bwiza.com
Amakuru Politiki

Nyamasheke/ Mahembe: Bifuza inganda ziciriritse zibasha kongerera agaciro umusaruro wabo

?

Abaturage b’umurenge wa Mahembe mu karere ka Nyamasheke bishimira aho bageze mu musaruro w’ubuhinzi n’ubworozi nyuma y’uko ubuyobozi bubakanguriye gahunda zo kongera umusaruro bihaza mu biribwa,bakababazwa n’uko uwo musaruro wabo ugenda upfa ubusa kubera ko werera rimwe ukazagira igihe uburira rimwe kandi batarawungutsemo,bakifuza ko babona  inganda ziciriritse ziwongerera agaciro kuko ari bwo bashobora kunguka.

Mu kiganiro na  Bwiza.com, bavuze  ko mu myaka yashize wasangaga bamwe bashonje kubera imihingire y’akajagari babagamo,bigatuma bamwe basuhuka bajya gushaka imibereho n’ibiribwa mu bindi bice by’igihugu,ariko aho batangiye gukangurirwa gahunda zinoze z’ubuhinzi zirimo gukoresha inyongerausaruro ku gihe,  guhuza ubutaka no guhinga ubutaka bwose buhingwa bukabyazwa umusaruro,bagahabwa n’inka muri gahunda ya gira inka umukamo n’ifumbire  bikaboneka, batangiye kwihaza mu biribwa  nk’uko  ngo bahoraga babyifuza.

Gusa ngo baracyahanganye n’ikibazo cyo gupfa ubusa k’umusaruro wabo kandi ntacyo bakora ngo bawuramire, aho usanga mu gihe cy’umwero weze ari mwinshi cyane,kubera kutagira uburyo bwo kuwuhunika cyangwa ngo bagire inganda ziciriritse ziwuhinduramo ibindi bintu bibikika igihe kirekire, ukagura make cyane nyamara warangira bagasigarana icyuho cy’ibiribwa bikanahenda cyane, bagasanga hari igikwiye gukorwa ngo ibibonetse bihoreho ntibagire igihe cyo kubihombesha n’icyo kubibura.

Uyu muhinzi asobanurira umuyobozi w’akarere n’abandi bayobozi imbaraga yakoresheje ngo abe umuhinzi ntangarugero

Ubwo abaturage b’uyu  murenge bakoraga imurikabikorwa bagaragariza ubuyobozi bwabo n’ubw’akarere ibyo bamaze kwigezaho bakesha gahunda y’imihigo no gukorera ku ntego, banamurikirwa ibyo ubuyobozi bubakorera birimo na serivisi bahabwa, bongeye kugaragaza iki kibazo nk’ikikibakomereye.

Nkundumukiza Isaie,umwamamazabuhinzi akaba n’umuhinzi ntangarugero yagize ati’’ gahunda za Nyakubahwa perezida   Kagame zo gushaka ko buri muturage abaho neza zatugezeho rwose, benshi turahinga tukihaza,ubworozi buragenda butera imbere,ariko turacyafite byinshi bwo gukemurirwa kuko kubona amafaranga biracyagoranye cyane.

Yarakomeje ati’’ twakanguriwe kubyaza umusaruro buri butaka bwose buhingwa turabikora, dukoresha inyongeramusaruro  neza,imbuto z’indobanure turazibona, duhabwa umuhanda wa kaburimbo na Nyakubahwa perezida Kagame imihahiranire iroroha,ariko ubukene bw’ifaranga burakomeza kugaragara kubera ko ibyo duhinze biba byinshi icyarimwe bikanashirira vuba rimwe kuko tutabihunika cyangwa ngo tubone inganda ziciriritse zibyongerera agaciro kugira ngo bihoreho,bikemutse rwose twarushaho gutera imbere.’’

Yambabariye Christine asobanuriya abayobozi

Yambabariye Christine utuye mu kagari ka Kagarama muri uyu murenge na we ati’’ tuvuye kure rwose mu biribwa kuko mu myaka 5 ishize hano hari ikibazo cy’ibyo kurya gikomeye cyane ariko gahunda nziza zo kubyaza umusaruro ubutaka bwose buhingwa zatugiriye akamaro gakomeye. Ariko nkanjye mpinga imboga n’imbuto cyane,nk’inyanya zakwerera rimwe nkazigurisha make cyane,zahundura zikabura kandi sinazihunika,ariko tubonye nk’inganda zizitunganya ku buryo zabikika igihe kirekire naba mu bagore bibeshejeho neza kuko zajya zimpa amafaranga ahoraho.’’

Umunyamabanga nshingwabikorwa w’uyu murenge Ndindayino Jean Claude avuga ko ibyo bavuga ari byo ariko bigaterwa no kuba uyu murenge utagira amashanyarazi igihe yazabonekera n’ibi bikazatangira gutekerezwa.

Ati’’ baravuga ukuri,bamaze kugera kure cyane rwose mu kongera umusaruro ariko kutagira amashanyarazi mu bice byinshi by’uyu murenge biratudindiza cyane kuko ntiwakora  uruganda ruciriritse cyangwa ngo ushake icyuma gisya imyumbati n’ibinyampeke nta mashsnyarazi ufite.

Binatuma imirimo yindi ibyara inyungu itaboneka ari yo mpamvu na Vup yabaga hano ikarangira abaturage basabye ko igaruka kuko nta kindi bakuraho amafaranga ya buri gihe bafite uretse ubwo buhinzi n’ubworozi na bwo butagira uburyo bwo kongerera agaciro umusaruro wabwo ariko ubuyobozi bw’akarere bubirimo amashanyarazi dushobora kuyabona vuba bikazakunda.’’

Bavuga ko bafite n’ikibazo cy’amata y’inka batabona aho bagurisha cyangwa uburyo bwo kuyakonjesha ngo bayanywe afutse,ibi bibazo byose umuyobozi w’aka karere Kamari Aimé Fabien akaba yarabijeje ko bigiye gushakirwa umuti amashanyarazi bakayagezwaho vuba n’ibindi bikabona gukurikiraho.

Aba baturage bemeza ko iterambere mu buhinzi n’ubworozi bafite ubu mbere bitahabaga

Izindi wakunda

Bwiza.com