bwiza.com
Ahabanza » Col. Mambweni wa FARDC nawe yinjijwe mu bakurikiranweho uruhare mu iyicwa ry’impuguke za Loni
Amakuru Politiki

Col. Mambweni wa FARDC nawe yinjijwe mu bakurikiranweho uruhare mu iyicwa ry’impuguke za Loni

OLYMPUS DIGITAL CAMERA

Colonel Jean de Dieu Mambweni wa FARDC kuri ubu akurikiranweho uruhare mu iyicwa ry’impuguke za Loni ziciwe muri Kasai mu 2017. Dosiye ye yoherejwe mu rukiko rwa gisirikare rw’iyahoze ari Kasai y’Iburengerazuba.

Col Mambweni ufungiye Kananga kuva kuwa 07 Ukuboza umwaka ushize ku mpamvu z’iperereza, kuwa gatandatu ushize nibwo yamenyeshejwe ko agiye gutangira gukurikiranwa.

Amakuru ava mu butabera aravuga ko Col. Mambweni azasubiza ibirego bigera kuri bitandatu birimo kurenga ku mahame ya gisirikare, ibyaha by’intambara binyuze mu kwica no kwifatanya n’abagizi ba nabi.

Uyu musirikare mukuru mu ngabo za Congo akekwaho kuba yaratanze ubufasha mu iyicwa rya Zaida Catalan na Micheal Sharp, aho ngo yagize uruhare mu gutega umutego impuguke za Loni zaguyemo kuwa 12 Werurwe 2017.

Col Mambweni akaba ashinjwa kuba yaratanze amasasu ya caliber 12 yakoreshejwe mu kwica izo mpuguke za Loni.

Ku kijyanye n’ikirego cyo kwifatanya n’abagizi ba nabi, uyu musirikare akekwaho kuba yari umwe mu bakoranaga n’agatsiko k’inyeshyamba za Kamuina Nsapu kagizwe n’abitwa Vincent manga, Tshidima Bula Bula, Ilunga Lumu na Jean Bosco Mukanda. Aba bose bamaze no kugezwa imbere y’urukiko bashinjwa kwica Zaida Catalan na Micheal Sharp.

Iyi nkuru dukesha Radio Okapi ikaba isoza ivuga ko igisigaye ari uko Urukiko rwa Gisirikare rugena itariki ruzatangira kumvira kwiregura kwa Col. Mambweni.

 

Izindi wakunda

Bwiza.com