bwiza.com
Amakuru Ubukungu

Nyamasheke/Gihombo: Bavuga ko iterambere ryabo rikomwa mu nkokora no kutagira isoko rya Kijyambere

?

Abaturage bo mu Murenge wa Gihombo mu karere ka Nyamasheke bavuga ko nyuma ya gahunda nyinshi za Leta zibashishikariza ubuhinzi n’ubworozi bwa kijyambere no kongera umusaruro bakuye amaboko mu mifuka bagakora bagamije isoko aho gukomeza guhingira inda gusa batanahazaga uko babyifuza,ariko ngo kuba umurenge wabo nta soko ugira n’ayo barema mu yindi mirenge bamwe hakababera kure cyane  bikomeje kubazitira mu iterambere.

Babitangarije Bwiza.com mu gikorwa cy’imurikabikorwa cyateguwe n’ubuyobozi bw’uyu murenge aho ubuyobozi bumurikira abaturage ibyo bubakorera, na bo bakabugaragariza ibyo bamaze kwigezaho mu iterambere,cyane cyane mu bikorwa by’ubuhinzi n’ubworozi,banagaragaza uruhare rwabo mu mihigo yeswa n’umurenge,utugari n’imidugudu,aho  banarushanwa mu kugaragaza ibyo bagezeho n’imyumvire yabo mu kubyaza umusaruro amahirwe y’iterambere Leta ibagezaho.

Babwiye Bwiza.com ko  bishimira aho bamaze kwigeza mu kwihaza mu biribwa kuko mu myaka 3 ishize benshi kurya ngo byari ingorabahizi kubera ko hari n’ubutaka bwinshi butabyazawaga umusaruro ukwiye ibiribwa bikaba bike, ariko aho ubuyobozi bufatiye ingamba kuri ubwo butaka na bwo bukabyazwa umusaruro, abafashamyumvire mu buhinzi,abajyanama b’ubuhinzi n’abandi bose barebwa n’ubuhinzi n’ubworozi  bakabishyiramo imbaraga zihagije,Gihombo ngo iragenda igana ku kuba ikigenga cy’akarere mu musaruro w’ubuhinzi n’ubwrozi.

Gusa ngo ikikibazitira mu kugera ku ntego zabo ni ukuba uyu murenge nta soko rigaragara ufite kandi ngo ni ikibazo bagaragarije ubuyobozi bw’akarere hashize igihe kirekire ariko ngo nta gisubizo babona,bagakomeza gukora urugendo rurerure bikoreye ku mutwe, amatungo amwe akabapfiraho bayajyanye mu isoko rya Rugali mu murenge wa Macuba kandi ngo ni kure cyane,n’atwawe mu bwato bakayasorera menshi cyane,amata   ngo kubona aho uyagurisha ni ikibazo,bagasanga ibi na byo bikemutse barushaho gutera imbere.

Bavuga ko ibikorwa by’ubuhinzi bigaragara mu myaka mike ishize bitahabonekaga

Ntihemuka Esidras  utuye mu kagari ka Mubuga muri uyu murenge avuga ko kugeza umusaruro ku masoko ya Mugonero mu murenge wa  Mahembe  n’irya Karengera mu wa Kirimbi bawujyanamo ari imvune ikomeye cyane, abadashoboye kugenda igihe kirekire bikoreye bakemera guhendwa n’abamamyi bikabaca intege, nyamara mu murenge wabo hari isoko n’abo bandi babagana.

Ati’’ uko badushishikariza kongera umusaruro bajye banadushakira amasoko tuwujyanaho kuko kuba tutagira isoko rinini bitudindiza cyane. Dukeneye isoko ry’ibiribwa n’amatungo rigaragara kandi ntiryabura abarirema,cyane cyane ko n’umubyeyi wacu Paul Kagame yaduhaye umuhanda wa Kaburimbo ntitwabura abaduhahira baturutse imihanda yose rwose,n’amatungo yacu agenda yangirikira mu nzira tuyajyana mu masoko ya kure yagurishirizwa hafi bikagenda neza cyane.’’

Umunyamabanga nshingwabikorwa w’uyu murenge Harindintwali Jean Paul,na we yishimira aho abaturage be bavuye n’aho bageze ku musaruro w’ubuhinzi n’ubworozi,icy’amasoko na cyo bakaba bafatanya n’akarere ngo barebe ko cyakemuka.

Ati’’ turashaka guha ingufu isoko ry’ahitwa mu Kibati riremwa n’abanyarwanda n’abanyekongo baturutse imihanda yose kuko ubu ridafite ingufu turyifuzaho, tukongerera ingufu na santere y’ubucuruzi ya Birogo hagashyirwa isoko rikomeye ry’imboga n’imbuto, tukanakomeza kubyaza umusaruro amahirwe yandi menshi y’iterambere dufite,twizera ko bizagenda neza kuko uretse ibiribwa n’umuturage wacu akwiye kugira amafaranga ahagije akura mu musaruro we akayabyaza undi musaruro.’’

Umuyobozi w’aka karere  wungirije ushinzwe imibereho myiza y’abaturage Mukamana Claudette na we asanga ari ikibazo iyo umurenge utagira isoko kandi abaturage bakomeza kubisaba,akavuga ko bigiye kwigwaho neza bagasubizwa,akabashishikariza kongera ingufu mu musaruro kugira ngo isoko basaba nibarihabwa ntibazabure ibyo barijyanamo.

Mu myaka Itatu ishize byavugwaga ko uyu murenge ufite abaturage barenga gato 24.000 abagera kuri 1/3 cyabo bari mu cyiciro cya mbere cy’ubudehe n’imirire ya benshi isa n’iya ntayo,ubu ngo  barejeje cyane  kubera ingamba bafatiye hamwe n’ubuyobozi bwabo,ariko batabonye aho bajyana uyu musaruro ngo  bishobora  kubadindiza.

Abaturage bereka umuyobozi w’akarere wungirije ushinzwe imibereho myiza y’abaturage,Mukamana Claudette aho bageze bihaza mu biribwa

Izindi wakunda

Bwiza.com
error: Alert: Ntabwo byemewe!!