bwiza.com
Ahabanza » Inteko igiye kwiga ku mushinga wa Facebook wo gushyiraho ifaranga ry’ikoranabuhanga(cryptocurrency)
Amakuru mashya Ubukungu

Inteko igiye kwiga ku mushinga wa Facebook wo gushyiraho ifaranga ry’ikoranabuhanga(cryptocurrency)

Ikigo cya Facebook cyatangaje ko kigiye gushyiraho uburyo bw’ifaranga ry’ikoranabuhanga rizwi nka ‘cryptocurrency’ rizajya rikora mu buryo bwihuse, bwizewe kandi budasaba ikiguzi. Ariko inteko ishinga amategeko y’Amerika yavuze ko hazabanza inyigo mbere y’uko ryemererwa gukora.

Inkuru dukesha CNN ivuga ko ejo tariki ya 19 Kamena ari bwo iki kigo cyatangaje ku mugaragaro uko ubu buryo bwo gukoresha iri faranga kise ‘Libra’ buzagenzurwa n’ikigo cyigenga cyashinzwe cyitwa ‘Libra’ n’ishami rya Facebook ryiswe ‘Calibra’ rizajya rikora amaporogaramu ajyanye n’iri faranga.

Facebook ifite abakiriya basaga miliyari 2.4 ku isi. Abahanga mu by’ubukungu ndetse n’ikoranabuhanga bavuga ko niramuka ishyizeho iri faranga, bizayigira ikigo cya mbere gifite abayoboke benshi kuri iri faranga kurusha ibindi nka Bitcoin.

David Marcus uri mu bayoboye uyu mushinga mushya wa Libra na Calibra avuga ko ari ifaranga ryoroshye kandi rihuriweho n’abantu benshi ku isi. Impamvu uyu mushinga watekerejweho ni ukugira ngo bafashe abagira imbogamizi zo gukoresha amabanki n’izindi serivisi z’imari nko kuba kure yazo . Ibizajya bikorwa ku ifaranga rya Libra ni ukohererezanya no kwakira amafaranga.

Facebook ivuga ko yafashe umwanzuro wo guha iki kigo cya ‘Libra’ uburenganzira bwo kugenzura iri faranga kubera ko ari umutungo wa rubanda. Ni ikintu gifite agaciro kanini ku buryo kigomba kugenzurwa n’ikigo cyihariye.

Libra ubu ifite abanyamuryango 28 bazashoramo amafaranga. Irateganya ko mu 2020, ubwo iri faranga rizaba ryatangiye gukora, ikigo kizaba gifite abanyamuryango basaga 100. Abanyamuryango ba Libra barimo ibigo nka Facebook, Mastercard, Uber, Mercy Corporations, Vodafone, Visa, Stripe, Spotify n’ibindi.

Ikigo cya Libra kizaba gifite icyicaro i Geneve mu Busuwisi, igihugu kizwiho kuba ububiko bw’amafaranga menshi kuri iyi si kandi kikaba kirangwamo umutekano ku buryo nta bajura bahavogera. Ubusuwisi ni na cyo gihugu kibarizwamo Banki y’Isi.

Icyakoze uzajya akenera gufungura konte ya Libra azajya yerekeza kuri banki cyangwa ku bigo bivunja amafaranga nk’uko wakenera kujya muri Leta Zunze  Ubumwe z’Amerika bakabanza bagusaba kuvunja amanyarwanda mo amadolari. Nk’uko ababizi babona uko agaciro k’ifaranga kuri Bitcoin kaba gahagaze, Libra na yo hari ukuntu izaba ihagaze mu mafaranga asanzwe. Izi banki n’ibi bigo bizashobora kuvunja amafaranga ari uko bifite application ikorana na Libra.

Facebook yagiye igira ibibazo bitandukanye, harimo no kwinijrirwa mu makuru y’amakonte y’abakiriya. Ibi byatumye Itsinda ry’Abasenateri bashinzwe iby’amabanki muri Leta Zunze Ubumwe z’Amerika bandikira Zuckerberg, bamubaza niba Libra itazaroha abayikoresha nk’uko byagenze kuri Facebook. Yabasubije ko iri faranga ritazagenzurwa na Facebook, ahubwo rizaba rigenzurwa n’ikigo cya Libra rifite izo nshingano gusa.

Inkuru ya BBC ivuga inteko ishinga amategeko y’Amerika mu ishami rishinzwe imari, yategetse Facebook kugenza gake uyu mushinga mu gihe hatarakorwa inyigo igamije kureba niba iri faranga nta ngaruka rizagira ku bukungu cyangwa ku bakiriya. Haziashishwa inzobere mu by’ubukungu n’abanyamategeko.

Maxine Waters wo mu ishyaka ry’Abademukarate yagize ati: ” Nshingiye ku bibazo Facebook yagize mu bihe byatambutse, ndasaba ko yaba yitonze hakabanza hakorwa inyigo  y’inteko n’abanyamategeko kugira ngo harebwe icyakorwa.”

Senateri Sherrod Brown we avuga ko batakwemera ko iki kigo cya Libra gifungurirwa mu mahanga (mu Busuwisi) hadakozwe inyigo.

Mu mwaka ushize, ni bwo Facebook yagize iki gitekerezo cyo gushyiraho iri faranga, mu kwezi gushize Zuckerberg avuga ko azashyiraho uburyo bwo kohererezanya amafaranga bwihuta nk’uko bohererezanya ubutumwa cyangwa se amafoto ku mbuga nkoranyambaga.

 

 

 

 

 

 

 

Izindi wakunda

Bwiza.com
error: Alert: Ntabwo byemewe!!