bwiza.com
Amakuru Politiki

Ababyeyi bavuga ko amategeko yabambuye uburenganzira bwo guhana abana

Ubwo hizihizwaga Umunsi w’Umwana w’Umunyafurika, kuri iki Cyumweru tariki ya 16 Kamena, bamwe mu babyeyi batangaje ko amategeko yababereye inzitizi yo kudahana abana babo, bityo ko bamwe bitwara uko bishakiye rimwe na rimwe bikabagiraho ingaruka.

Kuri uyu munsi ufite insanganyamatsiko igira iti ‘Turi abana bafite icyerekezo cyiza twanze gutwita kw’abangavu”, Ababyeyi, abarezi n’abayobozi bavuga ko bahangayikishije n’ikibazo cy’abana b’abakobwa baterwa inda zitateganijwe, gusa ababyeyi bo bakemeza ko biterwa no kudahanwa, bityo abana bagakura bigenga, bagakora ibyo bashaka.

Umwe muri aba babyeyi, yagize ati “Ukajya kubona, ukabona nka nijoro umwana w’umwangavu n’umusore bariherereye mu muhanda, wagira ngo uravuze, bati mama rwose nkuraho ibyo byanyu bya kera byararangiye, wa mupapa na we nta burenganzira afite bwo kumuhana, kuko iyo umuhannye ahita ajya ku Murenge, bakaza bati ‘wahohoteye umwana’, bagufunge,…”.

Ku rundi ruhande, ngo n’ubukene bw’imiryango bushobora kuba impamvu ituma abana bararikira byinshi batabona bikabaviramo gutwara inda muri ubu buryo.

Uyu mubyeyi ati “Akagushukisha irindazi, akagushukisha Fanta, cyangwa udufaranga nk’utwo duke, umwana rero yabibona agahita agenda gutyo, ni ibyo bazira nta kindi, nk’ababyeyi se iyo ntambara twayirwana dute? Turabihorera nyine, none se wamwirukana ngo ni uko yatwaye inda?

Abana nabo ntabwo bajya kure y’ibyo ababyeyi bavuga, bashimangira ko kutabona ibyo bakeneye aribyo bibatera kugwa mu mutego w’ababashuka.

Uyu ati “Nk’iwabo iyo ari nk’abakene, umwana akaba ashaka icyo arya bityo bigatuma atwara inda itateganijwe, hari ibyo babaha nyine ntibanyurwe nibyo babahaye bakajya gushaka ibirenze iby’iwabo, nk’utwo twindazi tutavaho,…”.

N’uko akenshi ibibazo nk’ibi byigirwaho mu kagoroba k’ababyeyi bikanashakirwa umuti, bamwe mu babyeyi bavuga ko katitabirwa nk’uko bikwiye, aho igitsinagabo gitungwa agatoki ku isonga mu kutitabira.

Mu gushaka umuti w’iki kibazo, mu burezi hashyizeho gahunda y’uko buri kigo kigomba gushyiraho umwarimu ugomba gukurikirana cyane cyane abana b’abakobwa, abagira inama ndetse hanashyirwaho imfashanyigisho zifasha abana gusobanukirwa n’imihindagurikire y’ubuzima bwabo.

Imibare iherutse gutangazwa na Minisiteri y’umuryango, igaragaza ko mu mwaka wa 2017, abana b’abakobwa bagera ku 12500 batewe inda zitateganijwe mu gihugu hose, bibagiraho ingaruka zirimo no kuva mu mashuri.

Umunsi w’umwana w’umunyafurika umaze imyaka 28 wizihizwa, ukaba ukomoka mu gihugu cya Afurika y’Epfo ubwo mu mwaka wa 1991 abana b’abirabura barashwe n’abashinzwe umutekano bazira ko baharanira uburenganzira bwabo bwo kwiga. Uyu munsi mu Rwanda ukazizihizwa ku wa 20 Kamena 2019.

 

 

 

Izindi wakunda

Bwiza.com
error: Alert: Ntabwo byemewe!!