bwiza.com
Amakuru mashya mu Rwanda Ubuzima

Minisiteri y’ubuzima isobanura iby’indwara yibasiye abakobwa mu mashuri

Hari indwara yiswe ‘iy’amayobera’ yibasiye abakobwa mu bigo by’amashuri bibiri.  Minisiteri y’Ubuzima ivuga ku gitera iyi ndwara nyuma yo kwiyambaza inzobere.

Iyi ndwara yibasiye ibigo bya Rambura mu Burengerazuba bw’igihugu na NEGA mu ntara y’Uburasirazuba nk’uko BBC ibitangaza, yafataga mu mavi, bigatuma aba bakobwa batabasha no kugenda. Yayobeye abaganga bo kuri aya mashuri, bamwe bakavuga ko bishoboka ko ari amarozi, abandi bagakeka ko ari amashitani.

Dr. Jean Damascene Iyamuremye uyoboye ishami ry’ubuvuzi bw’indwara zo mu mutwe yabwiye iki kinyamakuru ko hashingiwe ku bimenyetso byagaragaye, hari indwara ziterwa n’ibibazo byo mu mutwe nk’ihungabana ariko bikagaragariza ibimenyetso ku mubiri, mu byitwa ‘mass hysteria’.

“Sinabura guhamya ko iyi ndwara ishamikiye ku ihungabana twasanze Abanyarwanda hafi ya 30% bagendana. Biriya tubona bisa n’aho ari ingaruka z’iryo hungabana bita ‘complex trauma’ “. Dr Iyamuremye.

Ibi Dr. Iyamuremye yabitangaje  nyuma y’uko Minisiteri ihagurutse ikiyambaza abahanga barimo n’abazobereye ibijyanye n’ubuzima bwo mu mutwe kugira ngo bige kuri iyi ndwara.

Hashize igihe kijya kugera ku kwezi iyi ndwara iteye, abakobwa 45 bamaze gufatwa bajyanywe mu bitaro. N’ubwo yafashe abakobwa gusa ngo birashoboka ko yafata n’abahungu.

Ubushakashatsi bugaragaza ko igitsina gore gikunze gufatwa n’indwara z’ihungabana kurusha igitsina gabo. Mu bantu 10, umuhungu umwe ni we ugira ikibazo cy’ihungabana, abandi 9 ni abakobwa.

 

 

 

Izindi wakunda

Bwiza.com