bwiza.com
Amakuru Mu mashuli

Min. Mutimura avuga ko imyuga ari umurimo ukomeye kandi ufasha gutanga akazi ku bawize

Minisitiri w’Uburezi, Dr. Eugene Mutimura avuga ko haba mu Rwanda ndetse no mu bindi bihugu bya Afurika, imyuga ari ingirakamaro ku bayize bityo ko Guverinoma y’u Rwanda yiyemeje gushyira imbaraga mu kugira ngo izamure umubare w’abanyeshuri bitabira amashuri y’imyuga n’ubumenyingiro(TVET).

Minisitiri w’Uburezi yabitangaje kuri uyu wa Kane tariki ya 20 Kamena 2019, ubwo yagezaga ku Nteko rusange uko guteza imbere imyuga n’ubumenyingiro mu Rwanda bihagaze, aho Abasenateri bagiye bamubaza ibibazo bitandukanye birimo n’igikorwa kugira ngo aya mashuri yitabirwe kurushaho.

Asubiza ibibazo by’Abasenateri, Minisitiri Mutimura yavuze ko Leta ifite gahunda yo kunoza imikorere cyane kugira ngo ikundishe abanyeshuli kwiga mu mashuri y’imyuga n’ubumenyingiro ndetse ko amashuli yigisha ubumenyingiro azakomeza guhabwa ubumenyi n’umurongo kugira ngo azajye akora ibikorwa biyabyarira inyungu.

Yagize ati “Igihugu cyacu cyiyemeje kubaka ubukungu bushingiye ku bumenyi bivuga yuko imyigire y’abanyarwanda igomba kuba umusemburo w’iterambere. Mu Rwanda ndetse no mu bindi bihugu bya Afurika, imyuga ni umurimo ukomeye cyane kuko ufasha gutanga akazi kubawuzi kandi ugafasha gutanga akazi ku bandi baba bakora imyuga itandukanye y’ubumenyingiro”.

Visi Perezida wa Sena, Fatou Harerimana, ubwo yabazaga Minisitiri ku kibazo cy’imibare y’abana b’abakobwa bitabira kwiga muri TVET na IPRC n’ingamba zihari kugira ngo bafashwe kwiga muri ayo mashuli. Mu kumusubiza, Min Mutimura yagize ati “Abana b’abakobwa biga muri TVET ni 40% muri IPRCs ni 30%, dukora uko bishoboka kugira ngo abana b’abakobwa basabye kujya muri TVET bahabwe amahirwe cyane bishoboka, ku buryo byaba byiza umubare ugeze kuri 50%.

Perezida wa Sena,Makuza, Bernard avuga ko bisarasaba ubufatanye bw’inzego zose kugira ngo hahindurwe imyumvire ya bamwe, ko kujya muri aya mashuli ari ukubura uko umuntu agira, ahubwo bumve ko ari igisubizo mu kuzamura imibereho y’Abanyarwanda ndetse n’iterambere.

Izindi wakunda

Bwiza.com