bwiza.com
Ahabanza » APR FC yasezerewe mu gikombe cy’Amahoro
Amakuru Imikino

APR FC yasezerewe mu gikombe cy’Amahoro

Ikipe ya APR FC yamaze gusezererwa mu mikino y’igikombe cy’Amahoro nyuma yo kunganya na AS Kigali ubusa ku busa mu mukino wo kwishyura wa 1/8.

APR FC ifite igikombe cy’Amahoro inshuro icyenda, isezerewe itarenze 1/8 na AS Kigali nyuma y’uko inaniwe gutsinda AS Kigali mu mukino wo kwishyura wabereye kuri stade ya Kigali I Nyamirambo.

Iyi kipe y’ingabo z’u Rwanda isezerewe nyuma yuko mu mukino ubanza wabaye tariki ya 13 Kanama 2019 AS Kigali yari yayitsinze igitego kimwe ku busa. APR yasabwaga gutsinda uyu mukino byibura ibitego bibiri ku busa kugira ngo yisere gukomeza muri ¼. Gusa AS Kigali yaje yariye karungu maze umukino urangira amakipe yombi aguye miswi.

APR FC yari yagaruye kizigenza wayo Hakizimana Muhadjiri utarakinnye umukino ubanza ngo barebe ko bakuramo AS Kigali ariko biranga birananirana.APR yatangiye umukino isatira mu buryo bukomeye ariko AS Kigali ikomeza guhagarara neza mu binyuma bituma umukino urangira nta kipe ibonye igitego.

Nyuma y’uko APR isezerewe mu gikombe cy’Amahoro bivuze ko uyu mwaka w’imikino urangiye ikipe ya APR nta gikombe ishyize mu kabati dore ko yarangije shampiyona iri ku mwanya wa kabiri , igikombe kigatwarwa na Rayon Sports. Muri rusange twavuga ko APR yitwaye nabi cyane muri uyu mwaka w’imikino.

Amakipe yamaze kubona itike ya ¼ ni: Rayon Sports, As Kigali, Kiyovu Sports, Intare FC, Gicumbi FC, Police FC, Etincelles, Gasogi United na Police FC.

APR yaherukaga gutwara igikombe cy’Amahoro muri 2017 ubwo yatsindaga Espoir FC igitego kimwe ku busa.

Nkurunziza Viateur @ Bwiza.com

Izindi wakunda

Bwiza.com