bwiza.com
INKURU TWABAHITIYEMO Inkuru zicukumbuye Politiki TUBAMENYE

Gukorana na Perezida Kagame ni ishuri – Ikiganiro na Prof. Dr. Habumuremyi wabaye Minisitiri w’intebe

Igice cya mbere

Ni ikiganiro kihariye , Bwiza TV na Bwiza.com byagiranye na Prof.Dr Damien Habumuremyi wabaye Minisitiri w’ Intebe wa Cyenda kuva u Rwanda rwabona ubwigenge. Iki kiganiro kibanze ku bimwerekeyeho nk’inararibonye muri politike, ku buzima bw’igihugu, maze ashimangira ko nta mpungenge afite ku cyerekezo cy’ igihugu mu miyoborere, ubuzima rusange n’ ibindi bitandukanye ndetse anemeza ko gukorana n’umukuru w’igihugu, Paul Kagame ari ishuri bitewe n’ubwenge afite, n’ukuri agira mu kazi ke,…

Prof.Dr Pierre Damien Habumuremyi yavukiye mu cyahoze ari Perefegitura ya Ruhengeri, Komine Ruhondo, ubu ni mu Karere ka Burera, ku wa 20 Gashyantare 1961. Aho niho yize amashuri abanza, ayisumbuye icyiciro cya mbere ajya kwiga i Shyira, amashuri yisumbuye ayakomereza i Kansi ari naho yaje kuyarangiriza mu ishami ry’ ubumenyi mu by’ ubukungu n’ imibanire (Sciences Economiques et sociales ) muri 1981.

Prof. Dr. Pierre Damien Habumuremyi yahuye n’ akarengane mu mashuri

Agisoza amashuri yisumbuye yabonye amanota yo hejuru (Grande distinction) ariko yimwa buruse, bagenzi be barangirije rimwe bakomoka mu Bushiru bahise bazihabwa ku bwinshi mu gihe bari barabonye amanota make kuri we nka 50% ndetse na 60%.

Ibyabaye kuri Prof. Dr. Habumuremyi, yavuze ko icyo gihe hazagamo ibintu bya politiki yo kuvangura uturere. Nk’ umwana umwe iwabo, byatumye ahita ashaka umudamu Musabyimana Petronie muri 1983 kugeza magingo aya bafitanye abana 5 n’ uwundi umwe w’ imfubyi barera batazi se na nyina ndetse naho yabaga ntawari uzi ababyeyi be [umwana waje kwishimirwa ndetse anakirwa neza mu muryango].

Mu 1987, nibwo Pierre Damien Habumuremyi arangije imyaka 3 ategereje yahise ajya muri kaminuza Nkuru y’ u Rwanda nabwo arangije icyiciro cya mbere afite amanota yo hejuru cyane (Tres Grande distinction) ngo ahita akomeza icya kabiri leta imwima buruse ( bourse) bitwaje ko abantu bakomoka za Rwaza batagomba guhabwa amahirwe kuko ku ngoma ya Perezida Gregoire Kayibanda abanyapolitiki nka Bicamumpaka Bartazard na Mpakaniye Lazarre ngo bari abaminisitiri.

Asobanura uburyo kuri Leta ya Habyarimana abantu baturukaga i Rwaza baharenganiraga bitewe n’ uko ku ngoma ya Kayibanda bari baratoneshejwe ukuntu.

Ikiganiro mu mashusho igice cya mbere

Prof. Dr. Haburemyi yafashijwe na Musenyeri Kolini gukomeza Kaminuza muri Congo- Kinshasa

Avuga ko Kolini wari usanzwe ari inshuti ya se mu Itorero ry’ Abangilikane na we wari musenyeri w’ iritorero i Lubumbashi, aho yari impunzi, yamufashije amwandikisha muri Kaminuza ya Lubumbashi muri Zaire, akajya yiyishyurira amafaranga y’ ishuri (minerval).

 

Imibanire ye n’ Abana b’ Abatutsi b’Abanyarwanda bari impunzi muri Zaire yamukoze ku mutima

Aha, Prof. Habumuremyi yashimangiye uburyo abanyeshuri b’ Abanyarwanda b’ impunzi z’ Abatutsi yasanze aho muri Kaminuza bamwakiriye ndetse banamufasha kugendera ku murongo mwiza bitewe n’ uko yari yagiye kwiga akerewe.

Avuga ko byamutangaje kubona abandi banyeshuri b’ Abanyarwanda batitaye ku bwoko bwe cyane cyane ko yari avuye mu Rwanda ahubwo bamwishimira kuko bari bahuje Ubunyarwanda ari naho avuga ko ubunyarwanda yabasanganye bwamukoze ku mutima. Aha kandi ni naho yatangiye kumenya Umuryango wa FPR-Inkotanyi, kuko yatangiye kumenya umugambi wari uhari wo kubohora u Rwanda.

Kuri iyi ngingo, Prof. Habumuremyi nk’ umuntu wari mu Rwanda rwabagamo ivanguraturere n’ivanguramoko yatekereje ko abo banyeshuri batari bafite ivanguramoko muri bo. Mu myaka ibiri yize aho muri Kaminuza, Pierre Damien Habumuremyi yarangije nabwo afite amanota yo hejuru cyane ( Trés grande distinction). Aho rero yahise ahabwa akazi nk’ umwarimu (professeur assistant) muri Kaminuza ya Lubumbashi kugeza naho agarukiye mu Rwanda asanga igihugu gifite ikibazo gikomeye cy’ abarimu atangira kwigisha muri Kaminuza y’ U Rwanda.

Mu kiganiro na Prof. Dr. Pierre Damier Habumuremyi

Akamaro yagiriwe na Musenyeli Emmanuel Kolini n’ Abanyarwanda yasanze i Lubumbashi katumye amenya FPR

Prof. Dr Habumuremyi yavuze ko imibanire myiza yagiranye na Musenyeri Kolini, yari ayifitanye na Papa we, ari nayo yatumye ajya kwiga hanze mu gihe Leta yari yanze ko yiga bigatuma n’ abandi banyarwanda yasanze i Lubumbashi. Ibi ngo byatumye atangira kumenya amateka n’ibitekerezo by’Umuryango wa FPR-Inkotanyi.

Avuga ko icyo gihe n’ubwo batamwizeraga cyane ariho yatangiye kumenya uburyo FPR ikora, usibye ko ngo atahise ayinjiramo. Asubiye mu Rwanda mu biruhuko mu 1991 icyo gihe ngo umugore we yaratotezwaga yitwa ko ari umututsikazi.

Prof. Habumuremyi yatangiriwe n’ Abafaransa kwinjira mu Rwanda

Ubwo yajyaha mu biruhuko yatangiriwe n’ Abafaransa bamwangira kwambuka agana mu Rwanda bamuhora ko adafite indangamuntu, bitewe n’uko yagenderaga kuri passport . Aha, ngo Abafaransa banze kwemera passport ye kuko icyo bashakaga ni indangamuntu.  Niyo yari yanditswemo ubwoko biba ngombwa ko asubira inyuma arara i Goma.

Bucyeye bwaho yasubiye ku kumpaka arakaye cyane afite n’ amahane menshi yiyemeje ko byanze bikunze agomba kwijira mu Rwanda, ariko ku bw’ amahirwe yahahuriye na ofisiye wo mu ngabo za Habyarimana wakoranaga n’ Abafaransa wari ushinzwe kumva ibibazo by’ abaturage amusobanurira ko agiye iwabo, ni uko yemera ikibazo cye amuha n’ uruhushya rumwemerera kwambuka (jetton) .

Akimara kugera ku butaka bw’ U Rwanda biba ngombwa ko ashyira umugore we (Petronie Musabyimana) ahantu hari safe {hatekanye}, ubwo yahise asubira ku ishuri kwigisha hagati aho nibwo jenoside yabaga.

Nyuma ya 1994, U Rwanda rumaze kubohorwa, yakoreye GIZ ndetse anakorera Umuryango Utegamiye kuri Leta, Catholic L Services ndetse na Oxfam.

Nta muhamagaro bwite wa politiki Prof. Dr. Habumuremyi yiyumvagamo

Pierre Damien Habumuremyi agikora mu mushinga w’ iterambere mu muryango w’ Abagatolika utegamiye kuri Leta nibwo yahamagawe n’ umuntu ku murongo wa telefoni amubwira ko yatoranijwe kuba Umunyamabanga Nshingwabikorwa wungirije wa Komisiyo y’ Igihugu y’ Amatora (NEC).

Aha avuga ko byamugoye cyane kubyakira kuko umuryango yakoreraga utashakaga kumurekura ndetse na we ngo yari afite umushahara mwiza. Yahembwaga Amadorari ya Amerika igihumbi (1000 US) afite imodoka y’ akazi n’ inzu n’ibindi. Avuga ko icyo gihe , Umuryango yakoreraga wandikiye Minisiteri y’ Ubutegetsi bw’ Igihugu [yayoborwaga na Desire Nyandwi] usaba ko Leta itatwara umukozi wayo, Hon. Nyandwi abasubiza ko igihugu aricyo prioritaire ku muturage wacyo.

Ageze mu mirimo mishya yari yahawe n’ igihugu, yasanze umushahara ku kwezi ari amafaranga ibihumbi ijana na mirongo inani(180.000 fr).

Akomeza avuga ko icyo gihe n’ umuryango we utabyumvaga neza, ari abana, ari madamu we, bose ngo ntibabyiyumvishaga ariko hamwe no kwihangana byose byarashobotse, ko bagitangira yasanze hari ibyakozwe na Hon.Bazivamo wahise ugirwa Minisitiri nawe agahita aba Umunyamabanga nshinwabikorwa wa NEC .

Yavuze uburyo kwihangana no kwitanga byuzuzana n’ uburyo muri komisiyo y’ amatora batagiraga imodoka ndetse n’ imwe bari bafite barayisangiraga ariko ku bwo kwihangana bakorera igihugu.

Yahuye n’ umurimo ukomeye muri NEC

Avuga ko uru rwego bakomeje kurwubaka rurakomera mu rwego rw’ abakozi, ikoranabuhanga, mu mikoranire n’ izindi nzego ndetse no kwigisha abaturage amahame nshingiro ya Demokrasi, kuko muri 2003 habayeho amatora y’ Abadepite, Abasenateri ndetse n’ aya Perezida wa Repubulika.

Aho niho yaboneye amahirwe yo gukomeza amashuri ye ya Kaminuza mu cyiciro cya Gatatu muri Kaminuza ya Paris II mu Bufaransa, mu bijyanye na politiki iganisha ku matora.

Nyuma yo kuyobora NEC imyaka umunani, muri 2008 , Pierre Damien Habumuremyi yahise ahamagarirwa kuba umudepite mu Nteko Nshingamategeko y’ Umuryango wa Afurika y’ Iburasirazuba(EALA) aho yamaze imyaka ine. Ubwo yari ahagarariye u Rwanda muri EALA, nibwo yabonye impamyabushobozi y’ ikirenga (PHD) muri Kaminuza ya Ouagadougou muri Burkina-Fasso.

Ahamagarirwa kuba Minisitiri muri Guverinoma yaratunguwe cyane!

Yemeza ko muri 2010 ubwo yari Arusha, yahamagajwe muri FPR/Inkotanyi amenyeshwa ko Perezida wa Repbulika yamugize Minisitiri w’ Uburezi.

Akimara kubyumva ngo byaramutunguye, yumvishe yishimye kuko yakundaga ibyerekeye uburezi ndetse yumvaga ko afite umuhate wo guteza imbere uburezi cyane cyane ku ireme rishingiye ku mikorere y’ abarimu n’ ubuyobozi bw’ ibigo kugira ngo habeho impinduka cyane mu ireme ry’ uburezi. Aho, ngo yumvaga icyo guha agaciro ari ugutegurira abarimu amahugurwa ndetse banajyanywa mu itorero ry’ igihugu.

Gukorana Perezida Paul Kagame ni ishuri !

Nyuma y’ amezi atanu , Prof. Dr Habumuremyi yahise agirwa Minisitiri w’ Intebe aho avuga ko icyo gihe yahabonye amasomo menshi ngo kuko gukorana na Perezida Paul Kagame ntibyoroshye. Ati ” Ni wawundi iyo akubonyeho ikosa ahita agukosora, urumva rero ko gukorana n’ abantu benshi biba bigoranye, kuko hari ukururira hano uwundi agakurira hariya, uba ukwiriye guhuriza ku murongo ngendarwaho w’ igihugu, ukora nk’ umuhuzabikorwa,…”.

Arakomeza, ati” Ntabwo mvuze ko bitoroshye muri sens negatif, biri muri sens positif kuko niyo byaba ari ukwezi kumwe mukoranye biba ari ishuri, HE… ni wawundi uri verry demanding (vigoureux et exigeant)”. Umuyobozi mukuru wacu afite intera ndende, n’imitekerereze miremire ku buryo kugira ngo uyigereho ntibyoroshye cyane cyane ibyo ashaka kugeraho kandi vuba na we biba bigusaba kujya muri iyo nzira. Iryo ni ishuri”.

Yakomeje avuga ukuntu umukuru w’igihugu afite imitekerereze ihambaye kandi areba kure ku buryo ibyo ubishoboye ukwezi kumwe, umwaka umwe , ibiri , itatu nta cyakunanira, ati” Iyo ni intsinzi yange.”

 Ntuzacikwe , inkuru izakomeza ubutaha…

 

Izindi wakunda

1 Igitekerezo

mugisha 02/07/2019 2:57 pm at 2:57 pm

Nibyiza kuba ari ishuri kuko H.E ni umwalimu mwiza turamwishimira kdi icyerecyezo cye kugihugu cyacu turakibona cyereka udashaka kureba.

ariko hari icyo nkunenga Prof Damien, ndakunenga ko utamwigiyeho kuba inyangamugayo.

ndabivuga nshingiye kukuntu wambura abo wakoresheje, ndabivuga kdi nshingiye kukuba uhora wizeza abantu ibyo utari bukore, aribyo twita kubeshya abakozi bakora n’abakoreye ishuri ryawe ryitwa Christian University of Rwanda (CHUR), na Polytechnic yawe Peace Integrated Polytechnic of Rwanda (PIPR).
Ndabivuga ngendeye kubyo utangariza abanyamakuru cg abagenzuzi b’amakaminuza, iyo bakubnajije kuri icyo kibazo, ntujya ubabwiza ukuri.
Ariko nizera ko Imana yo utazayibeshya.
Inama yanjye ni uko warecyeraho guhemuka kuko ntago bikwiye kuranga intore.

Subiza

Tanga Igitekerezo

Bwiza.com
error: Alert: Ntabwo byemewe!!