bimutera ipfunwe mu bandi, ati “Njyewe nafashe ibyatsi nshyiraho ikirago nkashyiraho n’akaringiti nkiyorosa, ingaruka byangizeho ni uko nasanze utwenda aho natumanitse imbaragasa zagiyemo, hariho amaraso y’umutuku, nkabura uko nca mu bantu kubera bya byatsi nisasiye”.

Umunyamabanga w’Umurenge wa Gataraga, Sebashatsi Gasasira Jean Paul, avuga ko abaturage bo muri uyu murenge ayoboye, bose bari muri gahunda ya Sasaneza.

Ati “Gahunda ya sasaneza iba muri buri mudugudu, tumaze igihe tubibakangurira kurwanya umwanda, buri muturage uwo ari we wese ari muri Gahunda ya Sasaneza, kandi nibwo buryo tugenda dukemura ikibazo cy’isaso aho barara”.

N’ubwo uyu muyobozi avuga ibi, Nyirakadari Floride avuga ko afashijwe agahabwa matela, ikiringiti n’amashuka, umwanda yaca ukubiri nawo.

Izindi wakunda

Bwiza.com