bwiza.com
Ahabanza » Umunyarwenya Bishop Gafaranga yiyemeje gukosora Bishop, Pastor biba Abakirisito bakoresheje ubutekamutwe-Video
Amakuru Iyobokamana

Umunyarwenya Bishop Gafaranga yiyemeje gukosora Bishop, Pastor biba Abakirisito bakoresheje ubutekamutwe-Video

Mu kiganiro yagiranye na Bwiza.com, umunyarwenya ukunzwe muri iyi minsi uzwi ku izina rya Bishop Gafaranga, yavuze ko adateze kureka gukosora abesikoro n’abanyamitwe biyemeje kwambura Abanyarwanda bitwaje Bibiliya, ubuhanuzi n’ibindi biri kugaragara mu nsengero zimwe na zimwe zo mu Rwanda.

Bishop Gafaranga yahamije ko ibyo akina abizi hirya no hino mu gihugu ndetse yabibonye inshuro nyinshi adashobora kumenya umubare, aho yabonye bamwe mu bayobora amatorero bakoresha imvugo zirimo iterabwoba no kugoreka amagambo bagamije gucucura abantu.

Ati “ Ibyo mvuga ndabizi kandi nawe wasanga ubizi, hashizi igihe gito impano yanjye ntangiye kuyikoresha , nararebye nsanga nk’umuntu usenga nta handi nayikoresha mpitamo kwerekeza mu rusengero nta kindi ngamije ari ugukangura Abakirisitu n’abashumba b’amatorero kuko usanga bigeze habi, aho umuntu ashobora kukubwira ko ukura amaso ku bantu ( ba so wanyu, Nyoko wanyu, abavandimwe n’inshuti), nyamara we akayakwerekezaho ngo umugurire ibyo akeneye.”

Muri iki kiganiro, Bishop Gafaranga yahamije ko atazigera atezuka na gato kuko azabikora kugeza apfuye agamije gufasha Abanyarwanda kugira ngo be gukomeza gushukwa no kwamburwa utwabo babeshywa ko bakorera Imana.

Ati“Tekereza nawe umu Bishop nanjye ntatinya no gutera ubwoba wa mukene utagira n’inkweto yo kwambara ngo agure itara rya V8 y’umushumba we arwana no kurya, nyamara n’uwo mushumba ntazi aho iyo ntama ye ituye.”

Bishop Gafaranga kandi yakomoje ku cyizere abantu bagakwiye kuba bagirira mu nsengero ariko ubu bikaba bigoye kubera ibihakorerwa. Avuga ko bigoye ko ubu ushobora kwizera kurerera mu rusengero bitewe n’uko umwana wawe ushobora kumwohereza mu rusengero akagaruka atwite cyangwa akahahurira n’izindi ngorane .

Ati “Umwana iyo umwohereje mu rusengero uramubwira uti ‘mwana wanjye uzirekure’, ariko iyo agiye mu kabyiniro uramubwire uti ‘wirinde mwana wanjye’, kugeza ubu biragoye kwizera mu rusengero kuko usanga naho umuntu agomba kugenda agira impungenge bitewe n’imyitwarire y’abitwa abakozi b’Imana.”

Ibindi kuri iki kiganiro mwabikurikira muri iyi video

Habiyaremye Zakarie uzwi ku izina rya Bishop Gafaranga, n’umurokore usengera mu itorero Salivation Church, ni umudiyakoni, ni umugabo wubatse ufite umugore n’abana babiri uvuga ko yiyemeje kurwanya ubwambuzi, iterabwoba, ubwesikore nibindi bibi bikorwa n’abayobozi b’amatorero atandukanye, byose bigakorerwa abasengera muri yo ahanini bigamije kubambura utwabo binyuze mu kwiyitirira Imana .

Izindi wakunda

Bwiza.com