bwiza.com
Amakuru mu mahanga

USA: Joe Biden yiyemeje ko aramutse atowe azarandura Cancer

Umunyapoliti w’ umunyamerika , Joe Biden wari wungirije Perezida Barack Obama  ubwo yari mu mirimo ye, yatangarije abaturage kuzarandura indwara ya cancer muri Amerika nibaramuka bamutoreye kuyobora iki gihugu muri 2020.

Iyi ntego yo guhangana n’ indwara ya cancer iri mu za mbere zibasiye Abanyamerika,  Joe Biden yashimangiye ubwo yari mu gikorwa cyo kwiyamamaza kuba Perezida cyabereye mu Ntara ya Iowa .

Joe Biden wapfushije umwana w’ imyaka 46 y’ amavuko azize cancer y’ ubwonko muri 2015, yabwiye abantu ati” Ndabibasezeranyije ko muntoreye kuyobora Amerika ikintu cy’ ingenzi nzakora ni uko igihugu cyacu tuzavumbura uburyo bwo gukiza cancer”.

Joe Baden ari kumwe na Barack Obama afata nk’ imwe mu nshuti magara

Mu gihe yari Visi-Perezida wa Leta Zunze Ubumwe za Amerika yungirije Barack Obama, Biden yashinze gahunda yise “cancer of cancer” igamije guteza imbere uburyo iyi ndwara yakumirwa ndetse yanasuzumwa ikanavurwa.

Gusa nyuma yo kuva kuri iyi mirimo muri 2017, yashinze ishyirahamwe ridaharianira inyungu rirwanya cancer aryita” Biden Cancer Initiative”.

Ku ruhande rumwe, iki cyizere Biden cyo guhangana n’ indwara ya cancer cyakiriwe neza mu gihe hari n’  abandi bavuga  ko ibyo yifuza ari indoto.

Inkuru dukesha The Independent ivuga ko abatemeranye na Biden bavuze ko bitewe n’ uko atazi iby’ ubuvuzi ashobora kuba yitiranya ibintu ngo kuko hari amoko arenze 100 ya cancer kandi yose akaba afite umwihariko gutanagira aho ifatira mu isuzuma ndetse no mu ivurwa.

Ese Umukambwe Joe Biden afite amahirwe yo kuba Perezida wa Amerika?

Muri 1988, Biden yaretse kwiyamamariza umwanya wo kuba Perezida wa Leta Zunze za Amerika aregwa kwigana imbwirwaruhame ya politike.

Joe Biden yatorewe inshuro zirindwi guhagararira ishyaka ry’ abademokrate muri Sena y’ Amerika ariko muri 2008 akuramo kandidatire ye ubwo yashakaga kuba Perezida w’ iki gihugu.

Barack Obama yaje kumusaba  ko yamubera Visi Perezida mu rwego rwo kumufasha kuzamura ubukungu bw’ Amerika bakoresheje miliyari 787 y’ amadorari.

Inyigo zishinzwe gutangaza ibarurishamibare y’ uko amatora azagenda aho muri Amerika zatangiye kwemeza ko Joe Biden ashobora kuzarusha Perezida Donald Trump  ku majwi 13%.

 

Izindi wakunda

Bwiza.com