bwiza.com
Ahabanza » Nyamasheke: SACCO ya Nyabitekeri yanyerejwemo asaga Miliyoni 84
Amakuru Politiki

Nyamasheke: SACCO ya Nyabitekeri yanyerejwemo asaga Miliyoni 84

?

Miliyoni zirenga 84 z’amanyarwanda ni yo mafaranga amaze kumenyekana yanyerejwe n’uwari umucungamutungo wa Nyabitekeri SACCO, Gombaniro Justin, uwari  umubaruramari Nahayo Kosima n’abandi bakozi Batatu bayikoragamo muri 2016, bose bakaba barirukanywe,uyu wari umubaruramari akaba ari mu maboko y’ubutabera na ho uwari umucungamutungo  Gombaniro Justin  agishakishwa  ngo na we ayaryozwe,a banyamuryango bayo  bagasaba ko  umutungo wabo ugaruzwa.

Aya mafaranga 84.682.327 nk’uko bigaragazwa na raporo y’ubugenzuzi yakozwe umwaka ushize  n’ikigo cy’igihugu cy’amakoperative( RCA)  ikagezwa ku buyobozi bushya bw’iyi SACCO muri Gicurasi uyu mwaka,ngo abari abakozi bose uko ari 5 b’iyi SACCO kugeza muri 2016 barayabazwa,bakaba bose  baranirukanywe,akaba ngo yaranyerejwe muri ubu buryo:

Uwari umucungamutungo Gombaniro Justin ku giti cye abazwa amafaranga 11.846.449,aho bigaragara ko yagiye atwarwa mu buryo bunyuranye arimo ngo ayo yagiye avuga ko agiye kugura ibikoresho by’akazi ntibigaragare, ayagiye ashyirwa kuri konti za VUP bikagaragara ko yahawe abanyamuryango nk’inguzanyo,bo bakavuga ko atigeze abageraho,ayagiye agera kuri konti za VUP ariko atagaragara aho yinjiye ava,hakaba n’amadolari yagiye yinjira muri SACCO kandi SACCO zitemerewe kwakira amadolari,uburyo yasohotsemo n’aho yagiye ntibigaragazwe.

Uwari umubaruramari Nahayo Kosima we abazwa ku giti cye 20.393.787 na yo yagiye asohoka mu buryo budafututse, harimo ayasohokaga ibyo yaguzwemo ntibigaragare,n’ayavugwaga ko ari aya VUP kandi ari baringa.

Aba bombi kandi ngo bahurira ku yandi 52.442.091 yaburiye mu bitabo by’ibaruramari byaburiwe irengero kandi byari mu nshingano zabo bombi byakoreshwaga n’agashami  k’iyi SACCO kari mu kagari ka Ntango,arabura n’ibitabo biburirwa irengero.

Hari kandi amafaranga abazwa abandi bakozi 3 ngo y’imishahara aba bakozi bose baje kwiyongerera  abanyamuryango batabizi, ku malisiti y’ihembwa hakagaragara imishahara isanzwe ariko ku makonti yabo hariho imishahara y’ikirenga.

Aba ngo ni uwitwa Niyokwizerwa Angélique wari ushinzwe inguzanyo yabazawaga 338.660, Nyiraneza Faïna  wari umucungasanduka wigeze no gucunga amafishi akabazwa 268.800,kuri we hakaniyongerayo agera ku 100.000 yakuwe kuri konti y’umukiliya biza kugaragara ko atari nyirayo wayabikuje, arayishyura binamuviramo  kwirukanwa,hakaba na Mukandayisabye Xavérine wabazweho ibihombo  byo ku isanduka bingana na 1.904.028 yagiye ahomba ntayabazwe,icyakora uyu we ngo yarayishyuye, akaba  yaranishyuzwaga andi 59.500 ajyanye n’iyo mishahara y’umurengera bihaga na yo ayishyura nyuma y’isohoka ry’iyi raporo.

Ibi kandi ngo babikoraga bajijisha mu maraporo anyuranye ko SACCO yunguka neza nta kibazo,aho  iya 2015 igaragaza ko bari bungutse arenga miliyoni 36 kandi barakoreraga mu gihombo ariko icyaje kubabaza cyane abanyamuryango,ngo ni uko muri 2017 uyu mucungamutungo n’umubaruramari batawe muri yombi bakarekurwa mu buryo budasobanutse, n’abagenzuzi ba RCA babanje gukora raporo kuri iri nyereza bayikora mu buryo budasobanutse,ari bwo akarere kasabaga ko ikorwa bundi bushya akaba ari iyi yasohotse mu mpera z’umwaka ushize,yanabaye intandaro yo kongera gutabwa muri yombi k’uriya  wari mubaruramari Nahayo Kosima n’ishakishwa ry’uwari umucungamutungo.

Aganira na Bwiza.com,umucungamutungo mushya w’iyi SACCO  Dushimimana François uyikoramo kuva mu ntangiriro za 2016 yagize ati’’ iri nyerezwa ry’umutungo ryatugizeho ingaruka zikomeye cyane kuko ubwo izindi SACCO zikora zunguka twe n’ayo twungutse agenda aziba kiriya cyuho ku buryo ubu tugifite igihombo cya miliyoni zirenga 32 tugenda turwana na cyo, tugashima akarere katurwanyeho nyuma y’ibi byose kakaduha 47.000.000 zidufasha ku nguzanyo ya VUP,tukagira ikibazo gusa cy’ayo twafashe mu kigenga cy’ingwate BDF twungukira 12% mu gihe abanyamuryango tuyaguza batwungukira 15% bikatugora.’’

Yasabye akarere kubafasha kubona inguzanyo bakwishyura ku nyungu nto kugira ngo abaturage bayagurizwa babe benshi kandi na SACCO yunguke neza kiriya gihombo kivemo itangire gukora yunguka,yizeza abanyamuryango imicungire inoze y’umutungo wabo,cyane cyane ko ngo ntawigeze abura amafaranga ye nubwo byari bimeze bityo

Tuyisenge Valerie,umwe mu banyamuryango bayo ati’’ ariya ni amafaranga yacu turasaba ubutabera gukora akazi kabwo akagaruzwa kuko baraduhemukiye cyane. Gusa ntibyaduciye intege kuko n’uwari ushinzwe inguzanyo  Niyokwizerwa Angélique unafite amafaranga abazwa yari yakomeje kwihanganirwa arakora ariko kubera gukomeza amakosa ye  n’amananiza mu kuduha inguzanyo,muminsi ishize twaramusezereye turazihabwa  neza nta kibazo,cyane cyane ko abakozi bahari ubu bose ari abashyashya gusa.

Aya mafaranga ngo yarengaga uriya mubare uvugwa,amaze kugaruzwa akaba ari 1.963.530 nk’uko bivugwa n’umucungamutungo wayo Dushimimana François,umuyobozi w’aka karere Kamari Aimé Fabien akavuga ko bategereje ibizava mu butabera ngo ayanyerejwe yose agaruzwe, hazarebe ikindi cyakorwa ku bufatanye bw’akarere,BNR,BRD,RCA n’izindi nararibonye mu micungire y’ibigo by’imari,akizeza ko ubu umutungo w’abanyamuryango ucunzwe neza nta rindi nyereza ryakongera kuhaba.

Izindi wakunda

Bwiza.com
error: Alert: Ntabwo byemewe!!