bwiza.com
Amakuru Politiki

Urubanza rwa Rukeratabaro: Baregeye indishyi batazabona hagamijwe gufasha ubushinjacyaha

Abantu ku giti cyabo n’imiryango iharanira inyungu z’abarokotse 
Jenoside yakorewe Abatutsi mu 1994, bishyize hamwe baregera
indishyi mu rubanza rwa Rukeratabaro Theodore.

Mu by’ukuri bari bazi neza ko nta ndishyi zizaruvamo, kuko uyu yaburanye nk’umuntu utishoboye (wo mu cyiciro cya mbere) byose abikorerwa na Leta ya
Suwede ; ahubwo bari bagamije gufasha ubushinjacyaha kubona
amakuru y’urubanza.

Urubanza rwa Rukeratabaro Theodore wahoze ari umujandarume
akaza gushinjwa ibyaha bya Jenoside, rwarangiye muri Mata uyu
mwaka. Uyu Rukeratabaro yahamijwe ibyaha bya Jenoside yakoreye muri
Komini Cyimbogo yavukagamo na Gishoma byegeranye.

Nyuma y’uko urukiko rw’ibanze muri Sewede rumuhamirije bimwe mu
byaha yaregwaga rukanamuhanisha igihano cya burundu ; impande
zombi zarajuriye.

Uruhande rwa Rukeratabaro rwavugaga ko yahanishijwe igihano
kiremereye (nicyo cya nyuma muri Suwede) agasaba kugabanyirizwa ;
naho ubushinjacyaha bwajuririye ko atahamijwe icyaha cyo gufata
abagore ku ngufu, yakoreye ku Winteko mu nzu yitaga Burende(blinde).

Urubanza rwasomwe tariki 29 Mata 2019, urukiko rumuhamya n’icyo
cyaha cyo gufata abagire ku ngufu, ariko igihano nticyahinduka kuko ari
cyo kirenze ibindi muri icyo guhugu.

Nubwo Rukeratabaro yaburanye nk’utishoboye, ntibyabujije ko abantu
16 baregera indishyi, mu nyungu z’ubushinjacyaha ; nk’uko amategeko
mpuzamahanga abiteganya.

Mu rwego mpuzamahanga Ubusanzwe indishyi ziburanishwa mu byaha mbonezamubano, naho ibyaha bikajya mu nshinjabyaha; ariko hari byinshi bigenderwaho.

Iki kirego gitangwa n’uwagizweho ingaruka n’icyaha cyakozwe, ariko
yarareze ntibigire icyo bitanga. Izo ngaruka zishobora kuba igikomere, uburwayi, gutakaza amafaranga cyangwa kwangirizwa imitungo.

Iki kirego gituma imanza ebyiri ziburanishirizwa icyarimwe(urukiko
rumwe, inteko iburanisha imwe):

1.Urubanza mpanabyaha rutuma uregwa akurikiranwa akanahabwa
igihano (igifungo cyangwa amande).

2.Urubanza mbonezamubano rutuma uregwa ariha ibyangijwe n’icyaha
yakoze.

Inyungu zabyo ni uko iki kirego cy’indishyi gituma umushinjacyaha (juge
d’instruction) akigira icye , akanahita atangira iperereza; bikaba byanamuha andi makuru ku cyaha ry’uregwa.

Bimufasha kandi gusabira uregwa igihano n’indishyi ku byangijwe
n’icyaha yakoze.

Bivuga ko ikirego cy’indishyi gitandukanye n’ibindi bisanzwe, bimwe
bisaba guha amakuru gusa umushinjacyaha ajyanya n’icyaha cyakozwe;
bitamusaba gufata umwanzuro wo gukora iperereza.

“ N’abadukomokaho bazabaza indishyi nta kabuza”-IBUKA

Ubwo itsinda ry’abanyamakuru ba PAXPRESS ryajyaga gusobanura
iby’uru rubanza mu murenge wa Gashonga, akarere ka Rusizi;
umuyobozi wa IBUKA muri aka karere asanga indishyi zizakomeza
gusabwa n’abarokotse Jenoside, kugeza ku babakomokaho.
Mu kiganiro kirambuye, Ndagijimana Laurent agira ati, “ Ku bijyanye
n’indishyi duhere ruhande. Burya umwana apfa mu iterura. Ariko ni
gute washyiraho urukiko mpanabyaha ruca imanza ntuteganye
indishyi?

NDLR: Ugahemba abakozi (abagenzacyaha, abashinjacyaha ,
abacamanza n’abasemuzi), ugatunga abafungwa, ariko bikakunanira
gutanga indishyi ku barokotse.

Kuri ziriya nkiko, mbona nta burenganzira burimo, guca imanza
ugahana ntutange indishyi.

Umuryango mpuzamahanga iyo uza kuba wumva icyo duharanira, uba
waritaye ku ihame ryo gutanga indishyi. N’iyo yaba nk’ikimenyetso
cyangwa umuhango.

Ariko guhora babyitarutsa, babihungira kure banabihankana, siyo
mahitamo yacu.

Si ikibazo cy’ubushobozi, uburyo burahari ahubwo bahora
babusesegura ahandi.

Umuntu wese ushatse kuzana iby’indishyi aba atunga agatoki ONU, uko
niko kuri.

Umuryango mpuzamahanga ukuriwe na ONU, kandi iyi yagize uruhare
mu myanzuro myinshi idafasha abarokotse Jenoside, bivuga ko
batumva impamvu ituraje ishinga.

Nyamara ku bwanjye nsanga kwemera indishyi ari ubundi buryo bwo
kwigura no kwihohora, ariko nyine kuba ONU ikomeye ntishaka guhara
ishema ryayo.

Bashobora kuba bakeka ko turi ikipe yoroshye, ariko baribeshya siko
biri. N’igihe tuzaba twaravuye mu mwuka, abadukomokaho bazabivuga.
Bazazisaba nta kabuza”.

No mu mategeko y’u Rwanda birashoboka

Itegeko Nº 30/2013 ryo kuwa 24/5/2013 ryerekeye imiburanishirize
y’imanza z’inshinjabyaha, riteganya ko uregera indishyi ashobora
gutanga ikirego mu rubanza nshinjabyaha.

Ingingo ya 12 igira iti : Iyo ikirego cy’indishyi cyatanzwe mu rukiko
ruburanisha imanza z’inshinjabyaha, ibijyanye n’indishyi rubiburanisha hakurikijwe amategeko agenga imiburanishirize y’imanza
z’imbonezamubano.

Ingingo ya 13: Iyo ikirego cy’indishyi gitanzwe imbere y’urukiko
ruburanisha imanza z’inshinjabyaha, rushobora, rubyibwirije cyangwa
se rubisabwe n’umwe mu baburanyi, gutandukanya ikirego cy’indishyi
n’icy’ikurikiranacyaha mu gihe ikirego cy’indishyi gishobora
kubangamira cyangwa gutinza iburanisha ry’ikirego cy’ikurikiranacyaha.
Icyemezo gitandukanya ikirego cy’indishyi n’ikirego cy’ikurikiranacyaha
gishobora kujuririrwa. Icyakora, gutandukanya ikirego cy’indishyi
n’ikirego cy’ikurikiranacyaha bwa mbere mu rwego rw’ubujurire
ntibyemewe.

Ingingo ya 14: Urubanza rw’indishyi ruba ruhagaze kuburanishwa mu
gihe cyose urubanza rw’inshinjabyaha rutaracibwa burundu, iyo ikirego
cy’ikurikiranacyaha cyatanzwe mbere cyangwa mu gihe cy’iburanisha
ry’ikirego cy’indishyi, hakurikijwe ibiteganywa n’Itegeko Ngenga rigena
imiterere, imikorere n’ububasha by’inkiko.

Izindi wakunda

Bwiza.com