bwiza.com
Ahabanza » U Rwanda mu bihugu bya mbere bizakoreshwamo urukingo rwa Malaria
Amakuru Ubuzima

U Rwanda mu bihugu bya mbere bizakoreshwamo urukingo rwa Malaria

Minisitiri w’Ubuzima, Dr Diane Gashumba avuga ko mu rwego rwo guhangana n’indwara ya Malaria, urukingo rwayo rurimo kugeragerezwa muri bimwe mu bihugu bya Afurika, by’umwihariko ko nirumara kwemezwa, u Rwanda ruzaba ruri ku isonga mu bihugu bya mbere ruzakoreshwamo.

Kuri uyu wa Kabiri tariki ya 18 Kamena 2019, ubwo Minisitiri Gashumba yatangaga ibisobanuro mu magambo mu Nteko Nshingamategeko, ku bibazo bitandukanye biri mu rwego rw’ubuzima byagaragariye Abadepite, nibwo yanasobanuye byinshi mu ngamba zafashwe mu Rwanda zo guhangana na Malaria.

Yagize ati “Ku ngamba zo guhangana n’ubwiyongere bw’indwara ya Malaria, mbere abajyanama b’ubuzima bitaga ku bana bari munsi y’imyaka itanu gusa ariko ubu ngubu twongeyeho abakuru nabo barasuzumwa mu midugudu.”

Avuga ko n’ubwo urukingo rw’iyi ndwara rutaraboneka, rurimo kugeragezwa, ati “Urukingo rwa malaria rurimo rurageragezwa mu gihugu cya Malawi no muri Ghana kugeza ubu ntago ruragaragaza imbaraga zikomeye kuko mu igeragezwa ryakozwe ubu rurakingira kuri 40%, nirumara kugaragaza ko rwakora neza u Rwanda ruri mu bihugu bya mbere byo gukoreshwamo urwo rukingo kandi ibyo twizeye ko tuzabyemeranywa.”

Akomeza avuga kandi ko Minisiteri y’ubuzima ifite ingamba zo kunoza imitangire ya serivisi mu bigo by’ubuzima, Ati “Ni ikintu dushyiraho imbaraga twigisha buri munsi kandi tukanasuzuma kuko natwe twarisuzumye dusanga ko gutinda kwita ku barwayi aribyo biteza ibibazo”.

Minisiteri y’Ubuzima igaragaza ko guhera mu mpera za 2012, abaturarwanda bagera kuri 90% bari bafite ibyago byo kurwara Malaria.

Minisante igaragaza ko abarwaye malaria y’igikatu bavuye ku bihumbi 17 mu 2016 bakagera ku bihumbi birindwi mu 2018 naho abo yishe bavuye kuri 700 mu 2016 bagera kuri 300 mu 2018.

OMS yagaragaje mu 2018 ko buri minota 2, umwana uri munsi y’imyaka 5 yicwa na Malaria ku isi. Ni imfu ziganje cyane muri Afurika yo munsi y’ubutayu bwa Sahara. Imibare ya OMS igaragaza ko buri mwaka abantu ibihumbi 400 bicwa n’iyi ndwara na Malaria ku isi yose.

 

Izindi wakunda

Bwiza.com
error: Alert: Ntabwo byemewe!!