bwiza.com
Ahabanza » Muhanga: Byari amarira n’agahinda mu ishyingurwa rya Dusabumukiza wiciwe kwa Pasiteri
Amakuru Politiki

Muhanga: Byari amarira n’agahinda mu ishyingurwa rya Dusabumukiza wiciwe kwa Pasiteri

Agahinda kenshi n’amarira ku maso nibyo byagaragaraga mu maso y’inshuti n’umuryango mugari wa Dusabumukiza Delphine bicyekwa ko yishwe n’umusore bateganyaga kurushinga. Bamwe mu baturage bavuga ko urupfu rwe rurimo amayobera, abandi bakemeza ko rwakabaye n’isomo ku bakundana.

Amakuru atangwa ku rupfu rwa Delphine kuva ku wa Gatanu w’icyumweru gishize ajya gusa, bivugwa ko yiciwe mu Karere ka Kamonyi, Umurenge wa Musambira, mu Kagari ka Buhoro, bigakekwa ko yishwe n’umusore biteguraga kurushinga ndetse yaranafashe irembo.

Uyu muturage ati “Njye nabimenye ku wa Gatanu Saa cyenda z’ijoro, menya ko yapfuye, hacyekwa ko yishwe n’uwari Fiyansi we,…”. Akomeza avuga ko umusore yari amaze iminsi itatu acumbitse kwa Pasiteri, n’uko atumaho umukobwa ngo kugira ngo baganire ku by’ubukwe, Pasiteri n’umudamu ngo babasize mu rugo, nyuma biza kumenyekana ko umusore yamwishe.

Uyu musore ngo yamaze kumwica aratoroka, gusa bamwe mu bo basenganaga bavuga ko yaboherereje ubutumwa abandi akabahamagara abahamiriza ko ari we wamwishe, amuziza kumubenga.

Uyu ati “Ntabwo yabaga inaha, urumva yaturutse i Bugande aza ari nk’umwizerwa wo mu rusengero, yaje afite gahunda yo kuganira n’umukobwa bapanga gahunda z’ubukwe, twabyakiriye nk’amahano no gusebya itorero kuko uwo muhungu yagerageje guhamagara kuri telefoni avuga ati ‘ni njyewe wamwiyiciye. Pasiteri ntimugire icyo mumubaza ni njye wamwishe, yari amaze kunyanga”.

Ku rundi ruhande, umwe mu babyeyi bari muri uyu muhango wo gushyingura, yavuze ko bikwiye kuba isomo ku bandi, bakazajya babanza gushishoza bakamenya neza abo bakundana. Barasaba n’inzego z’umutekano gukora iperereza amayobera ari muri uru rupfu agasobanuka.

Ati “Pasiteri agasiga abantu mu rugo rwe agashogoshera akagenda n’umugore we kandi azi ko bafitanye amakimbirane! njye mpamya ko bari bafitanye umugambi wabo umwe, njye mpamya ko bose bari bafitemo uruhare, turasaba inzego z’umutekano ko zakurikirana izo nsengero zabo zihamagaza umuntu akaza bagahita bamwica, tukamuburira irengero[umusore]”.

Undi ati “Ariko ibi ni inyigisho, iri ni ishuri rwose buri muntu wese abe maso, akanguke ku bw’iki kintu cyabaye”. Undi musaza ati “Kuba witwa ko ukunda umuntu ukamwica, twamugereranya n’umwicanyi ruharwa”.

Abaturage bakomeje kuganira na Flash Tv, bavuga ko uwishe Delphine yahise atoroka ahungira muri Uganda aciye ku mupaka wa Kagitumba, aya makuru ngo bakaba bayakesha inzego z’umutekano.

Dusabumukiza Delphine yari umukobwa w’imyaka 31 y’amavuko, yavutse ku wa 1 Gashyantare 1988, yitaba Imana ku wa 14 Kamena 2019.

Izindi wakunda

Bwiza.com