bwiza.com
Amakuru IBITEKEREZO

Igitekerezo: Iyi si yo miyoborere twifuza

Imiyoborere myiza inyura abaturage, abaturage beza na bo bagafasha abayobozi kuyobora neza. Buri wese yagira uruhare mu migendekere myiza y’imiyoborere. Si umuyobozi, si n’umuturage gusa ahubwo bombi barakenewe.

Tuvuge ko tumaze kugera ku rwego rushimishije rw’imiyoborere, yewe twamaze kuba na nka ya matara yo ku muhanda;twereka abandi uko bigomba kugenda. Ntaho dutandukaniye na cya kirunga cya Muhabura, abayobye bareberaho bakamenya amerekezo.

Ubuyobozi bwegerejwe abaturage byo si ibyo gutindaho ariko twibaze ku mikorere yabwo. Turabushimira ibyiza bwakoze ariko na none ntitubura gukomoza ku nenge yabwo. Tuvuge ko demukarasi ifite intebe hano mu gihugu ariko tunarebe niba nta basigaye inyuma, uburezi bwabaye ubwa bose, umutekano warakajijwe, politike y’ububanyi n’amahanga na yo iri ku isonga, imibereho myiza y’umuturage yarazamutse n’ibindi byinshi.

None rero bayobozi namwe baturage ndagira ngo mbabaze; Ese ibi biracyarangwa iwanyu? Niba bitakiriyo, nimureke twikomere amashyi.

Muti ni ibiki?

Iyo ndebye mu bindi bihugu, nsanga hari ba bayobozi bakiyoboza abaturage babo inkoni kandi imvugo ngo ‘n’inka ntizigikubitwa’ yarogeye.

Ni ubugwari ko umuturage atakwifatanya n’abandi gukora ibikorwa byateza imbere igihugu nk’umuganda, kwitabira inama,… ariko se none utabikoze banza

umenye icyabimuteye aho kumuhutaza wihuse cyane witwaje ya nkoni uhorana mu biganza. Reka tuvuge ko umuturage atitabiriye ibi bikorwa ku bushake; none ubwo inkoni yaba ari wo muti?

Ese haba hakiri ba bantu babuza umutekano abaturanyi babo, bagatabwa muri yombi, bagafungurwa, bakongera bagatabwa muri yombi, bikisubiramo

nk’umukino? Abo mvuga ni ba banyarugomo bakubita abantu, abajura, mbese ba bandi twita ‘ibikuke’ bitavugirwamo. Nge ibi nabibonaga nko kujenjeka kw’abashinzwe kubashyira ku murongo.

Nta bantu se bakivugwaho ubushobozi bwo gufungisha abandi muri za ‘kasho’ n’iyo nta cyaha baba bakoze? Hari amakuru yavugaga ko mu bihe byo hambere, hari abantu bari bafite ubushobozi bwo kwica cyangwa se gukiza, ku buryo yakugeneraga igihe ugomba kumara muri gereza, yakwibagirwa ko yagufungishije ugaheramo nyine. Ibi ntabwo twifuza ko byakwivanga mu miyoborere dushima.

Ese n’ubu hari umuntu wagukosereza ntugire ahantu umurega kuko aba afite ububasha butajegajega? Amateka avuga ko umwami cyangwa undi mutware yashoboraga kukwica, kukwicira, nyine kubera ko wabonaga ko nta zindi nzego zimukuriye, ukaruca ukarumira. Ni ibi ntabwo nifuza ko byabaho cyangwa ko byagaruka.

Umuturage nahabwe agaciro

Ibitekerezo by’abaturage ni byo uzashingiraho umenya ibyo ukemura nkawe muyobozi. Ntugire igitekerezo cy’umuturage na kimwe usubiza inyuma

kuko wicaye kuri iyo ntebe kubera we. Ntitwakwishimira na gato kubona umuyobozi ukora adashobora kumva ibitekerezo by’abaturage.

Biba bibabaje cyane iyo umuturage akwiye ubufasha kandi ari ku rutonde ariko bikamara umwaka, ibiri cyangwa irenga butaramugeraho. Ese niba ari amafaranga akenewe kugira ngo afashwe yageze nyuma arabura? Biba byaragenze bite? Ndavuga abaturage batishoboye bakeneye kubakirwa amazu, bakeneye inkunga ya VUP mu buryo butandukanye, abagenewe inkunga zo kubateza imbere n’ibindi.

Nimumbwire niba bishoboka ko akagari kaba karagezemo umuriro w’amashanyarazi; umudugudu umwe urimo umuriro ariko undi byegeranye cyane ukaba wamara imyaka isaga 7 utarahagera. Nge numva ko haba harabaye uburangare cyangwa se ikibazo cyabaye imbogamizi ntigisobanurwe uko kiri.

Raporo z’impimbano zitambamira iterambere ry’igihugu n’abaturage muri rusange. Ibaze na we umuyobozi aramutse atanze raporo ivuga ko yatanze inka 100 ku baturage kandi yaratanze 60 gusa, undi akavuga ko abaturage batishoboye bubakiwe amazu ni 20 kandi nta n’umwe wubakiwe,… Ubwo aba baturage babaye aba nde?

Imikoranire hagati y’abayobozi batandukanye, mu buryo bugamije kurya imitsi y’abaturage irasenya kuruta uko yakubaka. Abayobozi bumvikana ku buryo badashobora kuzivamo, bagahimba uburyo bumvikanisha ikibazo nta guhushanya kubayeho. Yego murahuza, murumvikana ariko nimutekereze abaturage mubereyeho.

Uburenganzira bw’umuturage ni kuki bamwe muri mwe mutabwubahiriza? Nge reka nizere ko mutagisaba abantu ko basezerana kugira ngo serivisi zo kwishyura ubwisungane mu kwivuza zikemuke cyangwa se kugira ngo haboneke bya byemezo abaturage bagomba. Ni uburenganzira kubihabwa rwose. Ikiguzi si ukuba umuntu yarasezeranye kuko bikorwa nyuma y’ubwumvikane hagati y’abashakanye.

Murashaka kwesa imihigo, mukaza ku isonga mu turere, mu ntara cyangwa mu gihugu hose mu gutanga umusanzu runaka na ‘Mutuelle’ irimo, ariko nimwite ku bushobozi bw’abaturage. Mwaba mugifatira amatungo yabo se biguriye cyangwa bahawe, mukayagurisha ngo bishyure ubwisungane? Ko cyaba ari ikibazo gikomeye.

Mu myaka yashize, na none ku bijyanye n’ubwisungane mu kwivuza, abantu binubiraga kurema amasoko bakabazwa ‘mutuelle’, utayifite agasubizwa mu rugo. Ubu buryo nabonaga butaboneye. None ndibaza niba iyo mico itakibaranga bayobozi.

Umuntu ahabwa itungo ngo rimufashe kwizahura mu bukene. Niba umuntu ahawe inka kubera ko atishoboye, atagira ubwatsi bwo kuyiragiramo, bikaba ngombwa ko ayiragira mu kinani ku bw’amaburakindi, igafatwa n’abayobozi ngo ntibyemewe, akishyuzwa amande adafitiye ubushobozi, ubwo aba atejwe imbere?

Umuturage nagire uruhare mu bimukorerwa, agire uruhare mu myanzuro afatirwa, abazwe ibibazo bimureba kuko burya umuyobozi ntabwo amuzi kurusha kuko yiyizi we bwite. Abaturage bicare hamwe n’abayobozi, barebe ibitagenda neza mu miyoborere bisanzuye, nta gitutu kibariho, nta bwoba bafite bw’inkurikizi zabaho nyuma yo kuvuga akabari ku mutima. Nta miyoborere myiza yaruta iyi, mu gihe izi nama zaba zikurikijwe na ba bandi tunenga buri munsi ku bwo gutandukira inshingano. Bamwe turerura tukabavuga ariko hari n’abandi tutarakomozaho.

Izindi wakunda

Bwiza.com