bwiza.com
Amakuru Politiki

Nyaruguru: Nyirabahutu waririmbiraga Perezida Kagame akanyurwa yitabye Imana

Nyirabahutu Daphrose, umukecuru wo mu Karere ka Nyaruguru benshi bari bazi ku izina ry’Umukecuru wa Perezida, yitabye Imana aguye mu bitaro bya Kaminuza by’i Butare (CHUB).

Aya makuru yemezwa n’ubuyobozi bw’Akarere ka Nyaruguru, avuga ko Nyirabahutu yari amaze iminsi arwariye kwa muganga. Urupfu rwe ngo rukaba ari igihombo ku Karere ka Nyaruguru n’igihugu muri rusange.

Umuyobozi w’Akarere ka Nyaruguru, Habitegeko Francois yatangarije Umuseke ko Nyirabahutu yari amaze iminsi arembeye muri CHUB, abaganga bagerageza kumwitaho, ariko birangira yitabye Imana.

Nyirabahutu yakunze kugaragara mu itorero ry’ababyeyi b’i Nyaruguru, risusurutsa imbaga mu birori, by’umwihariko mu bitero by’indirimbo zabo, uyu mukecuru akaba yanezezaga benshi arata ubutwari bwa Perezida Kagame n’imiyoborere ye myiza.

Mu mwaka wa 2017, Ubwo Perezida Kagame yiyamamarizaga i Nyaruguru, uyu mukecuru wari umaze kumushimira ko yamuhaye inka, yanejeje benshi ubwo yari ageze ku gitero cyagiraga kiti “Ya nkunga y’ingoboka wageneye abashaje ayanjye urayafite mu biganza,…. nzarwaza ngure akamodoka kajye kamfasha mu rugendo andi nyashyire kuri banki njye nihembera umushoferi, nzamuhembera ku gihe ubundi njye namushyiriraho agashimwe, ubundi ajye akunda kuntembereza”.

Yakomeje agira ati “Nzabanza tuzane i Kigali kwa Ntore izirusha intambwe, musange tuganire, nzakirwa mu cyubahiro, nzarara ubugira gatatu, nzagaruka mbanze nduhuke nirebeye Imararungu[Inka ye] maze nongere mwinginge tunyarukire ku Gisenyi ndebe ibyiza bitatse u Rwanda, ndebe za ngagi zo mu birunga, nzanisomerayo byeri ho ngo ntabwo zihenda hariyo uruganda Bralirwa”.

Izindi wakunda

Bwiza.com