bwiza.com
Ahabanza » Nyamasheke: Abarokotse Jenoside barashengurwa  no kuba umwere ku uwari perefe Bagambiki wabamariye ababo
Amakuru Kwibuka

Nyamasheke: Abarokotse Jenoside barashengurwa  no kuba umwere ku uwari perefe Bagambiki wabamariye ababo

Aha ni mu rugendo rwo kwibuka abatutsi biciwe muri Ruharambuga.

Abarokotse Jenoside yakorewe abatutsi bo mu murenge wa Ruharambuga mu karere ka Nyamasheke bavuga ko bagishengurwa bikomeye no kumva ko uwari perefe w’iyari perefegitura ya Cyangugu Emmanuel Bagambiki wabamariye ababo yagizwe umwere n’urukiko mpuzamahanga mpanabyaha rwa Arusha, bagasaba ko yakongera agafatwa akazanwa muri aka karere bivugwa ko ari ho we ubwe yatangirije Jenoside ahitwa kuri Shangazi, bityo akba yabiryozwa.

Ubwo hibukwaga ku nshuro ya 25 abatutsi biciwe muri Ruharambuga, bamwe mu bari abayobozi bakomeye muri cyari perefegitura ya Cyangugu barimo uwari perefe wayo Emmanuel Bagambiki abaharokokeye bavuga ko yageze ahitwa kuri Shangazi ku wa 8 Mata 1994 ari kumwe n’abasirikare n’abapolisi b’iyari komini Gisuma bakambura ibikoresho abari bahahungiye bari barindishije umusirikare bari kumwe akarasa hejuru bakabwira interahamwe gutangira kwica abatutsi uwa mbere bakahamwicira mu maso ya Bagambiki Jenoside mu cyari Cyangugu igatangira ubwo.

Ngarambe Samuel wari ufite imyaka 11 gusa mu gihe cya Jenoside yishimira ko abarokotse biyubatse bakaba bashishikajwe no guteza imbere igihugu aba bicanyi bangije

Hari kandi uwari Minisitiri wa taransiporo no gutumanaho Ntagerura André, Liyetona Samuel Imanishimwe, Siméon Nshamihigo wari umushinjacyaha, ba Burugumesitiri b’ibyari amakomini ya Gisuma na Karengera uyu murenge wabarizwagamo n’abandi bashishikarije abahutu kwica abatutsi, Ntagerura na we bashinja gutanga imihoro yamaze ababo akaba yaragizwe umwere n’uru rukiko,bagasanga hari igikwiye gukorwa ngo aba bicanyi bareke gukomeza kwidegembya barushaho gutoneza abo bahekuye.

Ngarambe Samuel waharokokeye avuga ko ubugome bakorewe bwabanje na mbere y’uko Jenoside nyirizina itangira, aho abatutsi batotezwaga bikomeye haba mu mashuri n’ahandi hakaba n’abakubitwa ku maherere bakajya bibaza icyo bazira kikabayobera, muri Jenoside bwa bugome bukaza umurego aho bashyiraga bamwe mu batutsi mu mazu bakabica barangiza bakabatwika, agira amahirwe we na bake cyane bo mu muryango we bararokoka, akaba yishimira ko ubu umutekano mu gihugu uhari ntawe ucyikanga ko hari uwamwirukaho n’umupanga ngo amwice kubera Leta nziza yasimbuye iyo Leta ngome.

Ati ’’ twahuye n’akaga turi abana kuko njye nari mfite imyaka 11 gusa muri Jenoside niga mu wa 4 w’amashuri abanza, imiryango yacu yicwa urw’agashinyaguro kubera politiki mbi y’urwango yari yarabibwe kuva kera mu banyarwanda, ariko ubu turishimira ko turiho kubera Leta nziza idukunda dufite ubu twarize, ubu turateza imbere igihugu cyacu mu ngeri zose kandi ntituzongera kwicwa kuriya ukundi kuko imbaraga zo guhashya abo bagome bahora n’ubundi barekereje zihari zihagije.’’

Mu kiganiro ku mibanire y’abanyarwanda mbere y’ubukoloni, mu gihe cyabwo na nyuma yabwo cyatanzwe n’umuyobozi w’ishuri rya EAV Ntendezi rikorera muri uyu murenge na ryo ryatakaje abarimu baryo 5 muri Jenoside, Ndashimye Léonce, yagaragaje ububi bwa politiki mbi y’ivangura mu bantu n’uburyo yazonze abanyarwanda kugeza ubwo umuntu yica uwo basangiraga,bahanaga byose n’ibindi,ari yo mpamvu ingengabitekerezo ya Jenoside ikwiye kurwanywa n’imbaraga zose.

Padiri mukuru wa Paruwasi gatulika ya Ntendezi muri uyu murenge uzwi cyane mu bikorwa by’ubumwe n’ubwiyunge yihanganisha abaharokokeye.

Gatera Abdon uhagarariye imiryango yarokokeye muri uyu murenge iba ahandi,avuga ko batazahwema kwerekana akababaro baterwa no kuba bamwe mu babamariye ababo bakomeza kwidegembya ngo ni abere.

Ati ’’ Bagambiki ubwe ni we watangije Jenoside kuri Santere y’ubucuruzi ya Shangazi muri uyu murenge ikwira mu cyari cyangugu yose none ngo yaba umwere ate ko no mu mutima we azi ko ari umwicanyi ruharwa? We n’abandi bose badutwikiye abacu abandi bakabica urundi rupfu rubi runyuranye turifuza ko bakongera gufatwa bakabiryozwa kuko ubugome badukoreye hano tudashobora kubwibagirwa.’’

Umuyobozi w’aka karere Kamari Aimé Fabien abizeza ko nubwo uwabahekuye yagizwe umwere na ruriya rukiko bitarangiye kuko Leta ikibakurikirana kandi icyaha cya Jenoside kidasaza,bakaba badakwiye kwiheba ngo byararangiye.

Ku bibazo by’abarokotse Jenoside bashaje cyane ngo baba batuzwa kure y’amasambu yabo,Meya Kamari yijeje abafite izi mpungenge ko bizajya bikorwa byitondewe kugira ngo utujwe aturane n’abandi ariko hafi y’aho yakura ikimutunga.

 

Abaturage basabwe kurwanya bivuye inyuma icyashaka kugarura amacakubiri mu banyarwanda.
Abayobozi banyuranye barimo na Meya Kamari Aimé Fabien yihanganisha ababuze ababo muri Jenoside yakorewe abatutsi.
Aha kuri Shangazi ahubatse iki kimenyetso cy’amateka ya Jenoside bivugwa ko ari ho hiciwe umututsi wa mbere mu cyahoze ari Cyangugu mu maso ya perefe Bagambiki Jenoside irahatangirizwa muri Cyangugu yose.
Meya w’akarere ka Nyamasheke Kamari Aimé Fabien yihangana abarokokeye muri Ruharambuga.

Izindi wakunda

Bwiza.com
error: Alert: Ntabwo byemewe!!