bwiza.com
Ahabanza » Kiyovu Sports na AS Kigali zaba zigiye kuba ikipe imwe
Amakuru mashya Imikino

Kiyovu Sports na AS Kigali zaba zigiye kuba ikipe imwe

Mu ibaruwa yakomeje gucicikana igaragaza ko, ubuyobozi bw’ikipe ya AS Kigali n’ubwa Kiyovu Sports, bwandikiye ubuyobozi bw’umugi wa Kigali bubasaba ko aya makipe yombi yahuzwa akagirwa ikipe imwe y’umugi wa Kigali.

Hari hashize iminsi bihwihwiswa ko aya makipe yombi ashobora kwihuza agakora ikipe imwe ikomeye ihagarariye umujyi wa Kigali. Byaje kuba impamo ubwo ubuyobozi bw’amakipe yombi bwandikiye ibaruwa umujyi wa Kigali tariki ya 27 Gicurasi 2019 bubasaba ko bahuzwa bakagirwa ikipe imwe.

Muri iyo baruwa baragira bati’’ Nyuma y’ubusabe bwa Kiyovu Sports isaba AS Kigali ko twakwihuza tugakora ikipe imwe y’umujyi wa Kigali ikomeye. Nyuma kandi yo guhura kwa komite z’amakipe yombi tukabiganiraho tugasanga igitekerezo ari cyiza cyane cyafasha mu bukangurambaga mu batuye umugi wa Kigali tukabyemerenyaho’’

Bakomeje bagira bati’’Tubandikiye tubasaba ko mwashyigikira iki gitekerezo cyacu nk’umuterankunga wacu mukuru kugira ngo iyi kipe nshya y’umujyi wa Kigali izabashe kugera kure mu marushanwa yo mu gihugu ndetse n’amarushanwa mpuzamahanga no gukundisha abanyamugi umukino ubereye ijisho ndetse n’Abanyarwanda bose muri rusange’’.

Ikipe ya Kiyovu Sports imaze imyaka 58, yari isanzwe ifashwa n’akarere ka Nyarugenge na ho AS Kigali yo ikaba yafashwaga n’umugi wa Kigali. Mu myaka yashize, mu ikipe ya Kiyovu Sports hagiye humvikanamo ibibazo by’imishahara n’uduhimbazamusyi tw’abakinnyi bitatangirwaga igihe. Aya makipe yombi aramutse yihuje ,ikibazo cy’imishahara gishobora gukemuka.

Kugeza ubu, umugi wa Kigali ntacyo uratangaza ku cyifuzo cy’amakipe yombi ndetse ntiharamenyekana izina iyi kipe nshya yahabwa mu gihe umujyi wa Kigali waha iki cyifuzo umugisha.

Izindi wakunda

Bwiza.com
error: Alert: Ntabwo byemewe!!