bwiza.com
Ahabanza » Nyamasheke: Barajwe ishinga no kwegukana igikombe cy’imihigo 2018-2019
Amakuru Imikino

Nyamasheke: Barajwe ishinga no kwegukana igikombe cy’imihigo 2018-2019

Nyuma y’uko ikipe y’abagore y’umurenge wa Gihombo mu karere ka Nyamasheke itwariye igikombe cy’umurenge Kagame Cup mu mupira w’amaguru itsinze iy’umurenge wa Nyakabanda mu karere ka Nyarugenge, kuri  penaliti 6 kuri 5 mu gihe umukino wari warangiye amakipe yombi anganya 0-0, imikino ya nyuma y’iki gikombe yose ikaba yari yabereye kuri Stade Huye mu ntara y’Amajyepfo, benshi mu baturage b’aka karere bishimiye iyi ntsinzi bavuga ko nyuma y’iki gikombe bashaka n’icy’imihigo.

Ni igikombe aka Karere gatwaye kanyotewe  cyane kandi ngo kari kashyize imbaraga nyinshi mu gutegura iyi mikino,dore ko ari ubwa mbere bagitwaye kuva iyi mikino yatangira kuko umwaka ushize  bari bageze ku mukino wa nyuma mu mupira w’amaguru mu bahungu, abaturage benshi baganiriye na Bwiza.com bayitangarije ko ari insinzi y’akarere kose batayifata nk’iya Gihombo gusa kuko ibyishimo babihuriyeho nk’akarere kandi byerekana aho bageze mu miyoborere myiza.

Meya Kamari Aimé Fabien ari kumwe n’abatsindiye imidali mu mikino ngororamubiri

Umuturage wo mu murenge wa Kagano yagize ati ’’Nitwe batsinze ku mukino wa nyuma bajya guserukira akarere,natwe twababonagamo impano zikomeye zigomba kubageza ku gikombe bikaduhesha ishema. Igihe cyo tutwara ibikombe cyagarutse kuko twari tumaze igihe nta bikombe bifatika ngo twishimire rimwe nk’akarere tubona ariko Gihombo iduhesheje ishema imbere y’igihugu cyose.’’

Yarakomeje ati “Ubu icyo tunyotewe kandi duharanira twese n’iyonka y’aka karere ni igikombe cy’imihigo y’uturere, Meya wacu agakora mu ntoki za Nyakubahwa perezida  wacu Paul Kagame nk’uko byagenze ku wamubanjirije  Habyarimana Jean Baptiste ubwo twagitwaraga mu mwaka w’imihigo 2010-2011 ariko umunezero tukawuheruka ubwo kugeza uyu munsi,ariko bariya bana batweretse ko byose bishoboka n’ikindi uyu mwaka ari icyacu.’’

Ubwo iyi kipe yakirwaga n’ubuyobozi bw’Akarere, kuri uyu wa Kabiri kapiteni wayo  Mutatsineza Clémentine yashimiye ubuyobozi uhereye kuri Gitifu w’umurenge wabo Harindintwali Jean Paul ngo utarigeze asinzira kugera bageze ku ntego yabo,ababatoje,ababahaye izindi nama n’abandi bose bababaye hafi kugera ku nsinzi barimo n’umuyobozi w’aka karere Kamari Aimé Fabien  ngo utarahwemye kubashyigikira kugeza begukana igikombe anahibereye,atibagiwe n’abaturage b’aka karere na bo ngo babagaragarije kubashyikigira mu buryo bwose bashoboye.

Icyakora ngo hari ibyo bifuza ngo n’icy’ubutaha bazacyegukane. Ati’’ twaratsinze ariko ibibazo biracyari byose, nta bibuga bigaragara tugira, nta bikoresho bihagije  kuko nk’inkweto dukinana tuzitiratira hirya no hino, abenshi ubwo iyi mikino irangiye bagiye gutatana kuko nta yindi mirimo bafite ariko tugumye hamwe bakadushakira icyo dukora ntidutatane twazahora tuzanira ibyishimo abaturage bacu.’’

Abihuriraho na Musabyimana Justin usanzwe akurikirana ubuzima bwa buri munsi bw’ikipe kimwe na bagenzi be bafatanya,bakavuga ko bakemuye ibi bibazo nta kabuza aba bana bakomeza guhesha ishema akarere,kuko hari n’abandi bafite impano nyinshi zigipfukiranye kubera ibibazo nk’ibi.

Umunyamabanga Nshingwabikorwa w’Umurenge wa Gihombo, Harindintwali Jean Paul yijeje abaturage b’umurenge we bari baje kwakira aba bana ari benshi cyane kuko babafata nk’intwari zibagejeje aho ngo bifuzaga,ko bagiye gukora ibishoboka byose kugira ngo n’ubutaha bazashimishe abaturage babo igikombe bazongere bakizane.

Iki gikombe cyaje giherekejwe na sheki y’amafaranga 1.200.000,abakozi b’aka karere na bo  babagenera amafaranga 350.000 yo kubashyigikira kimwe n’abatsinze mu mikino ngororamubiri,umuyobozi wako Kamari Aimé Fabien na we akizeza abaturage ko umunezero w’ibikombe watangiye kuza, cyane cyane ko bagitwaye begukanye n’umwanya wa 3 ku rwego rw’igihugu mu kurengera ibidukikije, akabasaba gukomeza guhuza imbaraga ngo n’icy’imihigo banyotewe  baheruka kera uyu mwaka bazongere bacyegukane.

Ubwo ikipe y’abakobwa yegukanaga igikombe ‘Kagame cup’

Izindi wakunda

Bwiza.com