bwiza.com
Ahabanza » Nta gihugu cyakwikemurira ibibazo by’iterabwoba cyonyine- IGP Dan Munyuza
Amakuru Politiki

Nta gihugu cyakwikemurira ibibazo by’iterabwoba cyonyine- IGP Dan Munyuza

Umuyobozi wa Polisi y’u Rwanda, IGP Dan Munyuza avuga ko ubufatanye ari ngombwa mu guhangana n’ibyaha bimwe na bimwe bishobora kwambukiranya imipaka. Avuga ko nk’ibibazo by’iterabwoba nta gihugu cyabyikemurira cyonyine hatabayeho ubufatanye.

Mu nama ngarukamwaka ku mahoro n’umutekano yabereye mu ishuri rukuru rya Polisi mu Karere ka Musanze, Intara y’Amajyaruguru, kuri uyu wa Kane tariki ya 13 Kamena 2019, niho IGP Dan Munyuza  yagaragarije ko hakenewe ubufatanye hagati y’ibihugu mu rugamba rurebana no guhangana n’iterabwoba.

Ni inama ku mutekano,  yitabiriwe n’abofosiye bakuru muri Polisi bungurana ibitekerezo ku mikoranire myiza y’imiryango igize umugabane wa Afurika uko bakemura ibibazo by’umutekano bibanda cyane ku mugabane wa Afurika.

Mu ijambo ry’ikaze CP Christopher Bizimungu, umuyobozi w’ishuri rikuru rya Polisi y’u Rwanda , ahabera amasomo y’abofisiye bakuru muri Polisi zo ku mugabane wa Afurika, yavuze ko iyi nama igamije kurebera hamwe uko ibibazo bishingiye ku mutekano byakemuka.

CP Christopher Bizimungu, umuyobozi w’ishuri rikuru rya polisi y’u Rwanda

Yagize ati “Iyi nama ku mutekano ari umwanya mwiza aho abofosiye bakuru muri Polisi baba baritabiriye aya masomo bungurana ibitekerezo ku mikoranire myiza y’inzego z’umutekano muri Afrika mu gukemura ibibazo by’umutekano harimo n’ibyambukiranya imipaka.

Atangiza ku mugaragaro iyi nama, Umunyamabanga wa Leta muri Minisiteri y’Ubutabera, Me Evode Uwizeyimana yavuze ko bitewe n’ iterambere mu ikoranabuhanga byoroheje uburyo bw’urujya n’uruza rw’abantu n’ibintu ku isi, ko hari ababyitwaza bagakora ibyaha byambukiranya imipaka.

Yakomeje avuga ko kugira ngo umugabane wa Afurika ugire umutekano urambye habaho guhanahana amakuru mu gukumira ibyaha. Kugira ngo ibyo bigerweho, ngo ni uko abapolisi bakuru bakomeza kongera ubumenyi n’ibikoresho nkenerwa harimo n’ubumenyi.

Umuyobozi wa Polisi, IGP Dan Munyuza, na we ashimangira ko hakenewe ubufatanye, ati “ Nta gihugu cyakwikemurira ibibazo by’iterabwoba cyonyine. Ubufatanye ni ngombwa mu gukemura ibibazo by’umutekano nk’ibyaha by’ikoranabuhanga, icuruzwa ry’abantu ndetse n’icuruzwa ry’ibiyobyabwenge.

Iyi nama ifite insanganyamatsiko igira iti “Dushimangire umutekano ku mugabane wa Afurika dushingiye ku bufatanye bw’uturere”. Yitabiriwe n’abapolisi baturutse mu bihugu nka Repubulika ya Centre Afrika, Kenya, Liberia, Namibia, Nigeria, Somalia, Sudani y’Epfo n’u Rwanda.

Inama yitabiriwe n’abapolisi bo mu bihugu bitandukanye bya Afurika

 

Izindi wakunda

Bwiza.com
error: Alert: Ntabwo byemewe!!